على قهوة المعلم شوقي
الاستاذ شفيق و الأستاذ إحسان و معاهم المعلم القصري
شفيق: يا قرفة فين السحلب؟!!
قرفة: حالا يا شفيق باشا هسحلبك…!!
شفيق: ايه يا إحسان…ما تصل على النبي…ضارب بوز بقالك يومين عشان كلمتين سمعتهم من مراتك….ما انت عارف الستات لسانهم زي المبرد….و ديما يوقفوا المراكب السايرة!!!!
احسان: بقولك ايه انا جبت اخري…..دى ولية نكد … زودتها اوي.. !!
القصري: يا راجل كبر دماغك …و سيبها تعوي بلا هم ….البيت بيتك و انت اللي بتصرف عليها و قانيها في البيت …يبقي تعمل اللي انت عاوزه…تعمل ورشة تعمل مصنع انت حر!!!
احسان: عين العقل …انا قلت لشيرين بنتي كده برده لو أمك مسكتتش تسيب البيت !!!!
القصري: يلا المركب اللي تودي……..
شفيق: لا لا يا رجالة…مش كده ميصحش…. ده أنتم عشرة ٤٠ سنة !!
احسان: اديك قلت …يعني هي المفروض فهماني…هي بعد ما انا طلعت معاش و نازلة فية طلبات شوية وصلني عند بنت خالتي…شوية انزل هات طلبات م السوق كأني صبي عندها…لا لا شوية دم بقى….قلت لها أن نفسي اعمل حلم عمري ورشة نجارة…طول عمري بكره قعدة المكتب و الكتمة و الدوسيهات و الورق…نفسي اتحرر ….بحلم بصوت الشاكوش و زنة المنشار… بحب ريحة نشارة الخشب ….ايه حرام احقق حلمي قبل ما اموت …..قال خايفة على الشقة…تقولش قاعدين في فيلا الملك فاروق!! ….
القصري: روق واشرب العناب..انا اتفقت لك مع شيخ النجارين المعلم “بلطة” و وعدني انه يديك حتتين تتسلى فيهم ..و هيبعت واحد من صبيانه معاك شارع نجيب الريحاني تشتري لك أدوات النجارة و اللذي منه!!
إحسان بابتسامة عريضة: بجد يا قصري….ربنا يبارك فيك ده المعلم بلطة نجار كبير وهو اللي عمل لشيرين بنتي عفشها!!…
القصري: اومال هو احنا بنلعب….خير البر عاجله… …
شفيق: بالهداوة يا إحسان …اهو القصري بيساعدك… من الناحية التانية خف اللعب مع مراتك ….كبر دماغك…اشتري مني…خدها على قد عقلها ….
قرفة جاب السحلب لشفيق وهو مبوز…
شفيق: مالك انت راخر شايل طاجن ستك ليه؟ !!
قرفة: النبي يا بهوات فيه موضوع كنت عايز اخد رأيكم فيه …
القصري: مالك يا قرفة خير …انت متكدر مع معلمك شوقي؟
قرفة: لا يا معلم بس الصراحة اصلي بفكر