في أودة أم سعيد “”
شيرين: سلامو عليكم يا ام سعيد ! انا وبابا اصرينا نجي لك عشان متزعليش من اللي حصل من شوشو… !
ام سعيد : مجيتكم على راسي من فوق..بس انا خلاص مليش عيش هنا…كفاية اوي كده…!
إحسان: ايه الكلام ده يا أم سعيد ..ده انتي واحدة مننا ….بقالك سنين عايشة في العمارة ده انتي بقيتي اقدم من السكان..!!
ام سعيد: و يا ريته طمر فيهم يا إحسان بيه…بقي انا يتقالي “انتي نسيتي نفسك !! ليه عشان انا بوابة و على قد حالي…انا ميعبنيش اني بوابة…دى شغلانة شريفة …لكن الدور والباقي على اللي عاملة نفسها بنت ذوات و لكن أخلاقها أخلاق…انا مش هغلط لاني بفهم في الأصول…!!
شيرين: شوفي يا ام سعيد…. انا مش هكذب عليكي ..انا اتكلمت مع شوشو و بالبلدي كده قلت لها لو متأسفتش انا هقاطعها… انا مرضاش بالظلم…
إحسان: عين العقل يا بنتي…و أظن أن شوشو هتراجع نفسها و أن شاء الله الامور تتصلح!! !
راضية دخلت الاودة: مسا الفل عليكم…لا يا باشا بعد اللي انا عملته فيها انهردة مش هتراجع ابدا ده قليل ما كرشتنا من هنا …بس و رحمة ابويا لا نكون لمينا عزالنا قبل ما تمشينا…
و راحت راضية حكت اللي حصل لما أحرجت شوشو ادام أصحابها و فضحتها أن عليها فلوس لمدام رجاء اللي ف العمارة و لسة مدفعتهاش …ده غير ان راضية اتفقت مع الأستاذ مخلص رئيس مجلس إدارة العمارة انهم يقولوا ل أصحابها انها مدفعتش صيانه الأسانسير…و خصوصا أن مخلص اتخانئ مع شوشو بعد ما وصفته انه راجل سمج و حشري و من ساعتها وهو مستحلف لها …
شيرين: يخرب عقلك يا راضية…انتي عملتي كل ده؟؟ !
راضية: اه بلا فخر…اللي يرش امي بالمية ارشه بالنار… !!
شيرين: والله جدعه…. !!
إحسان : ايه اللي بتقوليه ده يا شيرين ..لا طبعا الامور متتحلش كده !! لا يا راضية يا بنتي انتي غلطانه …احنا هنقعد نعاير بعض…منطق ده مش…انتي متعلمة ….و عارفة ان اسلوب الكره ده ميحلش المشاكل!! !
راضية : البادي أظلم يا باشا…مجيتكم على راسي من فوق بس كان لازم اخد حق امي !
إحسان: حق امك عندي…انا هتكلم مع شوشو …بالهداوة يا جماعة….مش كده… !!
.يلا يا شيرين على شقتك فوق…و انتي يا راضية خليكي مع والدتك …ربنا يصلح الحال يا بنتي…. !!
راضية: حقة يا مدام شيرين الف مبروك على الحمل…ربنا يقومك بالف سلامة !!
أم سعيد : يا الف نهار ابيض…انتي حبلى…لولا الملامة كنت زغرت!!!
شيرين: تسلمي يا ام سعيد …عايزة تسبينا! اومال مين اللي هيعمل السبوع و يدق الهون؟
أم سعيد: ربنا يبارك فيكي يا أصيلة… …
شيرين: طب اسيبكم دلوقتي و زي ما بابا قال لكم كل شيئ ينصلح بإذن الله تعالى
و مشيت
حقة اصلك متعرفيش سعيد عملك يامه حتت مفاجأة!راضية:
ام سعيد: خير يا بت؟ !
راضية : لا……متحاوليش ده محلفني… هو اللي يقولك بنفسه… !!
ام سعيد : يا خبر بفلوس بكرة يبقى ببلاش…
نلتقي في الحلقة القادمة إن شاء الله