ميريت عند الكوافير بتستعد للقاء الدكتور أنور…
لما خلصت ركبت العربية و فتحت شنطة الميك اب و ضبطت الميك اب
ووصلت في معادها و لقيته مستنيها اصاد الكافيه
نزل أنور من عربيته و فتح ل ميريت باب العربية…ميريت كانت لأول مرة تحس انها مكسوفة و خصوصا لما مد ايده و سلم عليها ….كان نفسها السلام ميخلصش….و دخلوا الكافيه…
الكافيه استايله كلاسيكس كأنها انتقلت لزمن قديم بجماله و شياكته ….الترابيزة كانت في ركن لطيف ….أنور سحب الكرسي عشان يقعدها…و بعدين قعد على الكرسي اللي ادامها…. جه الويتر
الويتر: تحب تشربوا حاجه ؟
أنور: تحبي تشربي ايه؟
ميريت كانت سرحانة… فسكتت شوية وردت: هه …قهوة…فيه لاتيه ؟ !
انور: هات لنا صودا بالتلج و عليها لمون…والقهوة كمان شوية!!
الويتر مشي…
ميريت: طب مين قالك اني عايزة اشرب صودا ؟
انور: انا عارف انها هتعجبك….و ابتسم و بص لها في عينيها و قال لها ممكن اقولك حاجة!
ميريت: اتفضل!
انور: انتي انهردة زي القمر !
ميريت ابتسمت و ردت: انهردة بس !
انور: لا انتي علطول حلوة بس انهردة منورة…
ميريت ملقتش كلام تقوله و ساد الصمت دقيقة،
أنور سالها:بتحبي المزيكا!
ميريت: انا عايشة بيها ….المزيكا دي دنيا تانية زي الكتابة!
انور: حلو تعبيرك عايشة بيها….تخيلي جميل ان الواحد يحس ان الحاجة اللي بيحبها عايشة جواه!
ميريت: وانت بتحب ايه ؟
انور سكت و فكر و مردش
ميريت: معقولة مش عارف؟ !
انور: لا…بس تخيلي أن السؤال رغم انه يبان بسيط بس صعب….ان عمري عدى عليا بسرعة لدرجة اني مفكرتش انا فعلا بحب ايه !!
ميريت: العمر عدى علينا كلنا بسرعة بس المهم اننا نسرق من العمر حياة!
انور بص لها وقالها: الله على جمال الجملة دي ….فعلا انتي رائعة…. تعبيراتك في الصميم ….
ميريت: ما ده شغلي يا دكتور !
انور: ما بلاش دكتور دى….نرفع الألقاب ايه رأيك!ر
انور بص لها و ابتسم
ميريت: بتضحك ليه يا أنور ؟
انور: مكنتش اعرف ان اسمي حلو كده!
ميريت: لا ده انت بتعاكس بقى!
انور: يا ريت اعرف ….الويتر جه….و ميريت كان نفسها محدش يقطع اللحظة الجميلة دي كان هاين عليها تزعق للويتر… …
الويتر حط القهوة على الترابيزة…أنور بص ل ميريت ومتكلمش
ميريت
ميريت كانت حسة بسعاده غريبة …. حست انها بتحلم ….فرحانه و مخضوضة و مذبهلة …كمية احاسيس غريبة ….الأغرب أن وهي قعدة معاه مش حسة بالوقت…حتى مش حسة انها بتعترض على حاجة رغم أنها غلباوية و رغاية بس مع أنور هي مختلفة …ساكتة و هادية و سايبة ايديها….
ايوة هو ده احساسها بالضبط حسة انها سايبة ايديها و هو اللي متحكم في كل حاجة و رغم كده هي مبسوطة مش مضايقة …بالعكس مستمتعة انها منقادة ليه … ايه الاحساس الغريب ده ….ده حتى لو قالي تعالي معايا لآخر الدنيا هروح معاه …..أنور قطع سرحانها وقالها :ميريت قهوتك هتبرد!!
ميريت بتقول لنفسها: اول مرة احب اسمي كده بينطق اسمى حتى بشكل مختلف …
ميريت و شيرين
ميريت راحت تزور شيرين في بيتها، و كان عندها حكايات كتيرة تخص خروجتها مع أنور…
خبطت الباب و شيرين فتحت
ميريت: ايه الاستقبال البارد ده!
شيرين: خشي و اقفلي الباب انا مش ناقصة لماضة….
ميريت دخلت و قالت: شكلي هعمل القهوة لنفسي…
شيرين: و يا ريت تغسلي الكوبايتين اللي في الحوض كمان…و تعملي لي شاي !!
ميريت بتضحك و هي داخلة المطبخ و قالت: و الله صحوبيتك دي جاية عليا بخسارة…و فعلا دخلت المطبخ و عملت الشاي و القهوة و قالت: طب معندكيش حاجة حلوة
شيرين: اه في عندك كتاكيتو في درج البوفيه
قعدوا في الليفنج رووم …و بدأت ميريت الكلام:
مش انا قابلت الدكتور أنور
شيرين: أنور مين ؟
ميريت: فيه ايه انتي نساية ولا الحمل خلاكي تنسي كتير…أنور يا بنتي جاركم
شيرين: اه جوز شوشو
ميريت اتضايقت من الجملة…بس حاولت متبينش!
و قالت: اصله عدى عليا في المجلة و رحنا شربنا قهوة!….
شيرين: هو ايه اصله ده…هو مش عدي عليكي من كم يوم برده!!
ميريت: اه اتغدينا اصله كان له مشاوير قريبة من المجلة!!
شيرين: وهي مشاويره بقت فجأة كله في منطقة شغلك؟؟
ميريت: قصدك ايه ؟؟
شيرين: قصدي ان اللي بيحصل ده هبل …انتي نسيتي أن أنور ده متجوز!! و انتي متجوزة…انا كنت فاكرة ان الموضوع خروجة حلوة و استلطاف من بعيد بس كده اوفر…افرضي حد شافك معاه !!
ميريت: انتي اتجننتي…. احنا خرجنا المرتين في مكان عام
هو احنا اتقابلنا في شقته!!!!
شيرين: اه ما ده اللي ناقص كمان مش بعيد كم مرة خروجة برة بعدين يقولك متجي لي البيت عشان نكون براحتنا!!
ميريت: رزعت فنجان القهوة على الترابيزة و قامت من مكانها و اخدت شنطتها وقالت: انا غلطانه اني بتكلم معاكي اخص….انتي فاكراني ايه انتي متعرفيش اخلاقي …!!!
شيرين: بطلي هبل انا قلت “ده ناقص يعمل كده ” مقلتش انك موافقة!!
ميريت راحت ناحية الباب وهي بتقول: انا غلطانه اني بحكي لك أنتي واحدة عيلة…ولا اكمن شوشو مراته صحبتك!!
شيرين: اه منكرش انها صحبتي و لو عرفت انه خرج معاكي مرتين اكيد هتضايق!! و اظن ده حقها!!
ميريت و هي بتفتح الباب قالت: دكتور أنور ده …دكتور تجميل و انا صحفية و ناوية اعمل معاه انترفيو و دي طبيعة شغلي انا بقابل الناس، و اتكلم معاهم قبل الانترفيو مش الحوارات اللي في دماغك !!
شيرين و هي بتضحك قالت: بذمتك انتي مقتنعة بالكلام اللي انتي قلتيه دلوقتي ده….انتي بتضحكي على نفسك…انا هقولك كلمتين عشان اخلص ضميري اللي بتعمليه ده هيوديكي لسكة هتندمي عليها….و عايزة تزعلي انتي حرة… انا مش متعودة انافق اصحابي! ….
ميريت مردتش عليها و رزعت الباب بقوة و خرجت……
على باب العمارة حصلت حاجة غير متوقعة!!!
ميريت و هي خارجة لقيت أنور في وشها….اول ما شفته قلبها دق بسرعة وارتسمت على وشها ابتسامة كبيرة نستها انها كانت من ثواني متعصبة…. و قالت له: ازيك يا…..قبل ما تكمل لاحظت انه مكشر مش بيضحك زي ما كل مرة بيقابلها و ثواني و ظهرت شوشو مراته بتقله: هاه احنا كده جبنا كل الحاجات يا “نيرو” ….و انور بيرد عليها: اه اه انا جبت كل حاجة من العربية!!
ميريت بتقول لنفسها”نيرو ايه الدلع السمج ده !!” وحاولت تحط ابتسامة مصطنعة و قالت: اهلا دكتور!!
انور رد: اهلا استاذة ميريت !!
ميريت طبعا اخدت بالها انه بيكلمها بتكلف ادام مراته
شوشو: اهلا بيكي اظن انتي صاحبة شيرين ؟؟
ميريت: تمام
شوشو: بردون اننا زاحمين الدنيا اصل عيد ميلاد ابني شريف و احنا بنحضر له
ميريت بابتسامة مصطنعه: كل سنة وانتم طيبين. ….عن اذنكم
ميريت مشيت بسرعة على عربيتها و لمحت انور بيلم اكياس كتيرة و بيحطها في الأسانسير و المنظر ده استفزها ….راحت على عربيتها و اول ما دخلت اخدت نفس طويل و قفلت شباك العربية و قالت: نيرو….دي بدلعه هو في واحدة ناوية على الطلاق تدلع جوزها!!
بعدين هو ليه كان مخضوض اول ما شفني… زى ما يكون خايف منها….أفكار كثيرة دارت في رأسها خلتها مضايقة و في دقيقة دورت العربية و اتجهت لبيتها…
في بيت أم سعيد
دخل سعيد متعصب و بيقول: شوفي بقي يامه انا جبت اخرى من بنتك دي..
ام سعيد: خير ايه اللي حصل؟
سعيد: بسلامتها عملت تيك توك وبتنزل على فيديوهات ليها ولاصحابها وفيه رقص وحوارات مش عجباني !!
دخلت راضية عليهم
راضية: انا قلت لك كذا كرة ملكش دعوة بيا..
سعيد: والله ايه …ده انا اكسر دماغك…دلوقتي حالا تمسحي الفيديوهات دي …
ام سعيد: بالراحة بالهداوة و بتكلم راضية: انتي شكلك مش هتجبيها البر
راضية: طب انا هفتح الفيديو وقولي لي لو مسخرة همسحه
سعيد: انا خلاص قررت انك تمسحيه
راضية: هو تحكم وخلاص ما كل صاحباتي بيعملوا كده
سعيد:مالناش دعوة بحد…وبحذرك لو ملغتيش الفيديوهات ده مانتيش طالعة من البيت …
راضية : انا كان كل غرضي اعمل تسويق للحاجة للي ببيعها…البلوزات والايشاربات الدعاية اليومين دول كلها كده…
سعيد: عايزة تعملي دعاية مش لازم فيديوهات ورقص ومسخرة ….كفاية تنزلي صور
راضية: مش كفاية… الفيديوهات الايف هي اللي بتجيب زباين
سعيد: فيديوهات رخيصة مش محترمة
راضية: طب اديني يومين وافكر في فكرة تانية لتسويق البضاعه!!
سعيد:دلوقتي حالا تمسحيهم
ام سعيد: لمي الدور واسمعي كلام اخوكي ..
راضية وهي بتعيط مسكت الموبايل ومسحت كل الفيديوهات
راضية: اديني مسحتها ….لما نشوف اخر تحكماتكم ده ايه و دخلت اودتها وقفلت الباب..
ميريت من ساعة ما تجوزت من ١٦ سنة و حياتها “مستقرة” مش لاقية وصف غير كده….صحيح هي عمرها ما سألت نفسها هي سعيدة ولا لا….يمكن لان حياتها من ساعة ما تجوزت و كلها جري و شقا وسفر و تعب و حمل و ولادة و خصوصا ان جوزها بيشتغل مهندس بترول واغلب الوقت مسافر….و ميريت قاعدة في العربية راجعة من الشغل مر شريط حياتها من ساعة ما اتجوزت قصاد عينيها …. الله ….طب ليه بتفتكر ذكريات ده حتى مش طبعها….فضلت ميريت تفكر شوية و بعدين استوعبت أنها بدور على سر إعجابها بأنور… و لأول مرة تركز في الموقف اللي هي فيه…. “معجبة بأنور” ايه الكلام ده !!! ازاي تعجب بشخص و هي متجوزة!!! و قالت لنفسها: “ايه ده هو ايه اللي انا بعمله ده” ….
طب انا لما خرجت معاه على الغدا اتعاملت معاه انه “معاد شغل” مع أن مفيش بيني و بينه اي كلام شغل…طب هو انا ليه مهتمه بيه اوي كده انا حسة اني اوفر اوي…..ولا حياتي المملة قلبت معايا بفراغ
ده عك…. لا …..انا لازم افرمل نفسي شوية ….وبدأت تحس بالخوف و القلق….قلق من الجاي
ميريت حسيت أن شيرين عندها حق…وكل كلامها منطقي واللي يثبت كده انها لما قابلت أنور ومراته صدفة أنور ارتبك وكلمها رسمي ادام مراته..وبعدين بيجيبوا لوازم عيد ميلاد ابنهم مع بعض يعني هما على وفاق!!
ميريت قررت تزور شيرين وتعتذر لها وبالفعل راحت و خبطت على الباب و محدش فتح!!
طلعت الموبايل و كلمتها و عرفت انها عند بيت الحاجة فتافيت السكر و نعمات…بالفعل طلعت لبيت الحاجة و اول ما دخلت
نعمات: اهلا و سهلا يا مريم
ميريت: ميريت يا طنط مش مريم!
نعمات: يختي ميريت ده صعب اوي طب انا هقولك مرمر!!
شيرين : لا يا طنط مرمر ده هيكون اسم دلع بنت شيرين لانها عايزة تسمي مريم…بأمر الله تعالى…!
نعمات: هي طلعت بنت ما شاء الله..ربنا يقومها بالسلامة …بصي بقي يا ميريت انتي حماتك بتحبك لسة مطلعة سندوتشات الشاورمة من الفرن….انما ايه ولا تقولي السوري و لا اللبناني.. ….
ميريت: ده انتي نجدتيني انا واقعه من الجوع!
نعمات: عقبال ما اخلص السلاطة تكون الحاجة قفلت على شوربة العدس!! يا خالتي يا خالتي!!!
الحاجة من المطبخ : خلصت يا نعمات…. تعالوا خدوا الاطباق!
ميريت دخلت المطبخ تساعد و شيرين كانت نايمة وصحيت و فرشت السفرة …بعد ربع ساعة، كان كله قاعد على السفرة، بيستمتع بالشاورما السبايسي و شوربة العدس المعتبرة…
لحد ما نعمات قالت:
قوليلي يا شيرين ..انتي لسة بتكلمي شوشو!!
شيرين: بقالنا فترة مش بنتكلم…ليه بتسألي يا طنط
نعمات: بقولكم ايه كلمة طنط دي بضرسني…قولولي يا خالتي !!
شيرين: طب بتسألي ليه يا خالتي !
نعمات: اصل من ساعة خنئتها مع جوزها و لما جت تقعد عندنا بعدها ولا حس ولا خبر !!
شيرين: والله يا خالته انا وهي مش على وفاق اصلها عملت خناءة مع أم سعيد البوابة و انا طلبت منها تعتذر لكنها عنيدة.. !
نعمات: ده جوزها الدكتور شكله راجل سكرة ولسانه بينقط شهد!! انا عارفة يا عيني ايه اللي وقعه الوقعه دى…. ولية حقنة.. !!
ميريت بتسمع الحوار عن شوشو مرات أنور و هي ساكتة….حست بالغيرة لما جابوا سيرة شوشو مراته….و خصوصا لما عرفت انها رجعت البيت يعني ناوية على الصلح….ميريت سألت نفسها : “طب انا يهمني في ايه ترجع له ولا لا”….الظاهر ان خيالي شحط بعيد اوي….قطع تفكير ميريت صوت الحاجة فتافيت السكر اللي قالت: بلاش غيبة يا ست نعمات….خليكي في حالك البيوت يا بنتي ياما فيها …و الست قعدت معانا يومين مشفناش منها إلا كل خير!
نعمات كانت هتتهور وتقول انها سمعتها بتتكلم عليهم مع شيرين لكن سكتت عشان متزعلش الحاجة
نعمات: يا حاجة انا مقصدش بقول بس انا جوزها شكله ابن حلال
الحاجة: طب كلي وانتي ساكته عشان عندنا شغل !
شيرين: بالحق أخبار المشروع بتاعكم ايه؟ !
نعمات:اهو بنأنأ عملت شوية اكسسوارات لما نخلص الغدا اقوم اوريهم لك!
شيرين: اكيد تحفة يا خالته… ده انتي ذوقك تحفة!
نعمات: إن شاء الله يخليكي….الله مش بتاكلي ليه يا شيرويت يوووووه قصدي ميريت!
ميريت: هه…. اه ….اه …لا باكل اهو !
بعد الغدا نعمات عملت الشاي و طلعت صينية قرع العسل بالمكسرات اللي عملتها الحاجة مخصوص لان شيرين طلبتها…و هما بياكلوا الحلو الباب خبط، راحت ميريت تفتح الباب و فوجئت بحد مكنتش تتوقعه….لقيت شوشو مرات أنور ادامها…
اللي قالت…
احنا في بيت الحاجة فتافيت السكر….الباب خبط و راحت ميريت تفتح الباب و كانت شوشو هي اللي بتخبط
ميريت قالت: اهلا و سهلا
شوشو: مسا الخير..اظن اتقابلنا ادام الاسانسير امبارح …طنط فتافيت السكر موجودة !
ميريت: اتفضلي
شوشو دخلت….كانت الحاجة و نعمات و شيرين في الليفنج رووم
الحاجة: اهلا وسهلا والله حماتك بتحبك…..قومي يا نعمات هاتي طبق ل شوشو !!
ميريت في سرها: معقولة دي عن قريب شكلها زي القمر وشيك !!….
شوشو: ميرسي يا طنط انا عملة ريجيم …انا بس كنت في المول الصبح و لقيت مصحف كبير و خطه واضح فانتي جيتي على بالي…انا كنت سمعتك بتقولي عايزة مصحف بخط كبير!! و مدت ايدها في شنطة قطيفة و طلعت المصحف….
الحاجة: تسلم ايديكي…اغلى هدية جت لي !!
شوشو طلعت من شنطتها علبة تانية وقالت: دي حاجة بسيطة يا طنط نعمات حلق فضة مكتوب عليه حرف النون بالخط العربي….انا سمعتك بتتكلمي مع مي و بتقولي بتحبي شغل الفضة!!
نعمات استغربت وحاولت تدارى وقالت:
…. تسلم ايديكي حبيبتي …اقعدي عشان اجيب لك طبق مش هيخسر الريجيم من حته صغيرة….
شوشو: لا بجد اعذريني اصلي لازم انزل اوصل شريف ابني الدرس….و بصت ل شيرين و قالت: ازيك يا شيري حاولت اكلمك كتير…
شيرين و هي مكشرة: اه شفت بس معلش مشغولة !!
شوشو: ربنا يكون ف عونك..!!
نعمات : انا معرفتكيش على ميريت صاحبه شيرين صحفية قد الدنيا !!
شوشو بصت ل ميريت و ابتسمت و قالت :اه اتقابلنا امبارح !
شوشو: استئذنكم لازم امشي ابني مستنيني…. اوروفوار
الحاجة: بس الزيارة دي متتحسبش..
شوشو: طبعا يا طنط اوعدك اجي تاني….
و وصلتها نعمات للباب…..
نعمات قفلت الباب و هي بتضرب كف على كف و قالت: سبحان مغير الأحوال!!!
الحاجة: شفتي بقي انها ست كويسة.. !!
نعمات : ربنا يهدي
ميريت: ليه يا خالته نعمات….شكلها لطيف !!
شيرين: انا اعرفها من سنين جواها قلب طيب بس اقول ايه الطبع غلاب…. عصبية و لسانها كتير بيوديها في داهية… !!
ميريت: اه افتكرت دي اللي قولتيلي كانت متخنأة مع البوابة و بنتها راضية !!
شيرين: اه و حاولت معاها تصالح أم سعيد لأنها غلطت فيها ادام سكان العمارة لكن الهانم ركبها العند و بصراحة انا مبحبش الظلم فمن ساعتها و انا قفلت منها!!
الحاجة: يا بنتي مصارين البطن بتتخانئ و أنتم اخوات …..حاولي تسامحي….خصوصا انها معاها مشاكل مع جوزها ….يعني دي في ضيقة و انتي بنت اصول متسبيش صاحبتك في ضيقة …
شيرين سكتت وقالت: ربنا يسهل كم يوم و ابقي اكلمها ….
ميريت: بس دي قمر و شيك !
نعمات: اه هي واخدة بالها من نفسها و بيقولوا بنت ولاد ذوات بس عليها لسان و…
الحاجة بعصبية: و بعدين تاني نرجع للنم….الست لسة مدياكي هدية و جاية لحد بيتنا!!
نعمات: عداكي العيب يا حاجة اديني هخرس اهو!!
الحاجة: طب قومي اجهزي يلا مش قلتي مي جاية تعدي عليكي عشان تروحوا تجيبوا اكسسوار من ميدان الجامع !!
نعمات: حقة لازم اقوم البس بعد اذنكم يا بنات …
شيرين: براحتك احنا كنا ماشيين جوزي زمانه جاي ولازم اسخن الاكل!
ميريت: وانا برده اتأخرت على ولادي …يلا يا شيرين!!
الحاجة::
يعني هتمشوا عشان نعمات ماشية ….طب وانا اقعد لوحدي!!! طب استنوا تشربوا معايا فنجان قهوة الأول ولا مش عايزين تقعدوا مع ست عجوزة!
ميريت: يا خبر يا تيته احنا نطول …انا بقي اللي هعمل القهوة تسمحي لي ادخل المطبخ ؟
الحاجة: ده بيتك هتلاقيه آخر الطرقة على ايدك اليمين !!
ميريت: قهوتك ايه ؟
الحجة: على الريحة
شيرين: وانا مضبوط!!
ميريت: لا انتي حامل اعمل لك شاي باللبن !!!
شيرين: لا انا عايزة قهوة الدكتور قالي ليا فنجان في اليوم !!
ميريت: طيب هفوت لك المرة دي….
و دخلت ميريت المطبخ ونادت على شيرين
وفي المطبخ …
ميريت :انا عايزة اعتذر لك على عصبيتي معاكي امبارح..معلش مزاجي كان وحش !!
شيرين:وفكرتي في الكلام اللي قلتهولك ؟
ميريت :ايوة..و لقيت عندك حق خصوصا انا لما نزلت من عندك قابلت أنور ومراته ادام الاسانسير..كانوا شايلين لوازم عيد ميلاد ابنهم وهو كلمني رسمي جدا ادامها..
شيرين:شفتي بقى…يا بنتي الرجالة كلهم كده…يخاف طبعا!! ادام المدام انه يبين أن انتم تعرفوا بعض…ده الامر الواقع…وبعدين هي رجعت البيت لانه زي ما قلت لك ردها لعصمته…وهي ملهاش مكان تقعد فيه..وبينهم ابنهم وهما عشرة سنين ففى الاخر اللي حصل بينكم كان مجرد استلطاف…ولو هو زودها..ده عشان هو راجل عمر المجتمع ما هيغلطه…لكن انتي ست ومتجوزة!!
ميريت: صح …كلامك صح مش عارفة ايه اللي جرى لي!!
شيرين: مجراش حاجة,,,,,بس كان لازم تفوقي عشان ميجراش حاجة وتبوظي حياتك ….اللي حصل ده وارد لان كلنا مع سنين الجواز بتيجي لنا حالة ملل….انا في الأول كنت فاكراها مجرد فنجان قهوة تشربوه مع بعض…بس خروجاتك معاه بعد كده كذا مرة …كان لازم أقولك ستوب….
ميريت سكتت بعدين قالت: انا بالفعل عندي حالة ملل….متجوزة بقالي 17 سنة وحياتي كان كلها شغل وتربية الولاد وخصوصا ان جوزي مش متواجد وانا اللي بقوم بدور الاب والام…..بس الحمل كان تقيل أوى وحسيت أن عمري جرى و محستش بيه…..فجه موضوع أنور ده كأنها قشاية واتعلقت بيها…
شيرين: أنا رايي لازم تاخدي بريك…ولازم تتكلمي مع زوجك ….انتي ساندتيه كتير…لازم يحس بيكي انك مخنوقة وتعبانه…
ميريت: وتفتكرى اني مكلمتوش كذا مرة قبل كده!!
شيرين: طب ايه رأيك تشوفي لايف كوتش…
ميريت: انا اعرف منهم كتير بحكم شغلي بس عمري ما فكرت اروح لحد منهم..تفتكري هيفيدوني …
شيرين:انا شخصيا استعنت بلايف كوتش عشان اكتئاب الحمل ومشاكلي مع عادل جوزي واستفدت جدا…
شيرين حضنت ميريت وقالت لها : احنا بشر…وكلنا بنغلط …متخليش ضميرك يعذبك محدش فينا يقدر يتحكم في مشاعره بس أفعالنا نقدر نتحكم فيها…
ميريت حضنتها وقالت: الحمدلله أنك في حياتي ..
الحاجة فتافيت السكر
في شقة الحاجة فتافيت السكر
نعمات: صباح الفل يا خالتي !!
الحاجة: صباح الخير….
نعمات: ايه اللي صحاكي بدري كده ؟
الحاجة: مش عارفة امبارح جالي في المنام المرحوم و قعد يتكلم معايا على الفترة اللي كنا عايشين فيها في اسكندرية …عارفة يا نعمات انا بقالي قد ايه مرحتش اسكندرية…ده يجي ٥ سنين او اكتر !!
نعمات: بس كده… طب والنبي لا اوديكي اسكندرية و افطرك فول عند محمد أحمد و اغديكي سمك عند قدورة….
الحجة: النبي ايه…انتي بتاخديني على قد عقلي !!
نعمات: والله ابدا استني اكلم مي على الموبايل تحجز لنا القطر…و كمان تيجي معانا!!
و طلبت مي…
نعمات: الو ايوة يا مي …صباح الفل يا روحي…بقلك ايه رأيك انا و انتي و الحاجة نطلع اسكندرية…اه …يوم الجمعه ايه بتقولي هتكون زحمة طب نطلع السبت….روحي انهردة اقطعي تذاكر القطر….لأ يا مي مش عايزين نروح بالاوبر بتاعك …تكلفة يا بنتي و بنزين و انتي دماغك ناشفة و مش هتاخدي مننا فلوس….اسمعي الكلام روحي احجزي التذاكر أن ركوبة القطر في حد ذاتها بالنسبة لي متعه…طيب يلا و عدي بالليل زي كل يوم….مع الف سلامة….و قفلت مع مي…
نعمات: شفتي يا خالتي اني مش بضحك عليكي
الحجة: الهي ربنا يسعدك يا غالية….انا هروح أجهز الشنطة…
نعمات: شنطة ايه ده لسة فاضل ٤ أيام!!!
الحجة: وماله اصلي ليا هناك واحدة صحبتي من سنين …هروح ادور على نوتة التليفونات عشان اطلع رقمها…
نعمات: يا لهوي يا خالتي…نوتة تليفونات ده انتي قديمة اوي…طب اروح اعلق على الشاي و اعمل الفطار عقبال ما تطلعي النمرة….و دخلت المطبخ..
على قهوة المعلم شوقي
الأستاذ شفيق : بقولك يا إحسان انا زهقان اليومين دول اوي…بفكر اسافر اغير جو …
شفيق: يا ريت تحب تسافر فين و امتى؟
شفيق : يوم السبت الجاي !!
إحسان: لا خليها اللي بعده حاكم بنتي شيرين تعبانه من الحمل اليومين دول…و امها فلقاني …كل شوية نروح للدكتور و خصوصا أن جوزها شغله صعب !!
شفيق: خلاص هطلع انا لوحدي..
إحسان: اما انك ندل صحيح يا راجل استنى الاسبوع اللي بعده ؟
شفيق: انا طلبت معايا بقي السبت الجاي بامر الله تعالى بعدين لا مؤاخذة مراتك مش هتسيبك تسافر ….هي بتنفسن و بتاخد شيرين حجة!!
إحسان: براحتك انت لسة قايم من العيا و محتاج تغير جو…طب خد معاك القصري ؟
شفيق: مانا سألته قالي عنده جرد في الدراي كلين بتاعه و مش فاضي!!
و هما بيتكلموا دخلت القهوة نعمات و راحت على المعلم شوقي تسأله: ازيك يا معلم…جبت لي البن المحوج اللي وصيتك عليه !!
شوقي: جاهز يا هانم بن فاتح و زي ما طلبتي…
نعمات: تسلم…..
نعمان شافت إحسان و شفيق و قالت: حمدالله على السلامه يا سي شفيق….يا رب متشوف وحش ابدا
شفيق: كتر خيرك الف شكر….
إحسان: ده كلام يا ست نعمات كنتي طلبتي البن مني و طلعته لحد عندك!
نعمات: الف شكر شايلينك لعوزة …
إحسان: بقي بالحق مي بنت اختك ممكن تروح اسكندرية بالاوبر بتاعها؟
نعمات: اه يا خويا بتروح..
احسان: اصل شفيق بده يسافر اسكندرية يومين…فقلنا نسألها!!
نعمات: سبحان الله ده احنا طالعين اسكندرية السبت !
شفيق: مانا بدي اروح السبت برده …و سيادتك هتروحي معاها بالاوبر ؟
نعمات: لا انا هروح بالقطر….دلوقتي القطارات بقت نضيفة الإسباني يودينا في ٣ ساعات حاكم انا هاخد الحاجة معايا برده….نفسها تشم هوا اسكندرية !
شفيق: والله بنت حلال انا كمان بحب القطر طب انا هروح اقطع تذاكر اقطع لكم معايا……
نعمات: لا انا اكلمها في الموبايل تقطع لك معانا!
شفيق: كتر خيركم…و حضرتك هتنزلي فين ؟ هناك ؟
نعمات: الحاجة ليها صاحبتها في محطة الرمل!!
شفيق: طب عال…انا بقي هروح يوم واحد …كفايه اتفسح و ارجع بالليل!!!
نعمات: يبقي لازم تتغدي معانا في قدورة…اهو نعمل واجب عشان قمت بالسلامة…
احسان: بقي حلو الكلام ده قطر و قدورة وانا
هقعد في مصر اتسلق!
نعمات: طب متجيب المدام و تيجي؟
احسان: ملهاش في السفر… مبتحبش تسافر
نعمات بصوت واطي: اه ما هية نكد! و بعدين ابتسمت وقالت: طب عن اذنكم اتأخرت على الحاجة و مشيت….
شفيق: والله ست كومال…. اميرة ..
إحسان: و غلبانه جوزها طلقها بعد ما اتجوز عليها !!
شفيق: اه مانا عرفت…ده من يومين كانت بتنقل عفشها لشقة الحاجة..راجل دون صحيح….عامه هو الخسران….ربنا كبير
احسان: إلا قولي…يا خويا وانت بتكلمها منكشح الاسارير ا اومال معايا مبوز ليه….و قال ايه تروحوا قدورة…. وانت ما صدقت!! طبعا هتسيبني مع سعدات مراتي و بوزها الملوي و تروح تهنكر….
شفيق: قر فيها فيها عشان الموضوع يبوظ ..
و نادي على قرفة
يا قرفة انزل ب٢ شاي بالنعناع و هات الطاولة اغلب عمك إحسان عشرتين….
احسان: لا وانت الصادق انا اللي كنت بسيبك تغلبني عشان مبتدئ….
و قرفة جاب الطاولة والشاي و فتح شفيق الطاولة و رمى الزهر وقال: حلاوتك شيش جهار العب يا حلو….و رزع قشاط الطاولة….