مي
إحسان
كنا على قهوة المعلم شوقي … الصبي بتاعه قرفة جري يشوف الخناءة اللي على أول الشارع …و رجع يقول للاستاذ إحسان و المعلم القصري لقوا أنها بتتخانئ… و جري إحسان والقصري ولما قربوا
ومسكة الكوريك في ايدها!!
وراجل كبير واقع على الأرض غرقان في دمه!!
؟إحسان: ايه ده ….الراجل غرقان ف دمه!! ايه اللي حصل يا بنتي؟ !!
مي: راجل …بس متقولش راجل يا عمو … الحثالة ده حاول يتحرش بيا !!!
القصري: يا نهار ابوك اسود!! ….
مي: لا وكمان اكتشفت انه سكران !!
القصري: لا ده سيبهولي انا بقي!! !!
الراجل: كذابة….ولا جيت جنبها! ده انا هوديها ف ستين داهية…اه يا دماغي!!
إحسان: و هي هتتبلى عليك!! ايه اللي يخلي بنت تبطحك على دماغك ! من الباب للطاق كده؟؟ اه يا خنزير ده انت ريحتك غرقانه خمرة فعلا!!
الراجل: لا ده أنتم عصابة بقي …عملين رباطية عليا !! طب انا هكلم البوليس!!
المعلم شوقي صاحب القهوة اتدخل: لا يا روح امك …ده انا اللي هبلغ بنفسي….حوش اللي وقع منك …و وطى المعلم شوقي على الأرض و مسك حاجه في ايده شمها و رفعها وقال: شاهدين يا خونا ده حشيش…بسلامته عايز يبلغ البوليس و معاه حشيش…استلقى وعدك يا روح امك!!….ولا يا قرفة …اربطه عقبال ما اكلم البوليس!!!!
الراجل: انا ف عرضك…دي حتة حشيش بقالي شهر طالبها…
و هراضيك..
المعلم شوقي: و كمان بترشيني…يعني تهمتين …موبيل الراجل رن ورد: ايوة يا حبيبي لا انا بخير متقلقش…ثواني واكون عندك …و قفل و قال لشوقي: ده ابني اللي كان بيتكلم…كان المفروض اعدي عليه فلوس الدرس والا المدرس مش هيجي تاني…انا ف عرضك بلاش بوليس ابني لو عرف هيجرسني…يرضيك مستقبله يضيع!!
القصري يضرب كف على كف: لا إله إلا الله سيدنا محمد رسول الله…خلاص يا شوقي ربنا أمر بالستر….و الله غفور رحيم
مي: و اش درانا انه بيقول الحقيقة…ما جايز بيكذب!! ده خمورجي… و بتاع حشيش !!
الراجل: خلي حد فيكم يجي معايا لحد البيت و يتأكد!! !!
إحسان: طب يا جماعه لازم نشوف حل للدم اللي بينزف ف دماغه…يا واد يا قرفة خده على صيدلية الدكتور برزي عشان يشوف اذا كان الجرح يتلم ولا لازم غرز….و بعدين اطلع معاه عالبيت عشان نتأكد انه مش بيأفلم علينا….
القصري: متروحش معاه لوحدك يا قرفة خد معاك الواد سافو الصبي!! …ماحنا متعرفش بسلامته وراه ايه!
قرفة: تمام يا معلم…و مسك دراع الراجل و قاله: يلا يا استاذ نروح نلملم جراحك…اهي بلاوي و بتتحدف علينا!
و اخد الراجل و طلع على صيدلية د.برزي….
المعلم شوقي : يلا يا خونا…. كله يروح يشوف حاله…يلا مش عايزين لمة هنا!!
إحسان: يا مي يا بنتي… شغلانتك دي خطرة اوي لا قدر الله افرضي كان عمل فيكي حاجة وهو سكران؟!!
مي:لا يا عمو متخافش انا بلعب كاراتيه…!
القصري: كاراتيه ايه يا بنتي…تكوني فاكرة نفسك أمير كرارة!! ….عمك إحسان عنده حق..دي مش شغلانة بنات ..ايه الهم ده مالك انتي ومال الناس اللبط دي !!
مي: قلتلكم متخافوش…انا ب ١٠٠ راجل و بعدين الاوبر أمان عن تاكسي الشارع…بعد اذنكم لازم اطلع اطمن اهلي ..زمان الخبر اتذاع ف الشارع …
إحسان: في حفظ الله يا بنتي….
و طلعت مي على بيتها ، و رجع إحسان و القصري على القهوة