ماري: انا بدي أعرف صوتكم جايب آخر الأستوديو ليه …جرى ايه يا ست وداد انتي و اسماعيل كل يوم تتناقروا كده!!
وداد بعصبية: احضرينا يا ست ماري !!!
ماري: النبي الست ماري جالها الضغط منكم أنتم الجوز….ها اشجيني!
وداد : من قيمة جمعه…. قلت ل سمعه أن واحدة صحبتي عملة حفلة عشان بنتها عقبال املتك اخدت الاعدادية… و اترجتني أن سمعة يجي الحفلة، و يقدم مونولوج ….و سمعه وافق….يجي انهردة يوم معاد الحفلة …يقولي حصل لي ظروف !!
سمعه: ما لسانك اللي عايز قطعه مش مديني فرصة اشرح السبب … يا ستي اديني فرصة اتكلم…
وداد: مش محتاجة شرح….انت قاصد تجرحني ادام صحبتي باينه زي الشمس !!
ماري: ايه يا وداد الكلام ده….متخليه يتكلم انتي يا بت علطول ملخفنه كده….ايه بتجري ورا مترليوز….. انبطي خلينا نسمع ….
سمعه : شايفة الناس العاقله….بقي الاصة يا ست ماري اني فعلا وافقت لكن الفجر امبارح ياسين ابني سخن وجريت بيه على الاستباليا…. انا و فوزية مراتي….و الحكيم طلب انه يرتاح و نعمل له كمادات ….و المشكله ان فوزية اصلا تعبانه لأنها لسة عملة عملية المرارة…فمقدرشي اسيبها مع ياسين لوحدها….
وداد بحزن: ألف بعد الشر….يقطعني…انا آسفة يا خويا ….حقك عليا …العيبة ركباني من ساسي لراسي…. يا رب يقوموا بألف سلامة ….
ماري: شفتي بقي انه طلع معذور ….ألف سلامة يا ابو ياسين طب خدني معاك اشقر على الولد….و فوزية…. و أطبخ لهم و أراعيهم….
سمعه: تسلمي يا ست ماري …أنا جيت بس ابلغ وداد إني مش هقدر أحضر حفلة صديقتها …. بس الحمدلله اتفقت مع شكوكو يروح مكاني…و كثر ألف خيره وافق ….
ماري: أصيل…. ربنا يبارك لك….و شكوكو ابن بلد و أبو الواجب …
و بصت ل وداد و قالت : كده مرضية يا وداد !!
وداد بحزن: أنا وشي منكم ف الأرض يا ست ماري…النبي ما حد هيشوف طلبات أم ياسين غيري ….
سمعه : الف شكر يا وداد…لو احتجت لك هكلمك !!
وداد : متزعلش مني ياخويا مانت عارفني زي المدب….
سمعه: اه يا ختي عارف …. عامه شكوكو أخد مني العنوان و رقم التلافون… سعيدة بقي عشان الحق اروح للواد و أمه!!
ماري: مع ألف سلامة ….و متنساش تسلم على أم ياسين
سمعه : يوصل ….سعيدة مبارك !!
الحوار
#بقلمي_مروة_الحمدي
#حواديت_مروة_الحمدي
ملحوظة: الحوار من خيال المؤلف، و لا يمت للواقع بصلة، إنما هو استحضار لعبق الزمن الجميل