في اودة أم سعيد
أم سعيد بتبكي و تقول: خلاص يا سعيد و النبي ما تعكر دمك ….ربنا ينتقم منها ست قليلة الرباية…!
سعيد: و النبي يامه لاجيب لك حقك …..بقي امي تتهان و ادام الناس!! أم سعيد: لا ونا اقول لها ميصحش كده وهي ولا يهمها اني قد امها!!:
سعيد: خلاص يامه…. انتي بتسخنيني زيادة!! !
ام سعيد: سيبنى لوحدي دلوقتي …مش عايزة اشوف حد….!!
راضية: محدش هيجيب حقك غيرى يامه …مش هي بكرة عملة عزومة و جايبة صاحباتها……انا بقي فكرت لها في حتة مغرز هيطلع من نافوخها !!…
سعيد مبتسم: النبي يا بت هتعملي ايه؟ !
راضية: لا ده كيد نسوان بقى …بس ادوني فرصتي…. ….
يلا يامة اقوم أعلق ع الشاي و روقي دمك يا حبيبتي ما عاش ولا كان اللي يزعلك يا غالية !!
و باست مامتها واخدت أخوها و طلعوا برة الاودة….
صاحبات شوشو
تاني يوم الصبح بدري في بيت مدام شوشو…
شوشو بتشرب القهوة: بقلك ايه يا أنور انت عارف انا عازمة انهردة صحاب النادي على الفطار فعايزة منك فلوس…!
أنور: كم يعني؟
شوشو: مش كتير الفين او الفين ونص احتياطي… !!
أنور وهو بيشرب القهوة شرق و قال: يا نهار …كم ! ليه وانتي فاكراني مليونير ؟؟؟
شوشو: معلش دي مرة ف السنة…كل دول مجاملني قبل كده عزايم فطار و …عشا كان لازم اعمل حاجة…منظري بقي صعب خالص..!
أنور: …فطار بالفين جنيه !!! ما كان كفاية كيك و وفنجان شاي… !
شوشو :أنت عايز تفضحني؟ !
أنور: بقلك ايه انا عفاريت الدنيا بتتنطط ف وشي ! انتي عملة العزومة دي كيدا في هالة صحبتك بعد خنأتك معاها لان كل اللي انتي عزماهم دول أصدقاء مشتركين بينكم …و طبعا عايزة تسبقي و تحكي الخناءة من وجهة نظرك عشان ياخدوا صفك!! !
شوشو: طول عمر خيالك مريض….طب ما ممكن ميصدقونيش و يسمعوا لها برده …الفكرة اني عايزة ارجع علاقتي باصحابي بقالي فترة قاطعة معاهم و مكنتش بخرج إلا مع الست هالة اللي طلعت سوقية زى زوجها و هزآتني…ياي هتفور دمي ع الصبح فين الفلوس…
أنور: مش معايا كاش…هو انا ماشي بالفين جنيه ف جيبي !
شوشو: يا نهار ابيض..طب والحل؟؟!!
أنور: انا معايا فيزا… ممكن اعدي على المحل دلوقتي و ادفع بالفيزا…و اياكي تاني مرة تعملي الفصل ده…. تطلبي مبلغ كبير من غير ما تقوليلي قبلها!
شوشو : الفين جنيه مبلغ كبير يا دكتور يا محترم؟!
انور: اديكي قلتي دكتور مش جزار ولا صنايعي بجيب فلوس م الهوا!! يلا انا اتأخرت عالجامعة… …
واخد شنطته و خرج….