أنور
شوشو
في بيت شوشو
الصبح بدرى زوجها أنور يشرب القهوة في الليفنج رووم و دخلت شوشو مبوزة
انور: في ايه ع الصبح! مفيش صباح الخير!
شوشو: صباح الخير…انا بصراحة زهقت من كتر التفكير…انا مش قادرة اتقبل فكرة اني ابيع سندوتشات كبدة و سجق!!…
طب برستيجي….صحابي في النادي!!
قاطعها أنور: صحابك دول كلهم ضايعين!! مناظر على الفاضي معظمهم مفلسين و بيتأنزحوا…!
شوشو: بقلك ايه …اتكلم كويس من فضلك …يا سلام على اصحابك الأطباء ده أنتم قعدتم سنين توجعوا قلبكم مذاكرة و اللي فلح في الاخر اللي سافر برة او اللي اهله معاهم فلوس و فتحوا له مستشفى…و طبعا حضرتك من الفرع المكافح بالعافية فتحت عيادة و عندك دين للبنك و عايشين ع الفيزا…
إنور: أحمدي ربنا….غيرك محلتوش حاجة خالص…بعدين بلاش نتشتت عن الموضوع الاساسي… انا قلت رايي و مبحبش الرغي… الشغل مش عيب…. وانتي هتشاركي مرات اكبر صاحب مطاعم في البلد يعني اكيد هيساعدها…. دي فرصة و انتي قلتي انها اديتك مهلة تفكري و الفرصة مبجيش إلا مرة واحدة!
شوشو: انا برده قلت كده خايفة اتآلط ….و هي تشوف حد غيري و بعدها أندم…
أنور: خلاص انجزي و كلميها…!
شوشو : طب هفكر لحد بكرة و اقرر…
أنور: و مش عايز اسمع زن تاني ف الموضوع ده …يلا يدوبك الحق البس و اروح الجامعه
دخل أودته و بقت شوشو لوحدها قاعدة على الكنبة و بتفكر هتعمل ايه !!
—‐—————————————
تحت العمارة أم سعيد “حارسة العقار” زى ما بتحب تسمي نفسها بتشرب الشاي ادام باب العمارة، و هي بتسمع الراديو …سعيد ابنها ركن عربيته اصاد العمارة و قال:
سعيد: صباح الخير يامه!!
أم سعيد: صباح النور ….اشمعنى انهردة صاحي بدري ؟
سعيد: عندي ليكي خبر هيفرحك اوي !
ام سعيد بتشرب الشاي و تقول: اشجيني!!
سعيد: طب تدفعي كم؟ !
ام سعيد : متيلا يا واد ….و لا اقولك مش عايزة اعرف اصلا….
سعيد : خلاص بلاش اوترك اكتر من كده انا عرفك فضولية…. عارفة الدكان اللي تحت العمارة اللي مقفول بقاله بتاع ٥ سنين …بتاع عم وديع اللي كان عمله محل ورد؟!
أم سعيد : ماله؟ عمك وديع رجع من بلاد برة ! مش كان هاجر لعياله؟!
سعيد: اسم الله عليكي ايون هاجر أمريكا….و بقاله بتاع ٥ سنين هناك لحد ما انهردة لقيت بيه دخل الشارع شكله آخر الاجة…. و وعرفت انه ابن أخوه جون اللي قالي ان عم وديع تعيشي انتي….و هو جه عشان يبيع المحل بعد ما خد توكيل من ولاده !
أم سعيد اتعدلت في قعدتها و انفرجت اساريرها و قالت:
يا واد يا سعيد تقصد أننا نشتري المحل ؟
سعبد: ايون عفارم عليكي.. انتي طول عمرك نفسك تفتحي سوبر ماركت..ما كنتي ديما تقولي كده!!
أم سعيد : النبي لو حصل ل ادعي لك دعا!!
سعيد: انتي عارفة يامه أن الفلوس معايا ربنا فاتحها عليا من شغل الورشة بتاعتي ماشية زي الفل… و ياما قلت لك انا و راضية اختي سيبك من شغلة البوابة دى… لاننا مش محتاجين…. ابويا الله يرحمه عنده طين في البلد و الورشة بتاعتي شغلها نار ما شاء الله و القشية معدن…وانا بقلك اهو لو هشتري المحل ده عندي شرط…تسيبي شغلة البوابة !
ام سعيد: انت بتساومني يا واد…بتذل امك؟ !!
سعيد: لا عشت ولا كنت..بس بصراحة الكلمتين بتوعك مبقوش يأثروا فيا انا و اختي…احنا مش بوابين و مش محتاجين….. نسيب بقى الشغلانة دي للمحتاجها…يعني لو حد اتقدم لراضية أختي يجي لنا في أودة البوابة!!! …
ام سعيد سكتت و قالت: طب سبني يومين افكر…!
سعيد: لا يوم واحد… لان المحل هيطير الراجل مش هيستنانا ده في ميدان الجامع يعني قلب مصر الجديدة و الراجل مستعجل و الف من يشتريه…
ام سعيد: بلاش غلبة سبني افكر… !
سعيد : عندك ل بكرة المغرب …يلا ….سلام اروح اشوف ورشتي و اكل عيشي
أم سعيد : بالسلامة ..ربنا ينور طريقك… !
مشي سعيد ، و مسكت أم سعيد الموبايل و طلبت رقم وقالت:
الو …ايوة يا اعتدال محتاجاكي ضروري …ايه بتطبخي؟ لا سيبك من الطبيخ و حطي عليكي عباية وتعالي…. يا ولية شهلي احنا لسة في اول النهار يلا هجهزلك فنجان القهوة بتاعك بس متتأخريش …ايوة الاجتماع هيكون على مستوى الإمة….انا عارفة يختي انا بسمعهم بيقولوها في الأخبار كده …يلا مستنياكي….!
دخلت أم سعيد اودتها وجهزت سبرتاية القهوة ..و حطت الكنكة عالسبرتايةو تنحت و قالت : معقولة بعد السنين دي كلها يبقي عندي هيفر ماركت… النبي لا انافس كارفور!! !
بعد ١٠ دقايق رن انتركوم العمارة و كان صوت مي بنت الأستاذ رفعت بتقول: أم سعيد…. أم سعيد ممكن تطلعي شوية؟
أم سعيد في سرها: ده ايه الفصلان ده… تلاقيها عايزاني اطوق عربيتها….مش وقته خليها تستنى شوية بلا هم…
و مردتش أم سعيد على مي…بعد نص ساعه جت اعتدال صاحبة أم سعيد و…..
نلتقي في الحلقة القادمة إن شاء الله