حوار من خيالي
في حب الزمن الجميل..
سليمان بك : صباح الفل يا باشا !
زكي باشا : صباح الورد يا سليمان..اتفضل انا لسة مفطرتش….. حماتك بتحبك!!
سليمان بيضحك: الحمدلله انا عازب زي جنابك…نفدنا بجلدنا….بالهنا والشفا انا بس هاخد معاك الشاي !!
زكي: لا معنديش الكلام ده ..ده كرواسون و زبدة ومربي…اقعد يلا بسم الله …. يا إدريس جهز السفرة….
على ترابيزة السفرة
سليمان: انا جاي انهردة و عشمي في كرمك يا باشا…
زكي: اتفضل يا سليمان انت اكثر من أخ !!
سليمان: ربنا يديم المعروف ….الحقيقة جارك اللي ف السرايا اللي جنبك عوض باشا القرنفلي بعتني اتوسط بينكم!!
الباشا اخد رشفة من الشاي وقال : عوض باشا صديق عزيز لكن يؤسفني اني اقولك ان ابنه إنسان غير مهذب…انت عارف التفاصيل ؟
سليمان : عوض باشا أعطاني نبذة ….ان ابنه اتكلم بأسلوب غير لائق مع جنابك…
زكي: لا يا سليمان ابنه متكلمش معايا انا بأسلوب غير مهذب ده تطاول على علم ياقوت الجنايني….جنابه لما عم ياقوت شافه ركن الاوتومبيل بتاعه اصاد باب السرايه طلب منه ركنها بعيد عشان لو انا عايز اخرج بالاتومبيل بتاعي…. يقوم الشاب المستهتر ده يتطاول على عم ياقوت… و يقوله: ماليش كلام معاك كلامي مع أسيادك….اخص..هي دي تربية ولاد الناس…
سليمان بك: لا يصح طبعا شاب غير مهذب فعلا !!
زكي: يا سليمان عم ياقوت ده عشرة عمر …راجل كبير في السن وعمر ما تطلع منه العيبه …يقوم الراجل يتهزأ على آخر الزمن…عامة الشاب جه يستسمحني انا قلت له انت غلطت في عم ياقوت يبقي واجب تعتذر له….الشاب رفض وقالي بمنتهى البجاحة: “لا ….انا معتذرش للجنانيني!! ” و انا أصريت…. لكنه رفض فطلبت منه الانصراف…
سليمان: ابوه طلب مني يحدد موعد مع جنابك عشان هو وابنه يجوا لحد عندك ….و يطيبوا خاطر عم ياقوت…ده لو انت توافق !
زكي: طبعا يا سليمان اهلا وسهلا بيهم في اي وقت ….انت عارف ان بيتي مفتوح للكل…
سليمان : ده العشم برده يا باشا….طول عمرك ابو الواجب!!
زكي: إلا بالحق يا سليمان….طمني على نجيب الريحاني انا اخر مرة زرته مكنش مزاجه عال…..
سليمان: والله يا باشا نجيب مريض ….و بيتاقل على نفسه المرسح عشقه انت عارف…و الطبيب طلب منه الراحة ولكنه عنيد… ف ده اثر على صحته !!
زكي: و ده كلام….كله الا الصحة….لا يا سليمان لازم تتكلم معاه….
سليمان : بحاول يا باشا والله….يلا استئذن انت عارف من ساعة ما تم تعييني مدير لدار الأوبرا المصرية ….و انا ملخوم …دعواتك يا باشا !!
زكي : تأكد يا سليمان ان مجييك اليوم وسط انشغالك بتأكد لي انك انسان محترم، و صديق يندر وجوده في هذا الزمان
سليمان: ده انت أعز الحبايب….و لازم تشرفنا مرة في دار الأوبرا…
زكي : ضروري ربنا يوفقك ….
سليمان: نهارك سعيد
زكي : سعيدة مبارك
الحوار
#بقلمي_مروة_الحمدي