ميريت صحفية بتشتغل في مجلة “الحياة السعيدة” ، عندها 43 سنة متجوزة وعندها ولدين ، صاحبة شيرين من أيام المدرسة ، انهردة ميريت راحت لشيرين البيت تشرب معها فنجان قهوة
ودقت جرس الباب ..
عادل فتح الباب
عادل: اهلا و سهلا فينك يا أيتها الأخت العزيزة!!
ميريت: خدني بقي بالشويتين بتوعك…. انا مش قلت لك انا محتاجة مصور ضروري و وعدتني….بقالك ٣ أيام ولا بترد على الموبايل!!
عادل: عندك حق …بس و ربنا مطحون….كان عندنا شغل في الجورنال و كمان كان عندي كذا فوتو سيشن
ميريت : ده على أساس انا اللى فاضية….قصره ادخل اعمل لي شاي و لو عندكم حاجة تتاكل… احسن مكلتش حاجة من الصبح!!
عادل:لا حضرتك انا خارج وانتي مش ضيفة ادخلي على المطبخ !
…. عيشي حياتك…عامه انا لسة ممون التلاجة جبن و بيض و الذي منه
ميريت: طب…فين مراتك المصونة ؟
شيرين من جوة: ايوة يا مرمر خشي على المطبخ انا بس هصلي المغرب و جاية
عادل مشي و ميريت توجهت للمطبخ
بعد ١٠ دقايق شيرين دخلت
شيرين بصوت واطي: ازيك يا ميريت
ميريت: مالك وشك اصفر اوى…انتي كويسة؟
شيرين: لا تعبانه برجع من الصبح…و شربت قهوة الظاهر قلبت بطني!!! و شيرين بتتكلم اغمى عليها
ميريت: يا خبر أبيض!!…..
ميريت
ميريت جريت على باب الشقة و ابتدت تصرخ وتنادي
يا ام سعيد …..يا ام سعيد….الحقونا يا ناس….!!!
بالصدفة في الدور اللي فوقيهم كان د. أنور مستني الأسانسير لما سمع الصريخ جري على السلم و نزل على شقة شيرين …
أنور: في ايه!!
ميريت: شيرين اغمى عليها الحقنا بدكتور!!
أنور: انا دكتور يا مدام….اتفضلى اشوف في ايه !
ميريت دخلت الشقة و أنور سند شيرين لحد الكنبة
انور: لو سمحت لو عندك بيرفيوم
ميريت فتحت شنطتها و اديته برفان
شيرين ابتدت تفوق….
انور: بسيطة أن شاء الله
شيرين: هو ايه اللي حصل؟
انور: ولا حاجة بس اغمى عليكي ..
شيرين: حسة اني عايزة ارجع…
انور: لو سمحت يا مدام هاتي كيس بلاستيك او احسن ممكن تاخديها على الحمام عشان تكون براحتها!!
ميريت سندت شيرين اللي قالت: لا دخلوني اودتي… و لو سمحت يا ميريت كلمي ماما اصل عادل هيتأخر للفجر في الشغل…مقدرش اكون لوحدي !!
ميريت وصلتها اودتها و كلمت امها على الموبايل…
بعد نص ساعة سعدات والدة شيرين جت…
سعدات: خير فين شيرين؟…
انور: بسيطة يا هانم مفيش حاجة..انتي عارفة الحمل في اوله و شهور الوحم!!
سعدات : طب هي كويسة ؟
ميريت: ايوة يا طنط خش لها الاودة…سعدات دخلت لشيرين
فضل أنور و ميريت في الليفنج رووم
ميريت: بعتذر يا دكتور اني صرخت و الله انا اتفزعت لما لقيتها اغمى عليها !!
انور: لا مفيش حاجة…ربنا ستر بس هي لازم ترتاح…واضح انها مش بتتغذى كويس!!
ميريت: عادي مانا كنت كده في شهور الحمل الأولي في ولادي الاتنين !
انور: ما شاء الله ربنا يخلي…متشرفتش بحضرتك!
ميريت: انا ميريت الدويني صحفية بجريدة الحياة السعادة و صاحبة شيرين من أيام المدرسة.
انور: تشرفنا….أنا أنور سلام دكتور تجميل!!
ميريت بتضحك: تجميل!! يبقى هتنفعني أكيد
اصلي يا دكتور بقالي سنة مش عارفة اخس…فقلت اعمل بقي العمليات اللي طالعة دي!! تكميم المعدة او شفط دهون !
انور: بس انا شايف وزنك معقول جدا يا هانم!!
ميريت: دي مجاملة طبعا
انور: لا بجد و لا كأنك مخلفة!!
ميريت: ده ولادي في ثانوي حسن و زين
انور: ما شاء الله ….و بص في الساعه ….انا اسف استئذن عشان اتأخرت على معاد العيادة
ميريت: اتفضل…و آسفين على الازعاج ..
انور: ممكن حضرتك تاخدي الكارت بتاعي لو عوزتي اي حاجة…اتفضلي الكارت
ميريت: شكرا دكتور
خرج انور و قفل الباب وراه
ميريت بتكلم نفسها :ده مهذب اوى ….بقي انا شكلي معنديش أولاد في ثانوى…ومش باين عليا السن ده جميل اوى…ومسكت الكارت وقريت:دكتور أنور سلام استشارى جراحة التجميل
على قهوة المعلم شوقي ….القهوة زحمة و صوت رزعة قشاط الطاولة و دوشة الزباين معبأ المكان
دخل المعلم القصري و قعد على الترابيزة وقال :واد يا قرفة هات لي واحد شاي بالنعناع !
قرفة: اهلا يا معلم ده لسة الأستاذ إحسان كان بيسأل عليك!
القصري: اومال هو فين لسة كنت هكلمه على المحمول؟
قرقة:
لما لقاك اتأخرت راح يجيب طلبات للجماعة من السوبر ماركت و بيقولك مش هيتأخر
القصري: طب روح هات الشاي انت عقبال ما اطمن على المخفي ابني !!
قرفة: إلا هو عامل ايه دلوقتي ؟؟
القصري: الحمدلله احسن بس ايكش يبطل الهباب اللي بيبلبعه
قرفة: ربنا يعافيه …. وعندك واحد شاي سكر زيادة للمعلم القصري
في بيت أم سعيد
ام سعيد : يا راضية…انتي يا بت بقالي ساعة بنادي..!!
راضية : خير يامه…كنت بصبغ شعري وقفلة الباب مسمعتش..!
ام سعيد: كويس انك سمعتي الكلام اخيرا و صبغتيه ف البيت بدل الكوافير الحرامي كل شوية يلهف منك فلوس .. !
راضية: طب قصري عايزة ايه عشان هدخل البس فيه مصلحة هعملها قبل ما اروح المحل !
ام سعيد : مصلحة ايه يا مصيبة …بقلك ايه انا مش عايزة مشاكل مع اخوكي سعيد …كل شويه تطلعي في مطلوع واخوكي ينكد علينا!!
راضية: ماهو نبركم ده اللي بيبوظ الدنيا و رحمة ابويا المرة دي انا ما هنطق إلا لما الفكرة تترستأ في دماغي !
ام سعيد : طب روحي اعمل لي قهوة دماغي هتتفرتك
راضية : لا لازم تاكلى الأول الدكتور قال فيه دوا بعد الغدا و كمان طلب تقللي القهوة
ام سعيد : قوطعتي انتي و الضاكتور…يلا عندي صداع …انا و ربنا من يوم ما عزلنا الشقة جديدة و سبنا اودة البوابة و انا تعبانه و مصدعه
…. العين فلقت الحجر …. اومال بقي لما افتح السوبر ماركو الفيبر بتاعي الناس ايه هتولع فينا!!
راضية: اسمه هايبر يامه مش فيبر !! هتفضحينا!!
ام سعيد : طب يلا !!
راضية :الا بالحق يامه هي الولية السماوية شوشو رجعت لجوزها الدكتور ؟؟
ام سعيد : باين لها رجعت إلا زي شوشو دي نفخة على الفاضي …دول يا بت اللي من عيلة كبيرة بس افتقروا اللهم عافينا
راضية: الكبير كبير باخلاقة …دي ست شرانية ….تلاقيها لما عرفت انه متجوز عليها سخنت و سبت له البيت و بعدين لقيت ان مفيش بد انها ترجع ولا مسنودة على ورث ولا بتشتغل و كسيبة…اللى زي دي لازم تحسبها بدليل انها اول ما سبت له البيت راحت قعدت عند الحاجة فتافيت السكر عشان معندهاش مكان تعيش فيه…يلا ربنا يكفينا شرها اروح اعمل الشاي
رجعت ميريت البيت كانت تعبانة اوي اول ما دخلت رمت الشنطة على الكنبة، و جريت على اودة ولادها تطمن انهم ناموا و مسهروش ادام الاكس بوكس….اصل انهردة الخميس اليوم اللي يعتبر فري للعب و طلب الاكل الدليفري…بعد ما اطمنت عليهم دخلت اودتها اخدت دش و صليت العشا،
و دخلت السرير و لقيت نفسها بتفكر …في كل أحداث اليوم بالأخص لما شيرين أغمى عليها…و اذاى قعدت تصرخ ع السلم لحد ما الدكتور أنور جه…ميريت بتكلم نفسها : انا ليه حسة اني اعرفه من قبل كده…ليه !! وشه مش غريب عليا…ولا طريقة كلامه….ممكن اكون قابلته في مكان و ناسية…..يمكن بس هو لذيذ…
لا و عجبتني اوي لسة بترن في ودني جملة “معقولة يا هانم عندك ولاد في ثانوي…..لا مش باين عليكي !! حلوة منه كلمة هانم ….غريبة على ودني بس عجباني…يا ترى هو متجوز!! اه اكيد طبعا و اكيد ولاده في الجامعة … سنه مش كبير…بس فيه هدوء كده و صوته واطي…الله ….هو انا ليه بفكر فيه كتير كده…ليه واخد حيز من تفكيري!!
…عادي… جايز عشان بشبه عليه ممكن…..و سرحت ميريت و مسكت الموبايل و فتحت الفيس بوك و فجأة…افتكرت الكارت بتاعه فاخدته من شنطتها و علطول سيفت موبيله و دخلت على الواتس اب….اتفرجت على صورة الواتس اب لقيت صورة ليه بس شكلها قديم….مش جديدة هو احلى في الحقيقة….بعدين راحت فتحة الفيس بوك و دورت على البروفايل بتاعه و فعلا لقيته….بس فكرت تبعت له طلب صداقة و بعدين رجعت في كلامها….لا لا شكلي هيبقي عيالي اوي… بعدين لاحظت أن معندوش إلا ١٠٠ فريند يعني شكله مش بتاع فيس بوك ،كمان صورته هي هي اللي على الواتس اب….لا لا مش هبعت له طلب صداقة ايه يقول عليا ايه هو انا اعرفه منين….بعدين قفلت الموبايل و قررت تنام ….بس بعد دقايق ابتسمت و هي بتقول لنفسها
“بس كلمة هانم تجنن عجباني اوي “
و قفلت النور