الصورة بعدسة Nada Salem Elbatran
مشهد من تأليفي ⚘
في بيت الحجة نعمة …..
الحوار بين الحجة نعمة اللي جالسة ع السلم و أختها راضية
راضية : و بعدها معاكي بقي برده غاوية توجعي دماغك …..يعني ابنك يتصل بيكي من السعودية و يطمنك عليه و برده مهمومة …طب احمدي ربنا !!
نعمة: الف حمد وشكر ليك يا رب …..بس صوته مش مطمني! هو انا تايهة عن ابني ….. انا حسة ان في حاجة مش مضبوطة….بس هقول ايه طول عمره يكتم ف قلبه يا عين أمه….مانا كان رايي مراته متسافرش معاه السعودية من الاول خليها ف مصر هي و العيال … هو كان ناقص لخمة!
راضية: ايه الكلام ده !! يعني ايه مراته متسافرش معاه ….يا ولية بطلي شغل الحموات ده ! لازم العيال يكون بين امهم وابوهم !! و مراته تشيل المسئولية لوحدها!!
نعمة: هو انا قلت حاجة!! بس اصل مراته طلباتها مش بتخلص…وهو لسه يدوبك ف الشغلانة الجديدة زهرات…..يلا ربنا يعدلها….
راضية : ايوة كده….يسلم لسانك…… ارمي حمولك على الله …..قومي بقي اعمل لنا الشاي اصل شهيرة بنتي بعتالك كيكة شوكلاته انما عسل…..عارفة انك بتحبيها ….
نعمة: ان شاء الله يخليها …. دي بنتي اللي مخلفتهاش….إلا قولي لي لسة بردة مزرجنة و مش راضية تتجوز….
اتنهدت راضية وقالت: متقلبيش عليا المواجع…..البت دي واجعة قلبي عليها….شابة وقمر و مُدرسة اد الدنيا…. بس حظها يا حبيتي ….بقي يا ربي خطيبها القديم ده لو كان عنده ذرة اخلاق كان عمل اللي عمله….
نعمة: عمله اسود البعيد……فيه واحد يفسخ الخطوبة قبل الفرح بيومين….اخص عليه ….. عرة الرجالة!!
راضية: بس ربنا بيحبها….ايون…… اومال…..انا لما سألت شيخ المسجد قالي ربنا مش رايد …. أكيد خير…..و بعدين ما صاحباتها اللي اتجوزوا اتوكسوا ….اللي اتبهدلت و اللي جوزها بياكل شقاها…..يلا الحمدلله ….هي برده مونساني…..
نعمة: وانتي فرحانة بونسها !! يا ولية لازم تتجوز هو انتي هتعيش لها العمر كله !!
راضية : نصيبها هيجي لها….ربنا كبير و عالم بحالنا….قومي بقي شغلنا المسلسل التركي الحلقة انهردة هتبقي حامية اوى البت البطلة جوزها عرف انها بتخونه….
نعمة: طب افتحي انتي التلفزيون عقبال ما اصب الشاي الاخضر عشان نخس!!
راضية باضحك: اخضر ايه واحنا هناكل كيكة بالشوكولاته يا وليه !!
نعمة بتضحك: اهو عشان ضميرنا يستريح ….
راضية بتفتح التلفزيون وقالت : ماشي يا ختي …
الحوار
#بقلمي_مروة_الحمدي
#حواديت_مروة_الحمدي