عم رزق: اهلا!!! عاش من شافك يا سي ثروت رجعت امتى من حلوان !
ثروت: والله لك وحشة يا عم رزق ….ده انا هنا بقالي اسبوع !
عم رزق: معقولة …..ده انت عوايدك تشتري سجايرك و ازازة الكوكاكولا كل يوم من عندي ….
صروت: مانا بقالي اسبوع راقد بعيد عنك دور برد شديد !
عم رزق: لا الف سلامة…..و اخبار شغلك في حلوان ايه!
ثروت: والله مش و لابد….. الشركة اللي فيها جابت ضولافها….
عم رزق: لا اله إلا الله….الحال بقي صعب يا بني.. ..و انت ناوي على ايه !
ثروت: امي هتديني قرشين مع صيغة مراتي و افتح محل موبيلات ….و ربنا ييسر…
عم رزق: على خيرة الله ….ربنا يكتب لك الخير يا بني….ده انت في رقبتك كوم لحم….ربنا يقويك…
ثروت: لولا مرتب مراتي و قرشين الدروس الخصوصية كنا اتسوحنا بس…. ربنا كريم …..ده لسة علاج امي ! والله ماكنت عايز اخد منها فلوس لولا انها حلفت عليا يمين ….
عم رزق: الضنا غالي…. وانت طول عمرك شايل امك ربنا يبارك فيك….قولي شفت محل ؟
ثروت: الواد سوكا صبي القهوة دلني على سمسار كويس!
اهو بيشوف لي حاجة نواحينا عشان تبقي قريبة من البيت .. .
عم رزق: سوكا واد شاطر و جاب للأسطي عويس محل كويس اوي ….مانت عارف كان عايز يفتح فرع تاني للورشة بتاعته…. جاب له في الشارع اللي ورانا …و اللهم صل على النبي شغال نار…..
ثروت: يلا….ربنا يسهل و تسلك ….احسن مصاريف البت اللي في الثانوية العامة قطمت ظهري….يلا لايمني السجاير و الكوكاكولا يدوبك الحق معادي مع سوكا !
عم رزق : اتفضل يا غالي….و ربنا يجعل له قدم السعد….
ثروت: صباحك فل ….
عم رزق: نهارك نادي ….مع الف سلامة
بقلمي_مروة_الحمدي