في بيت الست جمالات
وصل القطر محطة الرمل و كلهم نزلوا الحاجة فتافيت السكر و نعمات ومي و الأستاذ شفيق
شفيق: انا اديت لمي رقم الموبايل انا نازل في فندق متروبول هنا في محطة الرمل مش محتاج اقولكم أن أنتم لو محتاجين اي حاجة تكلموني و لازم نتقابل يوم بأمر الله تعالى عشان أعزمكم على اكله فطير معتبرة!!
نعمات: طبعا من غير ما تقول يا استاذ شفيق ده انت ابو الجدعنة
مي: طب يلا انا طلبت تاكسي يدوبك نلحق…. و سلموا على استاذ شفيق و كلهم ركبوا التاكسي
جوة التاكسي …
مي: قوليلي يا حاجة صاحبتك دي مش متضايق أننا كلنا نقعد عندها..يعني بقول انتي صاحبتها ذنبها ايه تدبس فينا احنا كمان !
الحاجة: بس يا بنت… دي مش صحبتي… دى زي اختي متربيين مع بعض…جمالات دي عشرة عمر بعدين دي قعدة لوحدها بعد ما ولادها هاجروا كندا يعني ما صدقت تلاقي ونس…بعدين احنا جايبين حاجتنا معانا لحمة وفراخ و انا محلفاها متجبيش ايتها حاجة من السوبر ماركت…اومال …انا انسانه حسيسة
نعمات: خالتي جمالات انا فاكرها فعلا بنت اصول بعدين يا مي دول ٣ أيام هو احنا يعني كنا هنقعد شهر !!
التاكسي وصل منطقة كفر عبده و كلهم نزلوا …
العمارة قديمة من عمارات اسكندرية الراقية و الأسانسير حديد من بتوع زمان
الحاجة: انا بقول نطلع على السلم انا بخاف من البتاع ده
نعمات: يا لهوي دي في الدور ال٤ كان نفسنا يتقطع…. و شدت الحاجة من ذراعها يلا يا خالتي بلاش كسل!!
وصلوا ادام باب الشقة وفتحت الست جمالات
ست في السبعين من عمرها لابسة جلابية قطيفة و حطة شال على كتفها
جمالات: يا الف خطوة عزيزة اخيرا يا فتفت جيتي
الحاجة و هي بتبوسها: و الله وحشنى دلع فتفتف ده منك …فينك و فين ايامك يا غالية
جمالات: ازيك يا نعمات…..و دي طبعا مي والله كبرتي و بقيتي عروسة….اتفضلوا
كلهم دخلوا …البيت جميل من بيوت زمان ….الصالون مدهب و اودة الليفنج فيها كنبة لونها لبني سماوي و ماكينه خياطة و راديو قديم و مكتبة و تلفزيون و المكان مليان بمفارش الكروشيه على ايد الكنب و ترابيزة القهوة
مي: الله يا طنط …بيتك ما شاء الله مريح للأعصاب…
جمالات : ده من ذوقك …يلا انا جهزت لكم اودة ليكي انتي ونعمات اما فتفت هتنام معايا عشان نحكي زى زمان…
نعمات: تسلمي انا هاخد حمام و اصلي العشاء… و الحق السرير
جمالات: لا سرير ايه ..ده انا عملالكم فضلة خيرك كبدة اسكندراني و رز مفلفلاه و شوربة لسان عصفور
نعمات: يا نهار كل ده على بالليل ده انتي هتزغطينا
جمالات: بلاش رغي خدوا حمام عقبال مجهز السفرة
نعمات و مي دخلوا اودتهم…نعمات دخلت تاخد حمام موبيلها جاله مسج فمن بعيد قالت لمي: اقري يا مي الرسالة احسن تكون امك عايزة تطمن أننا وصلنا !!
مي فتحت الرسالة لقيتها من استاذ شفيق : حبيت اقولك تصبحي على ألف خير….مي ابتسمت و لما نعمات طلعت من الحمام قالت : هه طلعت مامتك ؟
مي: لا ده طلع الجو يا نعناعة!!
نعمات: مش فاهمة!!
مي اديتها الموبايل ..نعمات بصت فيه و ابتسمت و قالت: وبعدين معاك يا سي شفيق !!!
مي: لا ده كده كلام جامد قوي… دي اسكندرية شكلها هتشهد قصة ملتهبة !!
نعمات: بس يا بنت !!
مي : والنبي ايه !!
قطع كلامهم صوت الست جمالات بتنادي: يا مي…يا نعمات …يلا السفرة جاهزة
نعمات بصوت عالي: ايوة يا خالتي جايين
و راحوا أودة السفرة كان الاكل جاهز
الحاجة: طب شغل لي بقي التلفزيون انهردة نشوف المسلسل التركي هيحصل ايه
مي راحت تشغل التلفزيون و رجعت السفرة وقالت: انا مش هقوم تاني سيبوني اعيش لحظاتي مع الكبدة
جمالات: بالف هنا
نعمات : اومال فين يا خالتي المخلل؟
جمالات: قومي هاتيه من التلاجة عندك الفلفل و الخيار مخلل و كمان هاتي العيش انا محمصاه في الفرن !!
نعمات: ده انتي مدلعانا آخر دلع
الحاجة: اسكتوا شوية مش عارفة اسمع المسلسل
مي: متنسيش يا نعنانعة تجيبيلي بيبيسي من التلاجة
جمالات: النبي أنتم منورني….
نلتقي بعد الفاصل