شيرين
سعدات أم شيرين
لا زلنا في بيت شيرين اللي بلغت مامتها الست “سعدات” انها حامل …
سعدات بتحضن شيرين و تقول: يا الف نهار ابيض.. !
لازم اكلم ابوكي و افرحه….. و مسكت الموبايل: الو ايوة يا احسان انت فين ع القهوة!طب هات بعضك و تعالي على بيت شيرين… اصلها عملالك الكشري اللي انت بتحبه و مصممه انك تيجي
تتغدى معاها!…. طب يلا اوام….
شيرين: كشري ايه ده انا مش طبخة…!
سعدات: يا بت كان لازم اقوله كده عشان ميتخضش!!!
شيرين: طب لما اقوم الحق اعمله ..يدوبك..
سعدات مسكتها من دراعها: تعالى هنا و لا تتحركي… ده احنا ما صدقنا..اديكي مجوزة بقالك تلات سنين و كنت مرعوبة انك متحمليش!!
شيرين: مرعوبة ايه..هما عشرين سنة ….ما عادل كان بيقول مش وقته!!
سعدات: مش وقته ….ايه….. ده داخل على ٤٠ سنة…. اومال كان هيخلف و يربي امتى…في ارذل العمر…. النبي ولا بطيقه… يلا ….النصيب..المهم احنا هنبعت نجيب الكشري من برة ! !!
شيرين: ميصحش هنأكل بابا كشري م الشارع!! !!
سعدات: اسم الله…..قال يعني متعود يأكل في الاوبرج…ده طول الليل بيضرب شندوتشات كبده و مخ مع صحابه في القهوة…لما معدته ورمت
شيرين: طب اروح اكلم اعمل الاوردر من” أبو حامد؟”
و دخلت الأودة تجيب الموبايل…سعدات بصوت عالي : متنسيش،تقوليله يزود الدقة و الشطة!!
بعد حوالي نص ساعة رن جرس الباب …و سعدات فتحت
سعدات: ادخل يا احسان …. اتأخرت ليه!
احسان: اتأخرت ايه ده مسافة السكة!
سعدات: طب تعالي اقعد….
قعد احسان عالكنبة….و نادت على شيرين : تعالي يا شيري ابوكي جه…شيرين جت وباست أبوها على خده وقالت له: عندي ليك مفاجأة يا بابا !
احسان: ما امك فتنت عليكي…..عملالي كشري صح ؟
شيرين: لا حاجة احلي…!
احسان: متقليش… كمان فيه أم علي ؟
سعدات: يا راجل انت همك على بطنك!!
شيرين: انا حامل يا بابا
الاب بيحضنها: الف مبروك يا حبيبتي ….ده خبر بمليون جنيه!
سعدات: بص بقى…بعد البشرى الحلوة دي عايزة اعترف لك بحاجة؟
احسان: ايه هي حامل في توأم!
سعدات: توأم ايه يا راجل …هو يبان دلوقتي؟!!
احسان: اومال ايه؟
سعدات: بصراحة انا اديت دوري في الجمعية لبنتك عشان لقت عربية لقطة عايزة تشتريها
احسان: و ماله فداها مليون جمعية …
شيرين: بس انت كنت محتاج الفلوس عشان تفتح الورشة ؟
احسان: مش مهم يا حبيتي….الورشة تستنى….المهم انك تكوني مبسوطة
شيرين بتحضنه و تبوسه….
احسان: و جوزك فرح بالخبر ؟
شيرين: لسة مقلتلوش
احسان: معقولة….ده كلام ده…لازم تفرحيه
سعدات و هي متأففة: يعني انت متأكد انه هيفرح !
احسان: اطلعي انتي منها
احسان:..الحقوني بقي بالكشري.. حاكم انا واقع م الجوع!!
رن جرس الباب….شيرين بتوشوش مامتها: يا ماما خديه على الاودة جوه عشان ميعرفش أننا طلبنا الكشري من برة!!!!
سعدات بصوت عالي: لا ياختي خليه يعرف…و راحت فتحت الباب …..دخلت المطبخ و جابت الاطباق..احسان : الله الله كمان من أبو حامد…ده محل هايل !!
شيرين: اصل يا بابا….. بصراحة ملحقناش نعمله ف البيت…..
احشلن: احسن أنكم معملتوش… مفيش اطعم من كشري الشارع يلا يلا اقعدوا كلوا…..
و قعدوا كلهم على ترابيزة السفرة يأكلوا الكشري…
………………………………………
في اودة أم سعيد بوابة العمارة
ام سعيد: يا راضية انتي يا بت!! !!!
راضية: ايوة يامه…
أم سعيد: إلا صحيح اللي طلعت في الأسانسير تبقي ممثلة من بتوع السيما؟
راضية: ايون دي الست نيللي نسيم راقصة و ممثلة!!
أم سعيد: النبي ولا اخدت بالي …هي شكلها بنت ذوات ..الحقيقة اللي بيطلعوا لمدام شوشو كلهم هوانم بس هي يا عين امها شكلها ضاربها السلك….إلا ما في مرة غبرت ايديها و ادتنا مليم….!
راضية بصوت عالي: ليه أن شاء الله احنا شحاتين ؟
ام سعيد: لا يا عين امك.. بوابين!!!
راضية: بقلك ايه متفقعنيش…قلت لك كذا مرة نسيب شغلانة البوابة دي و نعزل؟
ام سعيد: دي الحتة اللي انا عشت فيها أكثر من ٣٠ سنة ما سيبهاش…و ريحة ابوكي في كل حتة في البيت !!
راضية: يعني عشتي في قصر محمد علي باشا يا خي!!!
أم سعيد: عايزة تمشي انتي مع السلامة….
راضية بتبرطم: نفسي اطفش …!!!
أم سعيد: بطلي برطمة …و روحي لخالتك أم حمدي في الكشك بتاعها قوليلها اني مستنياها بعد صلاة المغرب !
راضية: ايه هتشربوا شاي وقت الظهيرة!!!!
ام سعيد: يعني ايه يا بت؟ !!
راضية بتضحك: قصدي اقولك هتشربوا الشاي الساعة ٥ زى ولاد الذوات؟
ام سعيد: اه يا معدولة… شهلي… اقوم اجهز كيكة البلح عشان ناخدها مع الشاي ،
و اخدت راضية شنطتها و الموبايل و خرجت تنادي أم حمدي و….
نلتقي الحلقة القادمة بأمر الله تعالى 🥰