إحسان
شيرين
شيرين: اهلا يا بابا ده انت نورتني …خير انت كلمتني الصبح في الحضانة، و قلت لي عايزني ضروري بعد الشغل ؟
احسان: انا قلت اعدي عليكي يا بنتي… انا عارف انك حامل و تعبانه…و بصراحة مخنوق مش عايز اقعد في البيت!! !
شيرين: اكيد انت وماما اتختئتوا تاني…مش معقول دي رجعت البيت امبارح بس ! كان بقالها شوية عندي بايته…!!
احسان: امك دي عصير نكد….من يوم ما تجوزتها و هي منكده عليا عيشتي….كانت جوازة مهببة!! …
شيرين: يا بابا اهدي …مش كده! !
احسان: بقي ايه يعني لما اودة الخزين استغلها كمكان أصلح فيه حاجات نجارة…كفرت انا كده….الهانم تسمعني موشح… و تقولي هيكون فيه خبط و رزع…دى بتسد نفسي قبل ما ابتدي…بس و رحمة ابويا وامي الغاليين لا برده اعمل ورشة اه… مانا مش هفضل قاعد كده في البيت… زي الستات…و لا هفضل متلقح على القهوة.. على رأي المعلم القصري …منظري .ده هيبقي وحش في الحتة!! ايه عواطلي..ولا عشان طلعت معاش اتهزإ!
الباب خبط…..و شيرين فتحت لقت المعلم القصري
شيرين: اهلا يا عمو !!
القصري: ازيك يا شيرين….متأخذنيش اني طبيت عليكي فجأة بس الموضوع ضروري !!
إحسان من جوة: اهلا اهلا يا قصري اتفضل يا راجل…البيت بيتك….
القصري دخل و قال: اصلي عديت على القهوة قرفة قال لي انك لسة ماشي و بلا قافية وانا في القهوة لمحت على الترابيزة اللي ديما بتقعد عليها نضارتك و محفظتك
وقرفة قالي أنك
طلعت لبنتك شيرين فقلت اعدي عليك اديك الامانه!! !!
إحسان ضرب كف على كف و قال: لا حول الله يا رب….من عصبيتي نسيت الحاجة ع القهوة!! ربنا يجازي اللي كان السبب…مش عارف اشكرك ازاي يا قصري….
القصري: لو عايز تشكرني يبقى تنزل معايا حالا نلعب دور طاولة!!!
إحسان: بس كده عينيا…اسبقني وانا احصلك بس اقول لشيرين كلمتين….
شيرين: استني يا عمو اعملك حاجة تشربها!! ميصحش!!!!
القصري: شرب ايه …لا ده انا مش عايز اسد نفسي انا ناوى اعزم الوالد على كشري معتبر…..هنزل استناك تحت يا سحس.. فوتكم بعافية
و مشي القصري …
إحسان قال ل شيرين: انا عايزك تقولي لامك لو مبطلتش نكد انا ليا تصرف تاني معها …
شيرين: معقول يا بابا …هتسيب البيت ؟؟
إحسان: لا طبعا….ده بيتي ….هي اللي تسيبه..!
شيرين؛ ايه الكلام ده…يعني هتطردها؟
إحسان: اه..
شيرين: اسمح لي يا بابا ده كتير اوي… !!
إحسان: انا مش باخد رأيك انا ببلغك رسالة توصليها…و قام من على الكرسي و اتجه للباب وقال: انا بكررها تاني لو امك ملمتش الدور يبقي مع السلامة….
و اتجه ناحية الباب و خرج….
شيرين بصوت واطي: لا مش قادرة اصدق بابا اتغير اوي…للدرجة دي متمسك بالورشة ؟؟
جه جوزها عادل من جوة و هو بيقول : اه و فيها ايه …على الأقل يترحم من نكد امك!! !!
شيرين: احفظ لسانك…و أقصر الشر…!!
عادل: وانا مالي…..براحتكم ….عيلة مناخوليا ….سمعتي آخر الاخبار؟
شيرين: أخبار ايه؟ …
عادل : عرفتي مين هيسكن ف شقة أبو السعود؟
شيرين: شقة أبو السعود اللي مقفولة بقالها فترة؟
عادل:أيوة حضرتك هتسكن فيها أم سعيد البوابة و عيالها! !
شيرين:مستحيل…. قصدك انها مبقتش بوابة العمارة… بقيت من السكان…ربنا يكرمها… ايه المشكلة؟
عادل: لا دي هتشتغل برده بس شغلانة تانية! !!
شيرين: مش فاهمة …بلاش الغاز انا جاية من الشغل هلكانه و بابا كمل عليا….اختصر فيه ايه؟ !
عادل: أم سعيد صاحبة الصون و العفاف …هي و ولادها طلعوا بيلعبوا على كبير اوى….ده ولا افلام السينما…الأول يأجروا الشقة بتاعة ابو السعود بتراب الفلوس بنظام الايجار الجديد..بعد ما البشمهندس سعيد اكل عقل الراجل…و اقنعه انه يأجرها لأن أبو السعود بعد ما ولادوا اتجوزوا قرر يرجع البلد!
شيرين: اختصر يعني ام سعيد في الاخر أجرت الشقة ؟؟
عادل: مش اجرت الشقة بس يا روحي دى بقت صاحبة ملك!!
شيرين مذهولة: ازاي؟
عادل: اشترت المحل اللي تحت العمارة!
شيرين: قصدك أجرته زي الشقة؟
عادل: لا اشترته …اشترته تمليك ….
شيرين: مستحيل…دول جابوا الفلوس منين؟…
عادل: المهم انهم جابوها…. الكلام اللي بيحصل ده لو اتعمل
فلم محدش هيصدقه….وهما بيتكلموا سمعوا صوت صريخ على السلالم جريوا فتحوا الباب لقوا…..
نلتقي في الحلقة القادمة إن شاء الله