في بيت الأستاذ إحسان الساعة ١٠ الصبح
إحسان: صباح الخير يا سعدات
سعدات: صباح النور يا اسطى
إحسان: أسطى!!
سعدات: مش جنابك ناوي تقلب البيت ورشة نجارة…بقي أغيب يومين عند بنتك شيرين عشان كنت براعيها وهي تعبانة من الحمل …اجي الاقيك حاطط خشب و مسامير في اودة الخزين…!!
احسان: اديكي قلتي اودة الخزين…يعني ملهاش لازمة …انا بقي قررت استثمرها….
سعدات: و مين سمح لك بكدة؟!
إحسان بعصبية: ايه …يسمح لي؟؟؟؟ ده بيتي وانا حر!! !
سعدات: وانا مقدرش استحمل رقع و زرع طول النهار.. !
احسان: يا ولية انتي النكد في دمك….انتي عارفة اني من ساعه ما طلعت معاش و نفسيتي زي الزفت و على ايدك كنت ناوي ادخل جمعية عشان أجر ورشة على أدى بنتك اخدت دوري فيها….ايه مفيش احساس متحسي بيا شوية… !
سعدات: اقطع دراعي أن دي شورة صاحبك سي شفيق …ما هو من ساعه ما مراته ماتت وهو فاضي و قرفنا بنصايحه..
احسان: من ساعه المرحومة ما اتوفت وهو وشه نور وحياته بقت هادية و ارتاح…عقبالي!
سعدات: نعم…نعم…انت بتدعي عليا …طب والنبي مانت عامل الورشة دي …
احسان: و يمين على يمينك هعملها… و لو مش عجبك مع السلامة…اهو نرتاح من النكد….و مشي إحسان على اودته وهو بيقول : ولية حيزبون …..الله يهدك!!!
سعدات بتوشوش نفسها: الراجل اتهبل في دماغه….ورشة في البيت!! ده مجنون رسمي….منك لله يا شفيق !!