الحاجة فتافيت السكر
أم سعيد
شيرين وعادل ادام باب شقتهم و صوت هرج و مرج و ناس بتزعق و صريخ على السلم
عادل: ايه يا خوانا فيه ايه؟ !
ام سعيد: أصلنا سمعنا صوت في شقة الحاجة فتافيت السكر و انت عارف ان بقالها سنين مسافرة فقلنا اكيد حرامي.. !
شيرين: يا نهار ابيض و طلع حرامي؟!!
أم سعيد: سعيد ابني مكدبش خبر و طلع بعصاية الغلية… ولقى الباب مفتوح و دخل يشوف فيه ايه لقى حد لابس اسود ف اسود قام رزعه على دماغه!
عادل: طب كويس كتفوه لحد ما أبلغ البوليس!
ام سعيد: لا يا بيه ده مطلعش حرامي …اصبر…دي طلعت الحاجة …و الضربة جبتها الأرض و هاتك يا صريخ… و ندهنا الإسعاف!!
عادل: طب و ايه اللي رجعها في ساعة متأخرة زي كدة ؟؟
ام سعيد : الغريبة أن طول عمرها تغيب سنة أو اتنين و لما ترجع لازم تعدي عليا الأول …عشان انضف الشقة قبل ما تدخل… عمرها ما جت مسرسبة كده من غير لا إحم و لا دستور!
سعيد نازل على السلم
سعيد: يامة مش تتأكدي قبل ما تقولي انه حرامي…الولية مسورأة بقالها ربع ساعه !!
أم سعيد: هو أنا أقلت لك تضربها بالعصاية؟
سعيد: اهو الإسعاف جه بيحاولوا يفوقوها!
شيرين: طب ادخل اغير هدومي و اشوفها
عادل: لا لا تلاقي الشقة مردومة تراب… انا هطلع اجيبها تستريح عندنا في البيت …خشي انتي ريحي ..انتي حامل..
دخلت شيرين البيت و طلع عادل على شقة فتافيت السكر يشوفها
….
دخل عادل لقي ست كبيرة مغمى عليها ، و راضية بتهوي لها و بتقول: الله أكبر بدأت تفوق!!
فتافيت السكر: انا فين…بسم الله الرحمن الرحيم
راضية: في بيتك يا حاجة….انتي بس ايه اللي رجعك في نصاص الليالي…كده تخضينا؟!
الحاجة: مردتش ازعجكم…. قلت الصباح رباح يا بنتي… !
عادل: حمدالله على السلامة يا حاجة…فينك بقالك سنتين او اكتر…المرة دي الغيبة طولت……
الحاجة: انت عارف ان ولادي في السعودية بس يابني ربنا ما يحكم عليك بالغربة و وجعها ….ف يوم و ليلة لقيت نفسي لمت الهدمتين و طلبت من ولادي تذكرة على مصر…!
عادل: خير في ايه …حد زعلك في حاجة؟
سكتت الحاجة وقالت : محدش يا ابني …ده الزمن اللي مبيسيبش حد ف حاله …
عادل: طب يلا يا راضية…سندي الحاجة معايا لحد شقتي تستريح و لما انتي وامك تنضفوا بيتها تبقي تيجي…..
راضية: النبي ابدا ما هتقعد إلا عندنا… !!
دخلت الست نعمات خالة مي و هي بتقول: ولا انت ولا هي دى ما هتقعد الا في بيت اختي امتثال…أنتم نسيتوا أن دي خالتنا أخت امنا …يا الف نهار ابيض يا خالتي… النبي الدنيا مش سيعاني من الفرحة…
الحجة بتضحك و تحضن نعمات: اهلا بالغالية بنت الغالية …انتي هنا يا نعمات انا فاكر انك في بيتك ..
نعمات: بيتي ايه بقي،،، انا مجرشة عند اختي بقالي يجي شهرين…دى حكاية طويلة ابقي احكيهالك بعدين…يلا ايدك معايا يا راضية …
و سندوا الحاجة لحد بيت المهندس رفعت…