امتثال
نعمات
نعمات وهي بتشرب : تسلم ايديكي. اتنهدت و قالت: بعد العمر ده كله يا ربي اتهان كده!!
امتثال: بالراحة احكي لي!!!
نعمات : ده ولا الافلام العربي يا ختي….الراجل بقاله حوالي ٦ شهور بيعمل حاجات غريبة…علطول سرحان و ماسك الهباب الموبايل …وقال ايه عامل “باسمورد ” عشان محدش يفتحه…!
امتثال: اسمها باسورد!!
نعمات: هو انا عارفة بقي…لا و بقي يشتري لبس كتير و الوان كده مهزأة ده حتى ابننا هشام مش بيلبس الألوان دي…
امتثال قاطعتها: واكيد صبغ شعره!!!!
نعمات: لا اصل الموكوس قريت منها رسالة على الموبايل بتقوله “بحب الشعر الأبيض”….حبها حنش البعيدة!!!
اماثال: و عرفها منين ؟
نعمات: متعينة جديد عندهم في المصلحة
امتثال: و صغيرة!
نعمات: لا بتاعة 35 سنة !
امتثال: اتأكدتي انه اتجوزها
نعمات: ده هو اللي قاللي بعضمة لسانه
امتثال: ياما قلت لك اهتمي بنفسك طول النهار طبيخ و غسيل لما تهديتي
نعمات وهي بتبكي: بقولك ايه انا مش طايقة نفسي
امتثال أخدتها من ايديها و وفتحت لها اودة مي و قالت لها: خلاص نتكلم بعدين انا هجيب لك جلابية من عندي خشي نامي …و بعدين نتكلم !
نعمات وهي بتبكي: ناوليني مصحف هصلي و اقرأ قرآن….
امتثال: عينيا حالا هجيب لك…
و دخلت نعمات الاودة و قعدت على السرير و تنهدت و قالت : حسبي الله و نعم الوكيل…
………………………………….
قدام العمارة في ميدان الجامع، وقفت مي و أبوها بيبصوا على العربية،وكان والدها طلب سعيد الميكانيكي ابن بوابة العمارة،عشان يقولهم ازاي يضبطوا الحاجات البايظة فيها
سعيد وصل في معاده تمام
سعيد: سلامو عليكوا يا باشا !
والد مي: اهلا يا سعيد…معلش عطلناك!!
سعيد: ازاي تقول كده احنا في الخدمة!! !
والد مي: بص يا سيدي العربية موديل قديم هي حالتها صعبة شوية… عايزك تبص عليها و عايزك تخليها كأنها جديدة!!!
سعيد: عينيا يا باشا بس اشمعني!! ده انت راكنها بقالك فترة حتى انا طلبت منك اشتريها و سيادتك موافقتش!!
والد مي: كل شئ باوانه يا سعيد…ربك لما يريد…
سعيد: و نعم بالله….
مي : و هتخلصها امتى؟ يومين مثلا!
سعيد: لا يا آنسة يومين ايه …ده انا فالورشة عندي شغل للركب..بعدين بلا قافية دي موديلها قديم ولسة هندور على قطع غيارها
مي وهو مكشرة: يعني ايه!!! انا مستعجلة أوي!! !!
والد مي: متكهربيش الراجل….عايزينه يشتغل بمزاج…
سعيد: لو سيادتك مزنوق في عربية نأجر لك واحدة…بس هتبقى حراقة حبتين…
مي: لا انا عايزة عربيتي اللي هاصلحها اصلي ناوية……
قاطعها والدها: مش وقته يا مي …اسطى سعيد مش فاضي مش عايزين نعطله…!
سعيد: تمام يا باشا…. اديني المفاتيح احسن وربنا في ٣ زباين مستنيني في الورشة !
والد مي اداله مفتاح العربية وقاله: الف شكر
مشي سعيد بعد ما ركب العربية و مي ووالدها طلعوا بيتهم.
…………………………………………..
في بيت الدكتور أنور و شوشو
شوشو
دكتور أنور
👇🏽
أنور قاعد في اودة المعيشة و بيشرب القهوة …دخلت شوشو عليه
شوشو: هاي أنور!!
أنور: اهلا ….يعني محكتيش ايه الاخبار…هالة صحبتك وافقت تشاركك؟؟!
شوشو و هي مكشرة: يعني لما افتكرت…بقالك يومين ترجع من الكلية و تنام وتصحى تروح العيادة و بتشوفني متقوليش إلا كلمتين “مساء الخير…فين الغدا؟” !!
ولما بتيجي من العيادة بتكون خلصان!!!
أنور: يعني عارفة اني هلكان… و عارفة كمان اني مبحبش الرغي!!
شوشو: عادتك ولا هتشتريها…المهم…هي وافقت بس عايزانا نغير نوعية الاكل… !
أنور: مش فاهم!! !
شوشو: يبقي سندوتشات زي محلات جوزها..!
أنور وهو مبتسم: طيب هايل…
شوشو مستغربة: انت بتتريأ ؟
أنور: لا طبعا مبسوط…ده راجل مليونير و عمل فلوسه كلها من التجارة دي يبقى أكيد هينوبنا من الحب جانب!
شوشو: هينوبنا…انت بتجمع ليه!! مش قلت مش هتدفع مليم في المشروع ده؟ !
أنور : بتكلم مجازا
شوشو: لا توضح بعد كده و عامة انا لسة مقررتش….ده ورثي من ابويا…يعني محلتيش غيره
أنور: اتكلي على الله …
شوشو هي بتوشوش نفسها: طبعا انت دافع حاجة من جيبك….!
أنور خلص قهوته و طبطب على كتفها و هو بيقول: اروح اخطف لي ساعة انام قبل معاد العيادة !
شوشو فضلت في الليفنج رووم لوحدها قعدت على الكنبة وهي بتفكر و بتكلم نفسها و تقول: بس يا ربي مفيش حاجة اشيك من الكبدة و الكفتة دي…مش قادرة اصدق…بلدي اوي….صاحباتي يقولوا عليا ايه!!