احنا قصاد باب شقة الأستاذ شفيق
اصل إحسان و القصري قلقانين عليه اوي عشان مش بيرد على الموبايل و مجاش انهردة القهوة خصوصا أنه عايش لوحده… بخة صبي المعلم ياقة المكوجي كان واقف صدفة ع السلم و قالهم انه فعلا خبط عليه و مردش… ف القصري طلب منه يكسر الباب…
و بالفعل بخة كسر الباب و اول ما تفتح لقوا الأستاذ شفيق مرمي على أرض الصالة….القصري صرخ: الحقونا يا ناس…
و إحسان من الخضة اتسمر في مكانه….بخة جري على اودة النوم و جاب ازازة برفان من التسريحة وحاول يفوقه….شوية بشوية ابتدا شفيق يفوق….
القصري: يا راجل ده انت نشفت دمنا….ايه اللي جرى؟
شفيق: مش عارف …انا فاكر اني كنت دايخ شوية روحت ع المطبخ اعمل شاي بعدين مدرتش بنفسي
بخة: يا باشا انت لازم تشوف ضاكتور
إحسان اخيرا اتكلم: انا روحي وقعت في رجلي…انا مش قلت لك لازم تكشف…انت دماغك ناشفة
شفيق: طب ودوني على السرير…
بخة سنده لحد السرير و راح المطبخ يعمل له لمون
القصري قال ل إحسان: بلاش تآنب في الراجل هو مش ناقص …انا هروح اجيب له ضكتور و خليك انت جنبه…وبالمرة هجيب لكم غدا …و بقولك ايه مش نتصل بابنه نبلغه!!
إحسان: قال يعني قلبه عليه….انا هعمل الأصول و اكلمه….
نبيل
القصري راح يجيب الدكتور و إحسان اخد الموبايل و طلع البلكونة يكلم نبيل عشان أبوه ميسمعش المكالمة
إحسان: الو ايوه يا نبيل …احنا وصلنا لوالدك بس هو تعبان شوية…لا متقلقش اغماءة بسيطة…
نبيل: ما قلنا مية مرة يروح للدكتور
: ….احسان. اه هو فعلا كام لازم يروح للدكتور….انت هتيجي؟
نبيل: اجي فين يا عمي ده انا عندي شغل متلتل ….انت عارف انا صيدلي و بشتغل في شركة كبير ة و عندنا تفتيش من برة…البركة فيك
إحسان: ربنا يكون ف عونك و لا يحوج ابوك ابدا ليك !
نبيل: تقصد ايه؟
إحسان: اقصد انك معندكش دم… شغل ايه اللي يأخرك عن ابوك…عامه براحتك انا و عمك القصري مش هنسيبه!!
نبيل: اصل يا عمي …. إحسان مدالوش فرصة يكمل و قفل السكةو هو بيقول لنفسه: اخص عليكي يا دنيا بقي الراجل اللي شقي عشان يربي ابنه يشوف جحود كده!!
ميريت
في بيت شيرين الباب خبط
شيرين فتحت الباب
شيرين: اهلا يا ست ميريت…صباح الخير
ميريت: لسة نايمة يا كسلانة !!
شيرين: مانا قلت لك اني واخدة اجازة يومين من الشغل !
ميريت: انا حكت لك على الدكتور أنور أنه…..
شيرين : ايوة حكتيلي… ان لما اغمى عليا هو اللي نجدك وفوقني و قالك انك مش باين السن عليكي يا هانم!!
بس انتي اوفر اوى….بعدين ده راجل متجوز و انتي متجوزة بلاش هبل…
ميريت: لا كل الحكاية أني عايزة اعمل انترفيو معاه…لما دخلت على بروفايل الفيس بوك بتاعه لقيته بيعمل عمليات تجميل للاطفال الغير مقتدرين وبيعملها لوجه الله …راجل خير !!
شيرين: والنبي ايه…..انترفيو ولا تلكيكة…بعدين خلي بالك… دي مراته صحبتي…
ميريت: انتي قلتلي أن علاقتهم زفت؟
شيرين: بس برده اسمها مراته…بعدين ايه الهبل ده انتي تقريبا عندك فراغ….تكونيش عندك أزمة منتصف العمر….
ميريت: ….هو انتي عشان اصغر منى ب ٧ سنين هتذليني؟
شيرين: طب انا داخلة اعمل فطار تيجي معايا ولا تقعدي هنا تشتغلي على الاب توب كالعادة؟
ميريت: لا هشتغل على الاب توب…عايزة ساندوتش اومليت وقهوة من غير سكر ! ….
شيرين : حاضر مش عارفة ايه الامارة دى؟
ميريت بصت في الساعة لقيتها ٩ و نص ….بتقول ل نفسها
ابعت له واتس اب و لا بدري؟؟ لا استنى لعشرة كده لا…احسن ينزل احسن حاجة ابعت واتس اب و اقول له لما يصحي يكلمني…
و بالفعل بعتت واتس اب: “صباح الخير يا دكتور…معاك ميريت الدويني…قابلتك في بيت شيرين…من فضلك تكلمني لما تكون فاضي” ….و حطت الموبايل على الترابيزة و سرحت
و هي بتقول لنفسها: “هو انا صحيح مالي هايفة كده …كل ده عشان كان لطيف المرة اللي فاتت وقالي يا هانم…هي هيافة اه بس انا مستمتعة بيها”….
و راحت على المراية ادام باب البيت و صلحت الميك اب بتاعها و اخدت صور و سيلفي على الموبايل
شيرين دخلت بالفطار و شافتها و هي بتاخد السيلفي …قالت وهي بتقطم قطمة من السندويش: “و الله مجنونة”
يلا يا هانم الفطار جاهز…..
مفيش،عشر دقايق وصوت مسج جه على موبيل ميريت… الرد جه من أنور و وشها نور وهي بتقرا المسج و قالت…..
ميريت: رد عل الواتس اب….بيقولي بونجور يا هانم …مش ممكن
مهذب أوي ….
الحقي ده بيقولي انتي عند شيرين …
ميريت ردت على الواتس اب
: اه عرفت منين؟؟
انور: مش عارف حسيت…
ميريت: ايه فيك حاجة لله بقي!!
انور: كله على الله …بس يا ريت متكونيش شربتي قهوتك !
ميريت ردت بسرعة: لا لسة …
انور: هايل فيه…لسة ادامي ساعة على معاد الجامعة ..فيه كافيه في الشارع اللي ورانا لو تحبي تقابليني هناك ناخد قهوة مع بعض ! !
ميريت: تمام نص ساعة واكون هناك ….حطت الموبايل على الترابيزة…و قالت ل شيرين: هروح اقابله في الكافيه…
شيرين: اموت انا…في سرعة الأحداث …وانتي ما صدقتي…
ميريت جريت على المراية اللي في الريسبشن و طلعت الميك اب من شنطتها….و ضبطت شعرها و قالت ل شيرين: يلا اشوفك….
شيرين: ماشي يا ستي انجووي….مش عايزة ابوظ عليكي جمال اللحظة!!
ميريت: وحياة ابوكي بلاش سيبيني أعيشها و استمتع بيها…. !!
بعد نص ساعة كانت ميريت وصلت الكافيه…اختارت ترابيزة برة اوبن اير
مش جوة….كان عندها احساس انها عايزة تبقي انهردة حرة…….خفيفة …..و حاولت تكون هادية رغم أنها كانت حسة انها متوترة…و دخل أنور الكافيه و شافته و هو بيدور عليها جوة..فراحت مشاورة له …
انور: صباح الفل يا هانم !!
ميريت: اهلا يا دكتور…
انور: لا دكتور ايه بقي…مفيش بنا تكليف!!
ميريت: اوك يا أنور…
أنور ابتسم و قالها: مكنتش اعرف ان اسمي حلو كده ….
ميريت ارتبكت و غيرت الموضوع: قولي بقي ازاى عرفت اني عند شيرين ؟
انور: عشان هي صاحبتك الاتنيم و كانت تعبانه…فتوقعت انك بتزوريها….
ميريت: دي حقيقة…اصلي كمان بصحى بدري و بحب اخلص مشاويرى الشخصيه بدري….
انور: بس انا حظي حلو …اني اشوفك مرتين ورا بعض في اسبوع واحد…
ميريت ارتبكت…
انور: اقصد ما دام بتقولي انك علطول مشغولة….قولي لي بقي يا ستي ليه عايزة تعملي تجميل…
ميريت: بقي فيه دكتور تجميل يسأل السؤال ده !
انور: اه انا ….اصلي مش واخدها شغلانة اكسب منها هي بالنسبة لي رسالة إنسانية….
ميريت: مش هخبي عليك اصلي وزني زايد ،و مش بلعب رياضة، و لا باكل اكل صحي…و متقوليش ليه..لاني انا نفسي معرفش الوقت بيجري ازاي …جايز شغلي صعب عشان علطول مؤتمرات و مهرجانات و سفر
انور: بس ده مش مبرر…انك متحافظيش على صحتك …و عامه انا مكنتش هسألك ليه لان دي حياتك و انتي ادري بيها…
ميريت: غريبة…ده انا كنت فاكراك هتقولي الكلمتين بتوع الرياضة مهمة والاكل الصحي لا غنى عنه… و الجو ده !!
انور: لا مش هقول…لأنك ببساطة ست مثقفة و فاهمه… مش انا اللي هقنعك..انتي عارفة ايه الصح و عارفة ايه المفروض بيتعمل…الامور في حياتنا واضحة و بسيطة بس احنا اللي بنصعبها على نفسنا…
ميريت بصت له و سكتت ….
انور: مالك سكتي ليه ؟
ميريت: بفكر في جملتك” الامور في حياتنا بسيطة بس احنا اللي بنصعبها على نفسنا ” جملة واقعية جدا
أنور بيضحك: شفتي بقي انا مش صحفي زيك بس بعرف اتكلم اهو !!
ميريت: و انت بطبيعة شغلك بتسافر برة!
انور: اه طبعا خصوصا أمريكا عشان مؤتمرات التجميل بتكون هناك و أحيانا فرنسا …
ميريت: ربنا معاك…
لحظة صمت بينهم …حاولت ميريت تتفادى تبص له في عينيه …لاول مرة تحس انها مش لاقية كلام تقوله رغم أنها رغاية….اللي قطع الصمت موبايل أنور رن فهو رد: الو ايوة يا ضحى ازيك…ماما عمله ايه…بتقولي ايه طيب طيب مسافة الطريق و اكون عندك….
ميريت: خير فيه حاجة ؟
أنور و هو بيقوم من مكانه: اه ماما وقعت وهي في الحمام و كلمت اختي…انا لازم اروح دلوقتي….
ميريت: الف سلامة…تحب اوصلك…لو حاسس انك متوتر بلاش تسوق…
انور: لا انا بفكر اخد إوبر لان ابني اخد العربية و انا جيت من البيت مشي….
ميريت: اسمح لي اوصلك يلا بينا ….
انور: مش عايز اتعبك اصل انا رايح المعادي بعيد و….
ميريت: …يلا بلاش تضييع وقت …و بالفعل اخدت المفاتيح من على الترابيزة و الموبايل و راحت هي و أنور على عربيتها متجهين للمعادي
ميريت ركبت العربية و أنور جنبها…بعد ٥ دقايق موبايل أنور رن تاني رد: ايوة يا ضحى… بتقولي ايه د اسماعيل شافها….طب الحمدلله…انا في الطريق…لا متقلقيش انا مش سايق…. كويس انك طمنتيني!!
انور: دي اختي بتقولي أن دكتور جارنا شاف ماما و الحمدلله مفيش كسر و لا حاجة مجرد كدمات …
ميريت: طب الحمدلله قدر و لطف..
انور : انا محرج منك جدا …معقولة اعطلك كده !!
ميريت: انا عندي معاد الساعه ٢ يعني لسة بدري…بعدين مش هسيبك لوحدك..
ميريت حست انها احرجت من اللي قالته …فقالت: قصدي يعني جنابك فاكرني هدفعك تمن البنزين !
انور ضحك و قال: لا مش للدرجة دي …بس افتكري أن ليكي عندي توصيلة….
ميريت: طب تحب اشغل الراديو…
انور: اوك
شغلت ميريت الراديو كان في أغنية عبد الحليم شغالة …اغنية خايف مرة احب…
ميريت: يلا يا سيدي حظك كمان حليم ذات نفسه بيغني…و ضحكت وقالت : متقلقش خير ان شاء،الله !
و ابتسموا هما الإتنين و كملوا سماع الأغنية
نلتقي بعد الفاصل
على قهوة المعلم شوقي…
قاعد الأستاذ إحسان و الأستاذ شفيق يشربوا القهوة…
إحسان : الف حمدالله علي سلامتك يا غالي….و الله القهوة ما كان ليها طعم من غيرك…
شفيق: كتر خيرك يا إحسان….ده كفاية اللي انت عملته معايا …ده انت كنت بجيب لكي الاكل سخن لحد البيت….و مكنتش بتنزل إلا لما تطمن اني اخدت الدوا
احسان:….
اعيب عليك يا راجل ده احنا اكتر من الاخوات ….
شفيق: نبيل ابني جالي الصبح و طلب اني اروح عنده البيت كم يوم لكن انا مقدرش….
احسان: طبعا صعب…..ربنا يخليهولك بس اكيد مراته و وولاه و شغله حمله تقيل ربنا يقويه
شفيق: لا ممكن ابدا اسيب بيتي.. انا معرفش انام الا في فرشتي و لا اشرب القهوة إلا في الفنجان بتاعي….انا مش هطلع من بيتي إلا على نقاله…
الله يرحمها امينه مراتي قطعت بيا اوي ده كل حته في البيت فيها نَفسها….بحس انها لسة موجودة…. الكرسي اللي كانت تحب تقعد عليه….طبق الفاكهة اللي كانت تحط فيه الفاكهة و تجيبه بعد الغدا و احنا بنتفرج على المسلسل….حتى السبحة اللي كانت بتحب ديما تمسكها و هي في ايديها ….البيت فيه روح امينة ….
..امينة الغالية اللي عاشت معايا ٤٠ سنة صاينة بيتي و ابني وعمرها ما اشتكت …و استحملت طبعي و عصبيتي….
الدموع نزلت من عينيه و الأستاذ إحسان كمان عينيه رغرغت بالدموع وقاله: ياه يا شفيق كل ده جو قلبك وساكت يا راجل ده من ساعة ما المرحومة اتوفت عمرك ما اتكلمت عليها …
شفيق بيمسح دموعه و قال: عشان الوقعة اللي وقعتها دي لما اغمى و من حزني عليها ….كان بقالي كذا يوم بفكر انها واحشني و دعيت اني اروح لها
إحسان: بعد الشر عليك يا راجل استغفر….لكل أجل كتاب …
صل على النبي…
شفيق: عليه أفضل الصلاة والسلام….
قولي أخبار الورشة ايه ؟ مش كنت جبت شوية أدوات من صاحب القصري؟
احسان: اه بس لسة المكان عايز يتوضب…و بيني وبينك مراتي قعدة علطول في البيت كتمة على نفسي….عايزها تروح تبات عند شيرين كم يوم عشان اشتغل براحتي !
شفيق: بقولك ايه انت خلاص قررت و خير البر عاجله….انت دلوقتي على المعاش و زهقان و عندك طاقة حط النقط على الحروف و هات لها الموضوع م الاخر….مش معقولة كل شوية تستني لما هي تخرج من البيت عشان تشتغل…ده بيتك يا إحسان انت مش بتشحت منها….متأخذنيش انا كلامي ناشف بس انت عارف انا مبعرفش اتلون في الكلام…
احسان: يسلم لسانك….انت عندك حق كفاية بقي…انا هفضل مأجل حلم حياتي لامتى….انا طول عمري نفسي اكون نجار و صاحب ورشة…. عمري ما حبيت المكاتب و الورق و الدوسيهات…. و بعدين انا فاضل لي كم سنة…انهردة بأمر الله تعالى هتكلم معاها….
و هما بيتكلموا جه قرفة وقال: مدرتوش يا بهوات!!
شفيق: خير يا قرفة ايه اللي حصل ؟
قرفة: اسماعيل ابن المعلم القصري وقع من طوله الصبح وهو في المحل بتاعه و ودوه المستشفى!
احسان بعصبية: يا نهارك مش فايت بقي يا واد بقالنا ساعتين قاعدين ولا تنطق!!
شفيق: انت واد مسطول صحيح! مش تقول ….يعني الراجل من الصبح لوحده !!
قرقة: الله أنتم نازلين تهزىء فيه ليه ….والله انشغلت اصل المعلم شوقي من الصبح برة و شغل القهوة كله على دماغي !!
حقكم عليا
إحسان: و هو في انهى مستشفى ؟
قرفة : اللي في المعادي يا باشا لحظة اجيب المحمول و ادور على اسمها !!
شفيق : لا انا هكلمه على موبيله …
اتصل الموبيل مش بيرد
احسان: طبعا تلاقيه ملهي مع ابنه….طب روح يا قرفة هات لنا اسم المستشفى!
قرفة: هوا
بعد ١٠ دقايق موبايل شفيق رن ….رد وقال: الو ايوة يا قصري…الف سلامة….طب الحمدلله قدر و لطف….لا انا و إحسان جايين لك…بتقول ايه….انت جاي البيت …طب نجي لك البيت ؟؟ طب خلاص مع السلامة !!
احسان : خير !
شفيق: بيقول ان اسماعيل رجع للمخدرات تاني و الظاهر كان متقل العيار المرة دي !! لا حول الله يا رب !
احسان: الواد ده واجع قلب أبوه علطول !!
شفيق: عامه القصري بيقولي نروح له على الدراي كلين بتاعه عشان لازم ياخد الحساب من سافو الصبي بتاعه يلا بينا!!
قرفة جه: جبت لكم اسم المستشفى!
احسان: خلاص يا خويا ربك سهل لها من عنده !!
قرفة: طب لو محتاجين مني اي حاجة عونيا…
شفيق: ماشي يا سي قرفة… خد حسابك اهو…..
و طلع شفيق و إحسان على دراى كلين المعلم القصري و اول ما خرجوا من القهوة سمعوا صوت خناقة على اول الشارع مفيش ٣ دقايق و لقوه الست نعمات واقفة في الشارع و بتصرخ و تقول..
أم أنور
ضحى
في بيت والدة الدكتور أنور
وصلت ميريت مع الدكتور أنور الي بيت والدته في المعادي
الحقيقة ميريت من ساعة ما دخلت العمارة وهي منبهرة، عمارة قديمة في حي راقي، حتى الأسانسير قديم الاستايل الأسود الحديد اللي كان بيجي في الافلام القديمة…رغم أنها كانت خايفة وهي بتركبه…أنور حس بكده و ضحك وقالها: متقلقيش ده من اسانسيرات زمان المتينة…بعدين لو حصل حاجة انا موجود اهو….
ميريت عجبها الكلام جدا و خصوصا “انا موجود اهو” مرت الدقيقتين اللي جوة الأسانسير وهي بتتمنى انهم ميخلصوش….يا ريت الشقة كانت في الدور ال١٠٠!
وصلوا قصاد باب الشقة الشغالة فتحت الباب:
اهلا يا دكتور….اتفضل
انور : ماما عملة ايه دلوقتي؟
!الشغالة: قدر و لطف….بس احنا اتخضينا خضة كبيرة!!
انور : عن اذنك يا ميريت ادخلها!!
ميريت: اه طبعا اتفضل…
دخل أنور لوالدته….و فضلت ميريت في الريسبشن….
الشغالة: تشربي ايه يا مدام ؟
ميريت: يا ريت ميه بس ساقعة…
الشغالة: عينيا!
ميريت فضلت تتأمل البيت…اد ايه دافي و جميل كل حاجة فيه قديمة بس بتلمع زي الساعات القديمة ….ولأول مرة تحس ليه أنور عاجبها…. لأنها بتحب القديم….الكلاسيك….ريحة زمان…وهو استايله نفس ستايل البيت…. القدم…. الاصالة….اه صح هو قديم طريقة لبسه و كلامه حتى نبرة صوته….هو لسة فيه حد بيقول يا هانم !!!
قطع تفكيرها الشغالة لما جت بالمية…
الشغالة: اتفضلي!!
ميريت: ميرسي
الشغالة: النبي يا مدام ده احنا من الصبح على اعصابنا….الست الكبيرة اخدت هدر انما ايه !!
ميريت سمعت كلمة”هدر” مسكت نفسها من الضحك بالعافية…اصلها شايفة الشغالة مسلية بطريقة كلامها و حركاتها…زي وداد حمدي في الافلام القديمة…!!
ميريت: معلش ديما السن الكبير كده !!
الشغالة: لا اصلك متعرفيش الحاجة …ده لحد من سنة فاتت كانت ما شاء الله
تروح النادي تعمل يوجا وتلعب ابوكس…. و
ميريت: ابوكس ده ايه ؟؟
الشغالة: التمارين بالمزيكا…. أبصر بتسموها افروبكس!!
ميريت: تقصدي ايروبكس؟
الشغالة: ايون دهو….بس من سنة جرى لها اللي جرى و صحتها في النازل !!
ميريت لقتها فرصة ذهبية انها توقع الشغالة في الكلام
مي: ليه خير هي عيت؟
الشغالة: لا بعيد عنك ده من الزعل اصل الست الصغيرة بنتها كان فيه مشاكل بينها و بين جوزها اصل هو….
الشغالة سكتت فجأة لما أخت أنور ضحى دخلت من البلكونة
ضحى: مساء الخير…معلش كان معايا موبايل…اتشرفنا
ميريت: اهلا بيكي ….انا ميريت الدويني صحفية!!
ضحى: اهلا وسهلا انا أخت أنور….ميرسي لذوقك انك وصلتيه لهنا…انا قلت له بلاش يتعب نفسه ماما بقت كويسة الحمدلله…
الشغالة: و احنا كنا فين يا ضكتورة ايمان ده انا الصبح دمي نشف… ضحى بانزعاج قاطعت الشغالة وقالت: أم مصطفى خشي شوفي ايه اللي وراكي في المطبخ!!
أم مصطفى كشرت ودخلت المطبخ…
ضحى: و حضرتك صحفية فين ؟
ميريت: مجلة الحياة السعيدة !!
ايمان: اسمها حلو اوي…دي جديدة ؟؟
ميريت: اه بقالها ست شهور بس!!
وهما بيتكلموا أنور جه
انور: الحمدلله هي كويسة..
ضحى : انا قلت لك بلاش تيجى
انور: طب انتي مش هتروحي الشغل ؟
ضحى: لا قدمت اجازة كم يوم و العميد عارف حالة ماما !
ميريت: حضرتك دكتورة في الجامعه؟ !
ايمان: ايوة انا استاذة في قسم اللغة الصينية في أكاديمية النجاح ….جامعة خاصة !!
ميريت: لغة صينية….والله برافو عليكي….و بصت في ساعتها و قالت: استئذنكم عندي انترفيو…اتشرفنا يا دكتورة
ضحى: لا بلاش القاب قولي ضحى بس !
ميريت : اوك يا ضحى …
انور: كنت عايزك تسلمي على ماما بس انا لسة مديها الدوا و نامت …
ميريت: المرة الجاية بأمر الله تعالى….عن اذنكم !!
أنور: هاجي اوصلك …
ميريت وصلت الباب و لقيته فتح باب الأسانسير و دخل معاها!!
ميريت: لا مفيش داعي ….
انور: لا بعد ما عرفت انك خفتي منه فمش هسيبك تنزلي لوحدك …وقفل باب الأسانسير و بص لها و ضحك !!
ميريت ابتسمت و ساد صمت لحد ما وصلوا لباب العمارة…
انور: انا مش هشكرك تاني عشان متزهقيش بس ليكي عندي واحد قهوة بدل اللي مشربنهاش …
ميريت: أن شاء الله و تعمدت متمدش ايدها تسلم عليه لأنها كانت مرتبكة اوي ….مسكت شنطتها و طلعت المفاتيح و دخلت العربية ….و هي شايفاه من مراية العربية لسة واقف…
طلعت بالعربية علطول رغم أنها مش عارفة الطريق كأنها بتهرب…حالة غريبة من السعادة…..السعادة اللي تيجي فجأة فمن خضتها تكون متلخبط ….شغلت الراديو و كان نفسها تسمع نفس الأغنية خايف مرة احب اللي سمعوها و هما مع بعض ….فكرت شوية و راحت جيباها على الموبايل و شغلتها
و قعدت تدندن معها….
بس لو الاقي اللي احبه و اللي قلبي يروح لقلبه
و اللي ترتاح روحي جنبه يومها عمري ما بقي خايف!!
احنا ادام قهوة المعلم شوقي
سمع الاستاذ احسان وشفيق صوت نعمات بتزعق…
لقوا سواق عربية نقل بيتخانق معها…..
نعمات: يعني انت مش هتجيبها البر طب انا هبلغ البوليس !
شفيق: فيه ايه يا ست نعمات؟
نعمات: الاستاذ نقل لي عفش من 6 أكتوبر لهنا وعايز الف جنيه رغم أننا متفقين على 600!!
السواق : يا ست حرام عليكي ده العفش كان في الدور التالت و مفيش اسانسير والعمال وسطهم انكسر لان الحاجة تقيلة!
نعمات:وانا مالي ده شغلهم …واحنا متفقين !!
السواق :لا ده مكنش الاتفاق انتي مقلتيش ان مفيش اسانسير
نعمات:يعني عايز اي دلوقتي !
السواق : الف جنيه !
نعمات: لا مش دافعة..وهكلم البوليس!
شفيق: استهدوا بالله يا جماعة احنا نقسم البلد نصين !
السواق :يعني ايه ؟
شفيق:يعني ندفع 800 كده يبقى تمام
الست نعمات:متاخذنيش يا استاذ شفيق مش هدفع !
شفيق: خليها عندي المرة دى يا ست نعمات …انتي هتطلعي العفش شقة الاستاذ رفعت؟
نعمات: لا العفش هيطلع عند الحاجة فتافيت السكر !!
السواق : طيب يا استاذ.. شوف حد يجيي يرفع العفش لاني بلا قافية مش هطلعه!!
نعمات اديته الفلوس وقالت بصوت واطي:طلعت روحك!!
احسان: انده يا قرفة على كم جدع من ورشة سعيد يجوا يشيلوا!
قرفة : عينيا
نعمات
شفيق
شفيق: كان حقك يا ست نعمات تاخدي حد مننا معاكي وانتي بتنقلي العفش ! معقولة تبقي لوحدك وتتعاملي مع الصنايعية والسواقين!!
نعمات: مبحبش اتقل على حد يا استاذ شفيق…طول مانا بصحتي مش هتكل على حد..الشكوى لغير الله مذلة !
شفيق: ربنا يديكي الصحة…طب اتفضلي على فوق وانا بنفسي هشرف على الولاد وهما بينقلوا العفش!!
نعمات: مش عايزة اتعبك كفاية قرفة يباشرهم !!
شفيق:اتفضلي انتي وانا هتصرف…اكيد هلكتي من المشوار!!
نعمات:كتر خيرك !!
لسة ميريت عندها حالة السعادة من ساعة ما قابلت الدكتور أنور سلام ، مزاجها حلو في الشغل ، فجأة حبت الناس كلها، بتروح المجلة و هي منكشحة الاسارير، حتى اولادها شايفين انها متغيرة….هي نفسها…. اول مرة تنتابها الحالة دي
و هي قاعدة على مكتبها في الشغل قعدت تفكر… كان عايزة تكلمه بحجة انها بتسال عن صحة والدته… مش هي اللي وصلته معقولة متعملش الاصول وتسال على مامته!!فعلا بعتت مسج و كتبت على الواتس اب :
“صباح الفل”….لقيت ان المسج متقرتش… قالت اكيد مشغول ….
سابت الموبايل و خلصت شوية حاجات و رآها ،و مسكت الموبايل لقيته رد…قلبها دق بسرعة شافت الموبايل بلهفة لقيته كاتب: “صباح النور يا هانم”
هي لما بتسمع كلمه “هانم ” منه بتحس انها ملكة …الراجل ده له تأثير عجيب عليها…المهم لقيته كتب:” اعذريني انا عندي مريض اول ما اخلص هكلمك “
بالفعل بعد تقريبا ساعه كلمها ردت
– الو
– ازيك يا هانم
– تمام يا دكتور ايه…. انا معطلاك؟
– اولا قوليلي أنور من غير القاب …ثانيا انتي تكلمي في اي وقت ثالثا و ده الاهم… انتي ازاي عرفتي انك كنتي على بالي !!
ميريت اول ما سمعت الجملة دي قلبها دق بسرعة و ارتبكت و قالت: معقولة طب احلف كده !!
– يعني مش مصدقاني….عامة انتي لسة متعرفنيش انا مش بتاع
مجاملات
ميريت بتحاول تغير الموضوع: كنت عايزة اسال لك على والدتك الحمدلله أحسن؟
انور: اه الحمدلله احسن كتير بقولك انا مش ناسي ان ليكي عندى قهوة مشربنهاش،،،بس الحقيقة انا هموت من الجوع فممكن نخليها غدا!!
…يلا بلاش تضييع وقت
ميريت وهي مستغربة ردت:غدا ؟ !!
أنور: الغدا انا هموت من الجوع نص ساعة تقابليني في محل
جامبو برجر اللي ورا المجلة عندك …انهاردة صاحي نفسي أكل برجر!!اصلي كنت عامل دايت بقالي شهر !!
ميريت كان نفسها تتقل و تقوله انه مينفعش عشان عندها شغل، بس مقدرتش…. دي نفسها تقابله …. سكتت و تنحت فهو قالها: هه مالك شكلك مش جعانه!!
ميريت: لا ابدا ده…. بس كنت بفكر ان عندي اجتماع كمان ساعتين فمش عارفة هنلحق ولا لا !!
انور: لا هنلحق إن شاء الله …يلا انا هنزل حالا …
ميريت : اوك اول ما تقرب كلمني
انور:عيوني
ميريت قفلت الموبايل و هي طايرة من السعادة …هو فيه كده !! يدوبك تبعت له واتس اب يروح يعرض عليها يتغدوا… معقولة يكون هو كمان معجب بيها….يعني هو عنده نفس الاحساس ….هو فيه ايه ….ميريت بتكلم نفسها
انا عمري ما حصل لي كده ولا عمري من ساعة ما اتجوزت و خلفت اتحطيت في الموقف ده …لا لا انا مش عايزة افكر مش وقت الأفكار السخيفة و لا وقت الضمير….خليني استمتع باللحظة الحلوة …هو انا يعني هعمل ايه انا رايحة اقابله الساعه ٢ الضهر و في مكان عام عادي عادي بلاش افورة… طلعت مراية صغيرة عندها في الشنطة و بسرعة دخلت الحمام عدلت شعرها و غسلت وشها و حطت ميك اب و برفان و علطول بتكون معاها في الشنطة بلوزة عشان لو هتخرج بعد الشغل …طلعتها و لبستها و بقت جاهزة بعد حوالي نص ساعة الموبايل رن ….سمعت صوت بيقول :”انا وصلت يا هانم”
ردت وهي منشكحة: اوك في الطريق
قالها: هايل يا جميلة….
هي سمعت كلمة “جميلة ” من هنا و قلبها رقص من الفرحة!! بعد دقايق وصلت المطعم…
اول ما شافته قام و سحب الكرسي اللي ادامه و قعدها وقرب منها و قالها بصوت واطي: انا ديكتاتور… مستنتش انك تنقي تاكلي ايه طلبت لك على ذوقي !!
قبل ما ترد قالها : وانا واثق أن ذوقي هيعجبك و ضحك !!
ميريت قالت لنفسها: معقولة ثقته بنفسه دي!! هو فيه كده!!
ده كفاية ضحكته جميلة…..
شوية و الويتر نزل الاكل على الترابيزة و قال: مش هتشربوا حاجة يا فندم؟ !
انور رد بهدوء: لا اصل احنا هناخد القهوة في مكان تاني !!
ميريت استغربت ولسه هتسأله راح قالها : متسأليش هاخدك مكان فيه قهوة عمرك ما دقتي في حلاوتها!!
ميريت كان نفسها تقوله : ده انت لو خدتني معاك ل آخر الدنيا مش هقول لأ …..
في بيت الحاجة فتافيت السكر
نعمات: صباح الخير يا خالتي شفتي انا ابتديت اشتغل كم كوفية على كم لكلوك…بصي ايه رأيك !!
الحاجة: الله تسلم ايدك….
الباب خبط و دخلت مي
مي: صباح الخير…خلاص يا خالتو انا عملت جروب على الفيس و الانستا وسميته ” ابرة وخيط” ايه رأيك؟!
نعمات: مش مهم الاسم …المهم نلاقي زباين…ايه رايك!!
مي: ايه ده يا خالتو…لكلكوك محدش بقي يشتري الحاجات دى دلوقتي !
نعمات: طب بصي دى…كوفية
مي: لا لا ده جو قديم اوي طب ليه مسالتنيش الأول! الدنيا اتغيرت لازم فكرك يتغير !
نعمات: هو حد يستغني عن الكوفية؟
مي: اه محدش بيلبسها و لو لبسها مش هتكون تريكو!
فيه حاجات اجدد…يعني الشنط الكروس ….الجراب بتاع الموبايل ….. و عايزين نركز اكتر على الاكسسوار….بس الموديل انا اللي هختاره!
نعمات : ليه هو انا ذوقي وحش؟!
مي: لا بس قديم….مش عايزين نقاوح و من اولها انا عارفة الشباب بيحب ايه …المهم عندك حاجة تتاكل اصلي واقعه من الجوع؟
نعمات: احنا عملنا انهردة حواووشي انما ايه عجب !!
مي: طب لما اروح الحق اكل قبل ما يجيني توصيله ….
و دخلت مي على المطبخ ….
في مكتب الصحفية ميريت بمجلة الحياة السعيدة
ميريت
ميريت على مكتبها و جالها موبيل من جوزها سامح اللي يشتغل مهندس بترول و مسافر طول الوقت …
ميريت: اهلا سامح …الحمدلله الولاد كويسين ايه…لا مش عارفة مقاسهم…طب استني لما يرجعوا من المدرسة…..وانت جاي امتي ؟ بعد بكرة…طب هايل… انا ….اه محتاجة برفنات…. ايه عندي كتير اومال بتسأل ليه…خلاص مجبيش …طيب لما الولاد يرجعوا يكلموك سكيب…مع السلامة !
دخلت سحر زميلة ميريت: بقلك انتي هتروحي مؤتمر جامعه عين شمس؟
ميريت: لا لسة مش متأكده… بتسألي ليه !
سحر: اصل رئيس التحرير طلب تغطيه وانا مشغولة….
ميريت: طب خليني اشوف كده و هي بتتكلم جالها واتس اب على الموبايل …فتحته لقيت مسج من أنور وشها نور و قالت لزميلتها: طب معلش جالي حاجة مهمة خلينا نتكلم بعدين …سحر طلعت برة المكتب و قريت ميريت المسج
“صباح الفل يا هانم …انا جنب المجلة انتي قلتيلي أن أنتم في وسط البلد ممكن ناخد قهوة مع بعض لو انتى فاضية ؟”
ميريت قلبها دق بسرعة و بصت لنفسها وقالت في سرها يعني انت: جاي في اليوم اللي انا لبسة فيه اي كلام و شعري مبهدل…كانت هترد في ثانية وفكرت انهم كانوا مع بعض بيتغدوا من يومين …هل يصح أنهم يخرجوا تاني!! قالت :وماله… كأنه حد هتعمل معاه لقاء عمل !! لا يا بنت اتقلي….خليني ارد بعد نص ساعه
قال يعني مشغولة …و فكرت بسرعة انها تنزل الشارع اللي وراهم في محل ملابس تروح تشتري توب حلو بسرعة، و فيه كوافير كمان في نفس العمارة يدوبك تعمل شعرها و هى معاها شنطة و الميك اب يعني ممكن تتضبط على معاد الخروجة… و فعلا راحت المحل و اشترت التوب و راحت الكوافير وقالت له: اعملي شعري بسرعة عندي معاد مهم و مسكت الموبايل و ردت على انور: بونجور دكتور ….انا عندي بريك ساعة ممكن ناخد قهوة مع بعض….!
انور: طب هايل انا بخلص مشوار واعدي عليكي في المجلة؟
ميريت : لا نتقابل هناك معايا عربيتي !
انور: مش من الذوق اني اخليكي تسوقي في الزحمة دي!
ميريت….فرحت اوي بالكلام ….كله رجولة الراجل ده…. بس ردت
معلش مينفعش اسيب العربية لاني بعد كده مروحة البيت !
انور: اوك براحتك انا هبعت لك اللوكيشن على الواتس اب !
ميريت حطت الموبايل ادامها …و الكوافير لسة بيعمل لها شعرها و قالت له: انا عايزاك تعمل لي شعري انهردة حلو اوى
قالها: عندك معاد مهم يا استاذة؟!
ميريت في سرها : عندي اهم معاد في حياتي..!