حوار من تأليفي ⚘بين علوية جميل و ملك الجمل
–يسعد مساكي يا ست علوية!!
– مالك يا ملك شكل مزاجك مش ولا بد؟
–و الله الواحد بيشوف حاجات اليومين دول تشيب…. سميرة بنتي، انتي عارفة دخلت الجامعة في اسكندرية و قال يا ستي مصرة تقعد في السكن الجامعي و متقعدش عند اختي “روحية” مانتي عارفة عايشة في محطة الرمل ….طب ده كلام يا علوية!! يكون بيت خالتها موجود و تروح تقعد لوحدها!! مع شابات و الله اعلم طيش الشباب يوديهم فين…يا حفيظ انا قلبي مش مطاوعني….محدش في العيلة ابدا قعد في سكن جامعي قبل كده !! يا لطيف…ده كان خالها اكل وشي!!
علوية: بردون يا ملك … مجراش حاجة البنت طالبة جامعية و عايزة تستقل و تشعر بحريتها…. بعدين ده سكن جامعي يعني اكيد فيه مشرفين و فيه نظام و مراقبة؟
ملك: طب ليه وجع القلب و بيت خالتها موجود!!
علوية: مش اختك دي اللي قولتيلي عليها قبل كده ان طبعها صعب شوية!
ملك: اه هي شديدة حبتين في مواعيد الأكل والنوم والخروج. ….بس وماله دي أصول التربية! اومال نسيب الحبل على الغارب؟؟
علوية: متأخذنيش ده جو صعب و بنتك سميرة حقها تعيش حياتها ما دام مراعية الأصول و عمرها ما خرجت عن حدود اللياقة والأدب!! سميرة شابة عاقلة متخافيش عليها !!
ملك: جيل اليومين دول صعب و دماغه ناشفة يلا اديني هطوعها و اشوف …بس و النبي أن عرفت ان تقديراتها في الجامعة مش ولا بد لأجرها لبيت خالتها بالعافية!!
علوية: مفيش حاجة هتحصل و هتجيب درجات زي الفل…اشربي قهوتك قبل ما تبرد…و سيبيها على الله …
ملك: تسلمي يا علوية طول عمرك تعرفي تهديني ربنا يريح بالك !!!
الحوار