كاريمان: بونجور عمته…..دادا شوقية قالت لي انك عاوزاني…
علوية هانم “مكشرة” ….قالت : اتفضلي اقعدي….فطرتي !
كاريمان: لا قلت ل دادا بدي بس فنجان شاي حضرتك عارفة مش عايزة اخسر جسمي….
علوية هانم: انا قلت قبل كده وجبة الإفطار دي اهم وجبة….يا دادا….يا دادا
دادا: ايوة يا هانم !!
علوية هانم: حضري الفطار للهانم الصغيرة…كرواسون و زبدة و مربي و توست …. و متنسيش عصير برتقال فريش !!
كاريمان : مش هقدر يا عمته…اصل ….
علوية هانم قاطعتها: ولا كلمه ….اتفضلي يا دادا !!
دادا: دقايق و اجيب الفطار!!
علوية التفتت ل كاريمان: الموضوع اللي كنت عايزاكي فيه بخصوص العشا اللي حضرتيه معايا امبارح في سراية سنية هانم!!
كاريمان : العشا كان جنان…..و انا ممنونة اوى انك اخدتيني معاكي !! الحقيقة مراد ابنها بيرقص تحفة …عارفة حضرتك انه درس مسرح في فرنسا ؟
علوية هانم: مش ده موضوعنا….انا بتكلم بخصوص الحوار اللي دار بينك و بين سنية هانم وقت العشا !!
كاريمان : مش فاهمه….ممكن حضرتك توضحي!!
علوية هانم : لما سنية هانم اتكلمت عن شابات اليومين دول انهم متحررين جدا في اللبس و الخروج…. و حضرتك قلت لها ” عمرك ما هتفهمينا …. أنتم جيل رجعي!!!
كاريمان: ده رايي و انا pardon حرة فيه !!
علوية هانم: عبري عن رأيك انتي حرة….بس بأسلوب مهذب و لائق …نبرة صوتك كانت عالية ….و الأسلوب مش مقبول!!
كاريمان متأففة: مخدتش بالي الحقيقة !!
علوية: عشان كده بلفت نظرك….انا بعلمك الأصول!!
كاريمان: هي سنية هانم زعلت!!
علوية هانم: انا صلحت الموقف طبعا….فهمتها انك متقصديش وانك لسة راجعة من أوروبا فوخداكي الحماسة …الست مشكورة لم تبد اي استياء…لكن ده لا يمنع انك تخطيتي حدود الذوق و اللياقة !!
كاريمان ابتدت تاكل التوست بالمربي وقالت : داكور عمته هبقي اخد بالي ….yummmmiiiiiii التوست و المربى جنان !!
علوية هانم: انا لسة مخصاتش كلامي!!
كاريمان متأففة : بردون اتفضلي….
علوية هانم : حجزت لك تذكرة ل حفلة bal masquee في النادي الدبلوماسي بمناسبة عيد الربيع ….و كمان هتروح معاكي ثرية بنت عمك ماهر باشا !!
كاريمان مكشرة : ثرية !!!! طب ما حضرتك عارفة انها انطوائية …ولا بترضى ترقص و لا تتحرك من مكانها !! ماخد شريفة صحبتي احسن!!
علوية هانم: انا قلت ثرية هي اللي هتروح معاكي….بنت عمك معندهاش أصدقاء ….و أبوها اتكلم معايا انه بده يخليها تحتك بالناس !!
كاريمان : و ملقتوش غيري اللي تحتك بي !!
و بصوت واطي قالت : “ده ايه الغلب ده!!
علوية هانم: بتقولي ايه ….سمعيني!!
كاريمان بابتسامة مصطنعة: ابدا عمته بقول Avec plaîsir qu ‘est que je dois Fais
علوية هانم: انا بلغتك بموعد الحفلة عشان تجهزي الcostume و طبعا تراعي انه يكون حشمة و غير متكلف!!
كاريمان: دي حفلة تنكرية يعني حاجة fun!! هتنكر في ايه ….مُحضر في محكمة!!!
علوية هانم : حسني ألفاظك….fun بس مش مسخرة!!
كاريمان بتتنهد : حاضر فيه حاجة تاني !!
علوية هانم مسكت نضارتها وقالت : لا اتفضلي كملي فطارك….و نادت: يا دادا….هاتي جرايد انهردة و اعملي فنجان قهوة مضبوط…دادا جابت الجرايد …
علوية هانم لبست النضارة وفتحت الجورنال و قالت : بنات آخر زمن !!!
ملحوظة: الحوار من خيال المؤلف، و لا يمت للواقع بصلة، إنما هو استحضار لذكريات الزمن الجميل