كنا ادام بيت الحاجة فتافيت السكر و أم سعيد بتصرخ
طلع شقة أم سعيد شيرين و نعمات و هما بيجروا، و دخلوا لقوا سعيد مرمي على الأرض و دماغه مفتوحة و سلم خشب كبير واقع عليه
نعمات: يا لهوي بسرعة يا ام سعيد …شوية بن …و راحت قطعت طرحة مرمية على الكنبة نصين و ربطت رأسه!
شيرين: ايه اللي حصل ؟؟
سعيد: كنت بركب البلتكانه رجلي فلتت من ع السلم و البلتكانه نزلت على راسي !
نعمات: معلش حصل خير!! !
ام سعيد: انا قلت لك نروح نشتري حاجة جاهزة انت اللي صممت!
سعيد : خلاص بقي يامه ..بسيطة ان شاء الله
شيرين: طب انا هكلم الدكتور برزى يبعت لنا حد من عنده.. !
نعمات: النبي برزي ده مقطع قلبي كل الحتة بتجيبه من افاه كل شوية اشي حد دماغه مفتوحة واشي حد ممغص…!
شيرين: هو راجل محترم عمره ما أتأخر على حد.. !
أم سعيد: كل ده من القر وربنا من ساعة ما سمعت كلام الاستاذ مخلص رئيس العمارة وانا متشائمة!! بقي يرضيكم أن بسلامته لما يعرف أننا اجرنا الشقة يروح يقنع باقي سكان العمارة انهم يكرشونا ؟
نعمات: طب وليه كده؟
ام سعيد: بسلامته بيقول أن المستوى بتاع السكان لازم يكون زي بعض…يعني بالعربي بيستعر أن البوابة تبقي زى السكان راسها براسهم ليه كده !! ليه الغل ده؟
أنا بشتغل بوابه هنا في العمارة من تلاتين سنة وشقيت عشان اربي ولادي بعد موت جوزي عمري ما بصيت لحد في العمارة..و لا قارنت حالي بحال حد… وعمر ما حد اشتكى مني… ليه لما ربنا قدرنا نأجر شقة في العمارة… فيه سكان استكتروها علينا!! ليه الغل ده… أنا عمري ما بصيت لرزق حد فيهم… ليه تسكتروا علينا النعمه !!
نعمات:هدي نفسك يا ام سعيد احنا هنتكلم مع الاستاذ مخلص ونشوف ليه عمل كده!
نعمات: انا اجرت الشقة بورق رسمي مسرقتهاش واللي عايز يعمله يعمله بس قادر ربنا يكسر نفسه زي ما كسر نفسنا… ما علينا اقعدوا انا لسة فرشة المطبخ ممكن اصب لكم الشاي ! بس متأخذونيش اودة القعاد اهو برتبها…!
سعيد: متتعبيش نفسك يا مدام شيرين انا نازل لدكتور برزي بنفسي انا بقيت كويس ….العواف يامه… !!
أم سعيد : يعافيك يا حبيبي…ابقي طمني…!!
نعمات : انا لازم انزل احسن سايبة الاكل ع النار…. و الشاي هطلع اخده عندك بالليل واحنا بنتفرج ع المسلسل!
ام سعيد : عيوني يا غالية
شيرين: انا هطلع بقي لأحسن جوزي زمانه مات من الجوع!!!!
شيرين طلعت شقتها و نعمات نزلت شقة الحاجة فتافيت السكر
في بيت الحاجة فتافيت السكر
نعمات دخلت و حكت للحاجة على اللي حصل ،و راحت عملت كوبيتين شاي بالنعناع ، وهما قاعدين على الكنبة المفضلة للحاجة..و بيتفرجوا ع المسلسل
نعمات : الا قوليلي يا حاجة… هي حفيدتك اللي جت من السعودية باتت ليلة و راحت فين !
الحاجة: راحت عند بنت عمها في أسيوط، اصل هما صحاب اوي و البنية يا عيني مزاجها وحش شوية…
نعمات: كله واحد عنده همه…بقلك يا خالتي انا عيزاكي تسالي أم سعيد لو تعرف شقة محندأة في الحتة عشان آجرها!
الحجة: لمين ؟
نعمات: لي …
الحاجة: يعني ايه… عايزة تروحي تعيشي في شقة ايجار و بيتي موجود !
نعمات: يا حاجة انا عمري ما طلبت حاجة من حد ،و عمري ما احب اكون عالة!
الحاجة: اخص عليكي …عالة! هو انا مش في مقام امك …و انا قاعدة في بيت ٣ أود و لوحدي اولادي في السعودية و انا فوق ال 80 يجيلك قلب كل واحد. فينا يعيش في حته …ازاي انتي براوية كده …و بدأت دموعها تنزل…
نعمان حضنتها: النبي ما تزعلي مني….انا بس بعد موضوع طلاقي دماغي ملخبطة ، و مش هقدر اعيش مع اختي و جوزها….عمري ما هكون على راحتي هناك …و انا بقلك اهو لو هعيش معاكي هنا يبقى و رحمة امي كل حاجة في البيت هندفعها بالنص… و اللي أوله شرط اخره نور..
الحاجة: انا موافقة بس انتي هتصرفي القرشين اللي حيلتك على البيت؟…
نعمات: لا مانا و مي فكرنا في مشروع …انما ايه سقع ..انتي عارفة اني طول عمري احب الخياطة و الاكسسوار…ففكرنا نعمل حاجات و نبيعها و مي هتعملي دعاية على الشوشال بتاع ده اللي طالع موضة الفيس و الانسكريم و الحاجات دى !!
الحاجة : آه تقصدي الفيس توك و الانستكريم؟
نعمات بتضحك: ايه الجمال ده انتي عارفاهم منين ؟
الحاجة: اومال انا مطلعة…أحفادي وانا في السعودية كانوا علطول عالنت!
نعمات: المهم هطلع الم باقية هدومي و حاجتي …و اسمع لي كلمتين من امتثال لماتعرف اني ماشية !
الحاجة: ….انا قاعدة لوحدي و بعدين احنا في الشقة اللي تحتيهم… بقلك ايه ماتكلمي شوشو قالت إنها طالعة لشيرين و اتأخرت عشان تتعشى معانا …تكون يا عيني مكسوفة !
نعمات: حاضر ولو اني ماليش فيها …نعمات مسكت الموبايل و طلبت شوشو والخط اتفتح و نعمات بتقول: الو….الو ….
نعمات: ايه ده انا سمعها بتتكلم مع شيرين باين لها سايبة الخط مفتوح…..الو…..الو…..
الحاجة: طب علي صوتك !!
نعمات: استني يا حجة دي بتتكلم مع شيرين علينا استني !!
نعمات سمعت شوشو بتقول ل شيرين
شوشو
شيرين
مش عارفة يا شيرين هقدر لحد امتى كده…الولية اللي تحت البلدى اللي اسمها نعمات مش بطيقها…بس مضطرة…اعمل ايه!!
شيرين: يا شيخة حرام عليكي!! طنط نعمات دي عسل!
شوشو: عسل اسود ..لا و بسلامتها لسة مطلقة و تنصحني..
ده اللي كان ناقص …انا هعصر على نفسي لمونة لحد ما اشوف طريقة ارجع بيها البيت…. هي الحاجة صحيح طيبة بس رغاية اوي مبتسكتش…….عمري ما كنت اتخيل اني اتحمل وضع كده!! !!
نعمات سمعت كل الكلام ده و راحت قفلة الموبايل وهي بتقول : آه يا بنت ال…..بس لما تنزلي انا هوريكي الوضع اللي يليق بمقامك…!!