ستيكرز شهد

مامتها قعدة في الاودة على السرير و شهد بتبص من الشباك

الام : يا شهد….انتي يا بت بتعملي ايه عندك !

شهد:بشوف حمادة اخويا جه ولا لسة…..انا اديته فلوس يجيب لي ستيكرز نجوم الزقها على الموبايل !

الام: يخرب بيت الستيكرز….يعني هضيعي مصروفك على الهبل ده…طب انا هقول ل ابوكي !

شهد: قولي له ما هو عارف …هو اللي اداني الفلوس وكمان قالي هيجيب لي سكوتر على اول الشهر…

الام : كمان سبوتر!!

شهد: اسمه سكوتر مش سبوتر….

الام: ده ابوكي شقيان ….من النجمه بيطلع يركب التاكسي لحد نص الليل…و يا ريته جايب همه….

شهد: مش انتي اللي قعدتي تزني عليه انه لازم يشتغل على تاكسي…استحملي بقي !!

الام : يا بت يا لمضة…ماهو عشان خاطرك انتي و اخوكي….هو انا بطلب حاجة لنفسي!!

شهد: اه بتطلبي….مش لسة انتي متخنأة معاه امبارح عشان عايزة تغيري قيشاني الحمام….هو ده وقته برده!

الام: يا ام لسان طويل …الحمام بقاله ١٠ سنين اتهلك لما بقي يخر على دماغنا يعني من قبل ما تتولدي….وبعدين انتي مالك يا مقروضة انجري اعمل لي شاي ….وافتحي الفرن طلعي الكيكة عشان تبرد…..ولا اقولك استني احسن الفرن سخن وانتي مطيورة…. اصلي وعدت ابوكي اعمله الكيكة اللي بيحبها….

شهد بصوت واطي: يبقي اكيد هتطلبي منه حاجة مش عشان خاطر عيونه!

الام : بتبرطمي تقولي ايه يا بت !

شهد : ولا حاجة يا ماما. هروح اعمل لك الشاي

الام: ماشي يا مقروضة….. عيال سو …..
المشهد من تأليفي