صورة بعدسة المصورة Salma Abdelfattah
الحوار من تأليفي ⚘
في بيت الحاجة فاطمة….
الحاجة في اودة القعاد و حفيدتها إسراء بتبص من الشباك
الحاجة من جوة بصوت عالي: يا إسراء….بت يا أسراء …..أنتي يا بت !
إسراء: ايوة يا تيته….انا في ادوتك….
الحاجة: و بتنيلي ايه عندك ؟
إسراء: واقفة في الشباك …..بشوف لو ماما جت ولا لأ….
الحاجة: لسة يا بنتى…. الساعة مجتش ٣ !
إسراء: اصلها وعدتني تجيب لي معها جراب للموبايل بتاعي فيه نجوم زي بتاع شهد جارتنا !
الحاجة: قوطع الموبين….. هو انتي و اخوكي هتفلحوا طول مانتوا ماسكينه ٢٤ ساعه !
إسراء: يووووووووه بقي!! نفس الكلمتين بتوع كل يوم ….و قلت لك اسمة موبيل مش موبين….
الحاجة: طب يا لمضة ….تعالي خرطي الملوخية عشان نلحق نسقطها ف الشوربة قبل ما امك تيجي….يا عين أمها بتكون واقعة من الجوع…. شقيانة…..حسبنا الله و نعم الوكيل ف ابوكي الجبان اللي طلقها و سلت ايديه من مصاريفكم…..
إسراء: يوووووه انتي ملكيش الا السيرة دي…. و قلت لك قبل كده متكلميش على بابايا وحش…والا هقول ل ماما و هي اكدت عليكي برده متغلطيش فيه…..
الحجة: و انا مالي….اصطفلوا مع بعض……تعالي عشان تخرطي الملوخية….
اسراء: ما خرطتها .. و غطيتها بطبق عندك ف المطبخ…. و كمان فصصت التوم…..
الحاجة: ياختي ان شالله يخليكي….ست البنات ….اخر طلب بقي يا سوسو !
اسراء متأففة: قولي….. نعم !
الحاجة: معندناش عيش ….و نسيت اقول ل امك تعدي ع الفرن و هي راجعة…. انزلي هاتي خمس ارغفة….
إسراء: ماشي….. بس بشرط…..تديني خمسة جنية اجيب شيبسي و لبان من عم بسيوني…..
الحاجة: يا ضلالية…. هما ٢ جنيه بس!
إسراء: لا خمسة….. و الا هقول ل ماما انك بتاكلي بسبوسة من عند جارتنا أم سمر لما هي بتروح الشغل….
الحجة: انتي هتذليني يا بت….دي كانت مرة واحدة الولية جت تشرب الشاي معايا …..وجابت لي خرطة بسبوسة هي عملاها…….فيه ايه !
إسراء: لا مش مرة ….. دول ٣ مرات ……بقالها ٣ ايام بتيجي و كل يوم تجيب معاها…. وانتي عندك السكر….شوفي بقي ماما هتعمل ايه !!
الحجة مرتبكة: خلاص يا حبيبتي هديكي ٣ جنيه و ده اخر كلام…..
إسراء: ماشي هعديها بس المرة دي….
الحجة بصوت واطي بتقول ل نفسها” بت ضلالية زي ابوها….”
إسراء: فيه حاجة يا تيته….
الحجة : لا يا قلبي…… ده بدعيلك انتي و ابوكي
الحوار