الصورة بعدسة Taha Abeed
السيدة زينب
الساعة ١٠ مساءا
كالعادة انتهى عم سلامة من صلاة العشاء في المسجد و رجع الدكان ليشاهد الماتش، خاصة وأنه زملكاوي قديم….و كان عم شاهين الجزار قد وعده ان يتابع معه الماتش، و بالفعل بعد دقائق أتى عم شاهين 👇
عم شاهين: السلام عليكم يا سلامة….معلش اتأخرت شوية ، اصل الواد “ريشة” الصبي بتاعي كان عنده مشكلة، و الكلام اخدنا.. .
سلامة: هو لسة متخانق مع صاحبة البيت !
شاهين: لا المرة دي مع الواد “سوكا” القهوجي….بيقول انه بيعاكس اخته في الروحة والجاية !
سلامة: الصبي بتاعك ده بيمشي يخانق دبان وشه !
شاهين: لا بس المرة دة دي عنده حق، لان ” أم سحر” بياعة الخضار قالت لي انها شافت الواد سوكا بيتراذل على البت قمر كذا مرة…. انا بعت اجيبه عشان ابستفه….المهم….. انت اخبارك ايه …مش عجبني شكلك مكدر!
سلامة: هنقول ايه …نحمده على كل حال….البت نيرة بنتي الكبيرة جالها عريس فبالي مشغول!!
شاهين: يا الف نهار ابيض…. و ده يخليك تبوز؟؟ يا راجل يا فقري !!
سلامة: ما اصله زميلها مدرس ….و جاي له بعثة للسعودية ….و عايز ياخدها و يسافر…… و البت عمرها ما بعدت عني انا وامها..
شاهين: يا راجل …… دي سنة الحياة….ربنا كاتب لكل واحد فينا نصيبه…..انا قلت تلاقيك قلقان من مصاريف جهاز البت عشان كده مبوز…..
سلامة: ابدا….ده العريس عايزها بشنطة هدومها ….و بيني وبينك البت ريداه…..بس امها عملالي مناحة …..و تقولي انا عايزة بنتي تبقي جنبي !
شاهين: ما كل الامهات بيقولوا كده….بلاش هيافة….طب افرض هو كان اتجوزها و عاش في مصر ….وبعد فترة جت له الإعارة!! تقدر ساعتها تقوله لا بنتي متسافرش!!
سلامة: لا طبعا هتكون مراته وهما أحرار!
شاهين: خلاص….. اذنها اتجوزته….. و هما أحرار بقي …….يصطفلوا مع بعض !!
سلامة: اصل الضنا غالي …… والبت نيرة دي اغلى واحدة في بناتي…. عمرها ما تعبتني…..و هي اللي شيلاه امها …..
شاهين: يا راجل دول ٣ بنات….خلي الحمل يخف عليك شوية !! ربنا يحميهم و تعيش وتشوف احفادهم…
سلامة: تسلم في حياتك …اخبار حسونة ابنك ايه….عرف مين اللي سرق الفلوس!!
شاهين: ابدا الواد بيقول انه كان معاه ١٠ الف جنيه عربون بضاعه…. وأنه مش فاكر الفلوس كانت في المحل ولا خدها البيت!! و بيقول ميقدرش يتهم حد من العمال وهو مش متأكد…انا عارف ايه الهم ده !!
سلامة: بصراحة…. انا مش فاهمه انت جزار اد الدنيا….ليه ميشتغلش في كارك ….و يروح يفتح ابصر محل موبيلات…..دي سكة جديدة مدسهاش قبل كده…..
شاهين: انا سايبه براحته….مقدرش اضغط عليه …..و بصراحة الواد معتمد على نفسه ولا اخد مني ولا مليم….. و اهي القشية معدن….. بس هو لسة عضمه طري….السوق هيعلمه…. الكلام اخدنا هو فين “أبو طارق”؟
سلامة: لسة مكلمه على المحمول….بيقفل دكانه وجاي ….يدوبك عشان نطلع كلنا على الحسين….
شاهين: بس العزومة انهردة عندي انا….بمناسبة خطوبة بنتك!
سلامة: اوام عملتها خطوبة….ده لسة كلام ابن عم حديت….
شاهين : لا ….خطوبة….يلا خليها تتجوز و تفوق انت لنفسك بقي…ولا خايف البت تخلف و تعجزك بدري…..
سلامة: هو انا اطول أكون جد !! دي الدنيا مش هتسعني من الفرحة ….
شاهين: يا رب تعيش و تشوف احفادها ……
سلامة: ربنا يخليك يا سيد المعلمين
الحوار #بقلمي_مروة_الحمدي
#حواديت_مروة_الحمدي