بعد ماقضوا 3 يام في اسكندرية رجعت الحاجة فتافيت السكر و نعمات و مي القاهرة ..
وفي بيت الحاجة فتافيت السكر…
نعمات : والله يا خالتي كانوا كم يوم حلوين خصوصا لما روحنا زنقة الستات …البنت مي دي ما شاء الله عليها ودتني دكاكين جميلة اشتريت منها لوازم حاجة الاكسسوار بتاعتي ….الحمدلله الصفحة اللي مي عملتهالي على الانسجرام المتابعين فيها بيزيدوا… والاوردرات مش ملاحقين عليها ….
الحاجة: ربنا يكرمك يا نعمات…انتي طيبة وبتسعي عشان كده ربنا ان شاء الله هيجازيكي خير على تعبك…
نعمات: احساس اول مبلغ قبضته من شغلي احساس ميتوصفش…
ولسة انا عندي افكار كتيرة بس شدي حيلك معايا..مطلوب مننا شغل اكرامية وانتي شاطرة فيها…
الحاجة:ايدي بايدك وان شاء الله نعمل شغل جميل …
الباب خبط ودخلت مي
مي: اما انا نمت نوم بعد ما رجعنا من اسكندرية..عقبال ما فضيت الشنطة ورتبت دولابي كنت هلكت….يا خالته انا جت لي فكرة ايه رايك تعملي لشيرين حاجة للبيبي من شغل الكروشيه…شيرين بتحب اوى الحاجة الهاند ميد ..
نعمات : والله فكرة بس هحتاجكم تساعدوني …. اصل انا عندي طلبات زباين كتير ..مش انتي يا مي بتعرفي كروشيه …
مي : اه بس على قدي ….
الحاجة : طيب ايه رايكم نقول شوشو تشتغل معانا..هي قالت لي انها شاطرة في الكروشيه…
مي : متاكدة يا تيته …
نعمات: ما بلاها شوشو.. وخلينا احنا بس مع بعض!
الحاجة: يا نعمات البنية جبت لنا هدايا عشان تعتذر عن الموقف اللي حصل…خلينا احنا من العافين عن الناس …انا بحسها وحيدة خصوصا ان شيرين صحبتها مش على وفاق معها …
مي : انا موافقاكي يا تيتة…انا هكلم شوشو واضبط معاها المعاد اللي يناسبها عشان تجي تشتغل معانا …بس يا تري نعمل ايه…اه كوفرتة هي اكيد هتحتاج كوفرتة للبيبي… يبقي كدة انا وانتي وخالته نعمات ….وشوشو… طب ايه رأيكم !!نقول لميريت صاحبة شيرين….ميريت لذيذة ومش تقليدية اكيد هتحب تشترك معانا ..
نعمات : وماله ابعتي قوليلها…كده ممكن نعمل كوفرتة كبيرة ونبدع فيها ما دام عددنا كبير….اهم حاجة نتفق على معاد مرتين في الاسبوع عشان نلحق نخلص قبل معاد ولادة شيرين ….
مي : انا هعمل جروب على الواتس اب وندخل فيه كلنا عشان نضبط مواعيدنا مع بعض…ونسميه …نسميه اه جت لي فكرة …شيرين هتسمي البيبي مريم…نسميه كوفرتة مريم …لا مرمر …كوفرتة مرمر!!
نعمات : مرمر أو فرفر المهم اوعي تدبسوني في الموضوع لوحدي انا عندي اوردرات كتير…
مي :لا تقلقي…انا همشي دلوقتي لان عندي طلبات اوبر كتير ….وبينا واتس اب على الجروب الجديد!!
على قهوة المعلم شوقي
احسان : حمدالله على السلامة يا شفيق والله القهوة كانت مظلمة من غيرك!!
شفيق : ده نورك..والله كانوا كم يوم انما حلوين …اهو غيرت جو
احسان: ويا ترى شفت الجماعه هناك؟
شفيق :تقصد مين ؟
احسان : مي وخالتها …
شفيق: اه روحنا يوم اتغدينا سمك مع بعض …مي بنت مكافحة وجميلة والست نعمات ست كومال…قوية و حكت لي عن شغل الكروشيه بتاعها وازاي بقى عندها زباين…بقيت تصرف على نفسها من عرق جبينها بعدما الراجل الخسيس ما طلقها!!
احسان: ايوة بقى غدا على البحر في اسكندرية والجو منعش وانت والست نعمات شكلكم قعدتوا تفضفضوا لبعض…
شفيق: يا راجل..هو انا في سني ده بتاع الكلام ده..
احسان بيضحك: وماله بس انا شايفاك جي مورد ومزاجك حلو!!
شقيث : قر بقى..المهم ايه اخبار شغل الورشة عندك …
احسان: الحمدلله جبت كل الادوات …والقصرى كثر خيره ابتدي يشوف لي زياين..اهو اشتغل على قدي ف الاول…لحدا ما ربنا يبعت..
شفيق. ومراتك بطلت تشتكي ؟
احسان : ولا بقت تفتح بؤها من ساعة ما قلت لها لو مش عجبك اخرجي برة البيت ..اهي ربنا هداها وهي مشغولة بحمل شيرين وكتير بتروح تبات عندها!
شفيق: طب تمام الحمدلله….ربنا يقومها بالسلامة !
في مجلة السعادة ….
ميريت على مكتبها بتشتغل!!! جت لها مسج على الواتس اب
فتحتها لقيته أنور بيقول: ايه رايك اعدي عليكي نتغدى مع بعض؟
لاول مرة ميريت متفرحش بالواتس اب بتاعه….بعد اخر مرة لما كلمها رسمي ادام مراته وبعد ما عرفت ان مراته رجعت البيت …وبعد كلامها مع شيرين الامور كلها بدأت توضح..ولاول مرة تحس انه مش مجرد استلطاف من ناحيته…وفكرت هو بيشوفها ازاي..يعني هو عارف انها متجوزة لما يلاقيها بتستجيب له بالشكل ده ..ده معناه ايه…انها ست سهلة!!
ميريت في ثواني استرجعت المواقف اللي جمعتهم مع بعض ومسكت الموبايل وكتبت : اهلا يا دكتور …الحقيقة انا مش فاضية عندي كذا اجتماع انهاردة !!
انور رد: حظى وحش يا هانم…
ميريت محبتش الكلمة اللى كانت بتسعدها قبل كده وحست ان زي ما تكون الغشاوة اتشالت من على عينبيها …و رمت الموبايل على المكتب… وكملت شغلها!!
مي عملت جروب على الواتس اب باسم كوفرتة مرمر وضمت له نعمات وشوشو و ميريت ….
ميريت و شوشو رحبوا بالفكرة وبالفعل اتقابلوا في بيت الحاجة فتافيت السكر عشان يبتدوا شغل كروشيه كوفرتة مريم بنت شيرين….
في بيت الحاجة فتافيت السكر
نعمات ومي و شوشو وميريت قاعدين كلهم في الليفنج رووم
ونعمات وزعت عليهم شغل الكروشيه …و فهمت كل واحدة تشتغل ازاي ميريت كانت حساسة من ناحية شوشو بس لما ابتدوا يكلموا مع بعض حست انها مش انسانه وحشة ….
كلهم ماسكين ابر الكروشية وشتلات الخيوط ادامهم … الحاجة عملت لهم قهوة و التلفزيون شغال ……..
نعمات: متطفي يا خالتي التلفزيون انا صدعت …
الحاجة: لا مقدرش انا متابعه المسلسل عشان خاطرك بس ممكن اوطي الصوت!!
نعمات : اما يا بنات….انا عندى شغل واوردات كتير …والله ما عارفة الحق اخلصها امتى…
شوشو: على فكرة يا طنط… انا قلت لصحباتي في النادي على صفحتك..و بداوا بيعتولك اوردرات ..
نعمات: ان شاء الله يخليكي..فعلا جالي كم طلب من طرفك…
مي : ايه رايك يا خالته نشوف حد يساعدك!
نعمات: انا فكرت في كدة بس خفت يكون تكلفة عليا انا لسة بردو في الاول …
مي :لا احنا نشوف حد هاوى ونديله مرتب صغير ..ايه رايك نسأل راضية دي بنت بلد وجدعة وصاحباتها كتير …
نعمات : راضية جدعه ..وانا واثقة انها مش هتتاخر عليا…هي متعاطفة معايا وهي اللي بتروح بنفسها تشترى لي شوية لوازم لما اطلب منها!
حوار جانبي بين شوشو و ميريت :
شوشو: مقلتليش ولادك سن كم !
ميريت: عندي حسن و زين…اوله ثانوى وثانوية عامه..
شوشو:ربنا يخلي..ما شاء الله مش باين عليكي خالص..انا عندي شريف في تانية جامعه….
ميريت: ربنا يخليهولك…وحضرتك بتشتغلي!
شوشو: لا و لما فكرت اعمل مشروع حلواني مع واحدة صحبتي الامور ممشيتش…
ميريت: حلواني..طب فكرة حلوة….انتي بتحبي عمل الحلويات ؟
شوشو: انا شاطرة فيها وخصوصا لما جوزى كان بيدرس في امريكا اخدت كورسات في عمل الحلويات والجاتوه …
ميريت: طب ايه اللي وقف المشروع ؟
شوشو: انا وصاحبتي اختلفنا …
ميريت : حتي و لو….اعمليه انتي لوحدك…
شوشو: طب والمكان والتكلفة!!
ميريت: المكان ممكن تشتغلي من البيت …دلوقتي فيه ستات كتير بتعمل اكل بيتي وتسوقه على السوشيال ميديا ….انا شخصيا عملت انترفيوهات مع ستات كتير عملوا المشروع ده وبقي عندهم متابعين بالالاف..لا ده كمان بقوا يستضيفوهم في التلفزيون …
شوشو: انا بصراحة مفكرتش اني اشتغل من البيت…طب وهينفع…طب التكلفة ؟
ميريت: في الاول اشتغلي في حاجات بسيطة و خليه على قد معارفك وصحابك….
شوشو: مش عارفة …تفتكرى اقدر لوحدي ؟؟
نعمات سمعت الحوار بينهم وقالت: ممكن تسعمي رايي ولا تقول عليا حشرية؟
شوشو: لا ابدا ….احب اسمع راي حضرتك..
نعمات : شوفي يا ستي ….انا لما جوزى طلقني ….كان عارف ان معنديش دخل ولا حد يصرف عليا و كان عايز يبعت لي مبلغ شهري بس انا رفضت واعتمدت على نفسي…كل الناس قالوا اني مش هقدر اكمني مش خريجة جامعه بس انا مستسلمتش…وقلت انا هعمل كروشيه واكسب من عرق جبيني وفعلا اشتغلت على قدي في الاول…ومي عملت لي الامستكرام واهو ربنا كرمني واديكي شايفة ما شاء الله مش ملاحقة عالشغل!!
شوشو: انتي والله حمستيني…
نعمات : قوى قلبك واسعي وارمي حمولك على الله…..ربنا بيحب العبد اللي بيسعى…و متخليش حد يحبطك …زي ما قالت ميريت اشتغلي على قدك في الاول واحنا كلنا هنكون زباينك….جربي علينا يا ستى… شوشو عينيها دمعت وقالت: انا اسفة يا طنط نعمات!!
نعمات: اسفة!!
شوشو: ايوة عشان مكنتش شايفة حضرتك كويس …قد ايه حضرتك بنت بلد وجميلة …
نعمات طبطبت على كتفها وقالت:وانا كمان… بس يا ستي كله خير …واحنا ولاد انهاردة….
مي: انا ممكن اساعد حضرتك يا طنط شوشو…مستعدة اوصل لك الطلبات للزباين !!
شوشو : حبيتي يا مي ميرسي اوى
ميريت: انا بقي ممكن اخليكي تتواصلي مع الستات اللي عملت معاهم انترفيوهات و يقولولك شوية نصايح تساعدك في الاول …
شوشو: انا مش عارفة اقولكم ايه….ربنا بيحيني انه خلاني وسط ناس قلوبهم صافية زيكم …ده حتى جوزي اللي عشت معاه سنين قالي انه
مالوش دعوة باي مشروع هعمله….
نعمات: اعتمدي على نفسك …الرجالة كلهم كده….
ميريت ابتدت تشوف الامور بشكل اوضح …يعني انور اللي معاشر مراته سنين مش سند ليها …يعني هو مش مثالي زي ما ميريت كانت شيفاه
طبعا ما هو راجل!! يعني طبيعي بيقى لطيف مع الناس بس سخيف مع مراته !!
شوشو : انا ان شاء الله هفكر في الموضوع واشوف هعمل ايه ؟
نعمات : مفيش تفكير خير البر عاجله ….كفاية اللي عدى من عمرنا….انتي طبعا شاطرة في ابصر ايه اللي اسمه امسجرام دلوقتي اعملي صفحة واتكلي على الله ….
مي :طب يا خالته خليها تفكر !!
ميريت: انا رايي زي طنط نعمات…خير البر عاجله ..وقالت ل شوشو:فكري بس في اسم الصفحة عايزين اسم مميز!!
شوشو : ايه رايكم Chez Shosho
نعمات: النبي عربي …هو احنا خواجات!! عايزين حاجة الناس كلها تفهمها …
مي: ايه رأيكم نسميه فتافيت السكر …
الحاجة بتضحك: هتسموه على اسمي !!
شوشو : أما فكرة !!
ميريت : الله يا مي …اسم رائع …
نعمات : يلا يا شوشو…. سيبي الكروشيه دلوقتي …وافتحي موبايلك واعملي صفحتك على الامسجرام فتافيت السكر !
شوشو مسكت الموبايل و فتحت الانستقرام و عملت اكونت باسم فتافيت السكر !!
في بيت أنور و شوشو…
انور بيتكلم مع شريف ابنه ….
انور : انت مش حاسس انا مامتك متغيرة اليومين دول !!
شريف: ازاي ؟
انور : علطول قاعدة في المطبخ…. وبتصور الكيك والجاتوه اللي بتعمله!!
شريف: اه ..اصلها عملت انستجرام وهتعرض عليه شغلها !!
انور: شغلها؟
شريف : اه… ما ماما قررت تعمل جاتوه وتبيعه على صفحتها…
انور: غريبة…مامتك هتعمل كده…دي مش شخصيتها !!
شريف: لا ما هي اليومين دول بتروح بيت تيتة فتافيت السكر وبتقابل طنط نعمات ومي …وقالت لي ان هما اللي اقترحوا عليها الفكرة..
أنور: ماما بتروح بيت الحاجة معقولة…دي مكنتش مستلطفاهم …سبحان مغيرالحوال ..
شريف : خليها يا بابا تجرب….احنا مالنا ..
انور : لا انا مش مضايق بس المهم اي حاجة تخليها مشغولة احسن ما
تقعد تناكف فيا ….وانا قلت لها قبل كده مش هدفع ولا مليم!!
شوشو سمعته و دخلت الليفنج رووم وقالت:
متقلقش يا دكتور…مش عايزة منك حاجة!!
أنور: عامة ربنا يوفقك…بس انتي عارفة ان الموضوع ده مش سهل اصله عايز…
شوشو قاطعته: انت قلت مالكش دعوة بيقي افضل تخلي نصايحك لنفسك…ميرسي انا عارفة انا بعمل ايه!!
انور : وانا مالي…اروح بقي البس عشان الحق معاد العيادة !!
شوشو : على فكرة …انت كنت سايب موبايلك في الليفنج وفيه مسج كتير جت لك عليه الفجر….
انور مرتبك: اه ..جيت امبارح هلكان ورحت انام ونسيته ….شوشو اديته الموبايل وهي بتبتسم !!
انور: فيه حاجة!
شوشو: لا مفيش يا دكتور !!
في بيت الاستاذ احسان
جوة اودة النجارة الاستاذ احسات بينشر خشب وجنبه الاستاذ شفيق
شفيق : بقولك ايه …ما تبطل دق شوية…انا صدعت!!
احسان بيضحك : من عينيا …عشان خاطرك بس ولو أن مطلوب منى اصلح ترابيزة واحد جارنا كان طلبها….
شفيق: واخبار الشغل ايه؟
احسان: رضا الحمدلله …اهو شيرين بنتي عملت لي صفحة على الفيسبوك وهي اللي بتابعه …اصلي انا مفهمش في البتاع ده..
شفيق: الحمدلله ان الحال ماشي …ده انت دلوقتي مبقتش تنزل القهوةو القصري كمان مشغول في الدراي كلين بتاعه….وانا بقيت علطول زهقان
احسان : طب وابنك…
شفيق قاطعه: مش عايز اتقل على حد ..كفاية عليه شغله ومراته اللي طلباتها مش بتخلص….اهو دلوقتي بيجيب لي عياله مرة في الاسبوع اذاكر لهم عربي…وحياتك ابتديت معاهم من الصفر بس بعد كم شهر ما شاء الله بقوا هايلين ….ده حتى حفيدي بيقولي تعالى درس لنا يا جدو!!
احسان سكت وبعدين قال: والله فكرةّّ!!
شفيق :فكرة ايه…؟
احسان : انت طول عمرك بتقولي انك بتحب تدرس لاحفادك عربي…
شفيق: اه مانا خريج حقوق وياما كتبت مسودات قضايا و مذكرات قانونية…
احسان: بيقى تسمع كلام حفيدك وتدرس عربي !
شفيق : انت بتقول ايه …في سني ده اروح اشتغل مدرس في مدرسة؟
احسان: لا مش في مدرسة…تدي دروس خصوصية في البيت …واهو تتسلى وبردة قرش يساعد في المعيشة..
شفيق سكت وقال: يا راجل هو انا حمل دوشة العيال …ده بعد ما احفادي بيمشوا بكون صدعت ..
احسان : خلاص بلاش تدرس للسن الصغير ..ممكن تدي دروس لطلبة في ثانوى او اعدادي ..
شفيق : وانا دول هجيبهم منين !!
احسان: هو فيه اكثر من العيال اللي عايزة دروس.. دول زي الهم على القلب…حتتنا بس لو انتشر فيها الخبر و ربنا ما هتلاحق!!
شفيق سكت وقال : ادي دروس…عمري ما فكرت فيها..لا لا دي مسئولية …وصحتي هتستحمل وانا في السن ده ؟
احسان: هو ايه كل شوية تقول السن …السن ..طب مانا ادامك بينا سنتين وبشتغل بايديا واهو القصري اكبر مننا وواقف على رجليه في الدراى كلين بتاعه …يا راجل بلاها كسل بقى…اتكل على الله وياسيدي بلاش تدرس لعدد كبير في الاول… اهو كم طالب عقبال ما تحس انك اتمكنت من المناهج..
شفيق : والله افكر…طب وهننشر الخبر ازاي ؟
احسان: نعلق ورقة في القهوة و الواد قرفة ده رويتر هينشر الخبر…كمان ممكن اخلي بنتي شيرين تعمل لك صفحة على الفيسبوك زى ما عملت لي…
شفيق: وكمان فيسبوك!! يا عم انا مش بفهم في البتاع ده…
احسان: مانا كنت كده بس شيرين فهمتني…انت ممكن تخلي حتي احفادك يعملوه..ده العيال دلوقتي عفاريت…وممكن يزودولك المتابعين
شفيق بيكلم نفسه: معقولة …معقولة اشتغل تاني ….
في بيت الحاجة فتافيت السكر في اودة القعاد
شوشو و ميريت و مي ونعمات كلهم بيشتغلوا كروشيه في كوفرتة بنت شيرين…الحاجة دخلت بالشاي
شوشو : انا جبت لكم تورتة شيكولاته من صنع ايديا ..يا رب تعجبكم..
نعمات: تسلم ايدك…شفتي بقي اهو كم اسبوع عدوا وعدد المتابعين زاد و مي بتقولي ما شاء الله جبت لك زباين كتير ..
شوشو: الحمدلله يا طنط…بصراحة انا كنت مرعوبة في الاول بس لما الطلبات بدات تيجي ثقتي بنفسي زادت…و كمان ميريت مشكورة خلتني اتواصل مع كذا حد ونصايحهم فادتني جدا
ميريت: انتي بس كان ناقصك الحماس …هي الدفعة الاولانية !!
شوشو: انا كمان حسة اني اتغيرت…ده حتى النادي اللي كنت كل يوم فيه مبقتش اروحوه واكتشفت ان يومي نفسه اتغير…
مبقتش اهتم بالمظاهر الفارغة زي زمان …مركزة بس في شغلي و طلبات البيت ….اصلا معنديش وقت افكر في حاجة تانية …
الحاجة: ربنا يسعدك حبيبتي ويخلي لك جوزك انور وابنك…
شوشو بصوت حزين : انور ده حدوتة لوحده!
ميريت ارتبكت لما سمعت اسم انور لكن كملت شغل كروشيه وهي ساكتة…
نعمات: فيه ايه يا شوشو انتم اتخانئتم تاني !
شوشو: انا مبقاش ليا صحاب من ساعة خناقتي مع صاحبات النادي وانتم دلوقتي اقرب ناس ليا ..
الحاجة: فضفضي يا حبيبتي…شكلك شايلة جواكي …
شوشو: الحقيقة انا بقالي فترة براقب واتس اب انور …
ميريت ارتبكت وابرة الكروشيه وقعت من ايدها …وقلبها دق بسرعة
شوشو: بسلامته بقى عنده مواضيع رومانسية ..
نعمات :تقصدي على علاقة بحد !
شوشو: مش حد واحد بس يا طنط …ده يظهر الراجل اتجنن..كل شوية اقرا مسج شكل… ومرة يقولها يا جميلة وواحده تانية يا هانم….
ميريت سمعت كلمت هانم واترعبت لتكون شوشو عرفت ان انور كان بيقولها لميريت !!
نعمات: وعرفتي مين دول…يعني يعرفها من الشغل ولا منين؟
شوشو: اللي اكتشفته انهم كذا واحدة بس هو مكنش كتب الاسامي يعني مش مسجل الاسم الحقيقى ..يعني نمرة باسم نادي الاطباء ولا النقابة طبعا ده عشان يخفي الاسم الحقيقي والا ينكشف
ميريت اخدت نفسها وقالت لنفسها: الحمدلله يعني مكنش مسجل اسمي والا كانت عرفت اننا خرجنا مع بعض …الحمدلله يا رب …
شوشو: بس انا فهمته ان انا عارفة…لانه نسي الموبايل امبارح في الليفنج وفهم طبعا اني قريت المسج…و دي كانت بنت بيدرس لها في الجامعه…لانها بتقوله اقابلك في الجامعه …
نعمات: بنت بيدرس لها ..اخص…ده الرجالة انهبلت..زي المخفي جوزي اللي اتجوز واحدة من دور عياله…
شوشو بتكمل كلامها: لاو واحده يقولها نتغدي مع بعض…في مطعم بيعمل استيك هايل ….وانا هطلب لك انا عارف ذوقك….
ميريت اتسمرت في مكانها …ده نفس الكلام اللي كان بيقوله لها انور بالضبط…
نعمات : بقولك ايه ….متخربيش على نفسك …ركزى في شغلك وابنك ولا تواجهيه…
مي :معقولة يا خالته..انتي اللي بتقولي كده!!
نعمات : يا مي… انور ما دام بيشاغل كذا واحدة يبقى عنده فراغ ..ملل دي اللي بيسموها ازمة منتصف العمر…
شوشو: برافو عليكي يا طنط..انا فعلا اتكلمت مع اخصائية نفسية وقالت لي كده…
نعمات :انا جوزي مر بنفس التجربة وانا عملت نفسي مش عارفة…طول ما هما كذا واحدة يبقى متقلقيش…بس لما يعيش قصة مع واحدة بس هنا تخافي …
شوشو: انا ياما شفت منه رغم انه يبان ادام الناس قمة في الذوق بس له وش تاني !!!
ميريت حست الدنيا بتلف بيها و سابت ابرة الكروشيه وقالت: استئذن انا لان زمان ولادي رجعوا من الدرس..
نعمات: مع السلامه حبيبتي…نتقابل بكرة …معلش هنكثف الشغل الايام الجاية لان خلاص مي فاضل لها اسبوعين على الولادة..
ميريت مشيت وركبت العربية وكلام شوشو بيرن في دماغها وخصوصا جملة “انور ده له وش تاني “!!!
على قهوة المعلم شوقي
احسان : ايه الاخبار يا شفشق …انت مختفي اليومين دول ..
شفيق مبتسم: والله انا مش عارف اشكرك ازاي..من ساعه ما قلت لي على فكرة التدريس وانا دماغي تضرب تقلب..ومكنتش مصدق ان ممكن يجي لي طلبة فعلا…
احسان :قلت لك اشتغل على خفيف في الاول ..
شفيق : ده اللي انا عملته ..كمان جارنا ابنه في كلية الحقوق كان جه عندي البيت يصور ورق.. انت عارف ان عندي مكنة طباعه في البيت المهم …لما قريت الورق اتناقشت مع الولد …لقيته مستغرب اني بشرح له بمنتهى السلاسة …لدرجة انه قرر يجي لي اشرح له كم مادة بيدرسها في كلية الحقوق..
القصري: الله اكبر ايوة بقي ..شفت لما سعيت ازاي ربنا كرمك…
شفيق: الف حمد وشكر ليك يا رب…ده انا اليوم كان بيعدي عليا بالعافية وانا زهقان من قعدة القهوة و الفرجة على المسلسلات…اما دلوقتي انا ما بين تحضير الدروس وتنظيم مواعيد الولاد…والله انا بقيت بحط راسي على المخدة اروح في النوم في ثانية..
احسان: اومال…ده الشغل نعمة كبيرة الحمدلله اننا بصحتنا وقادرين نعافر…
القصري:والله يا شفيق انا فرحان بيك اوى
إحسان: تسلم يا معلم فاكر لما من كم شهر اتخانقنا لما قلت لي روح اشتغل بدل قعدتك دي!!
القصري بيضحك: ميبقاش قلبك اسود بقي !!
شفيق: سبحان الله رغم ان كلمتك دي زعلتنا بس كانت حقيقة ….المهم انا كان بدي اكلم معاكوا في موضوع تاني …
احسان : خير ؟
شفيق: مع حياتي الجديدة دي حسيت اني شباب وروحي اتردت لي بس فيه حاجة ناقصة….
القصري: حاجة ايه ؟
شفيق :محتاج ونس ….حد افضفض معاه يعمل لي لقمة سخنة…نشرب الشاي مع بعض …حد ياخد بحسي
القصري بيضحك: عايز تتاهل وتخش دنيا ؟
شفيق: والله ولا عيب ولا حرام …
القصري: يا ترى مين العروسة؟ايكش تكون بنت صغيرة!!
احسان بيضحك:لا يا سيدي مش بنت صغيرة دي ست كومال وانا عارفها..مانا كان قلبي حاسس…
شفيق مبتسم :ايوة يا احسان الست نعمات…
القصري مستغرب : معقولة….
في بيت ميريت ..
ميريت رجعت انهاردة من الشغل و دخلت اودتها وحاولت تنام لكن معرفتش…افكار كتيرة متداخلة …راجعت شريط احداث الشهور الاخيرة وازاي قابلت أنور صدفة ادام الاسانسير لما شيرين اغمي عليها وهو اللي نجدها…بعدين لما خرجوا مع بعض كذا مرة…استغربت انها قد ايه كانت ساذجة…ومبهورة بكلامه خصوصا بعد ما مراته شوشو حكت لها انه بيعاكس ستات و بيقولهم نفس الكلام اللي كان بيقوله لميريت…
كأن فيه غشاوة واتشالت من على عينيها….وفكرت في كلام شيرين لما قالت لها انها لازم تصلح علاقتها بجوزها….لازم تتكلم معاه وتقوله انها تعبت من شيل المسئولية لوحدها…لان فعلا الفراغ اللي هي حسة بيه هو اللي خلاها تتشد لحد زى انور…
ميريت شكرت ربنا انه الهمها الصح في الوقت المناسب خصوصا لما انور بعت لها واتس اب يطلب الخروج معها وهي اعتذرت…فرحت بنفسها اوى!!
لان الموضوع كله من الاول كان غلط…والمواضيع اللي بتبتدي بشكل يزعل ربنا لازم تنتنهي بشكل يزعلك!!
ميريت اتنهدت بعد ما استرجعت الاحداث دي كلها وقالت الحمدلله وغمضت عينيها وراحت في النوم!
في بيت الحاجة فتافتيت السكر
ميريت و شوشو ونعمات قاعدين في الليفنج رووم …دخلت الحاجة بصينية الشاي …..
نعمات : الحمدلله تسلم ايديكم يا بنات اهي الكوفرتة اخيرا خلصت !!
شوشو مبتسمة: والله انا استمتعت بالقعدة معاكم …وكنت بستنى اليوم اللي نتقابل فيه…..القعدة دي هفتقدها اوي …
ميريت: انا كمان …كانت القعدة دي بستناها كل اسبوع… كنت بفضفض معاكم واحنا بنشتغل الكروشيه وكأني بحكي كل همومي معاكم….
مي :طب ليه منفضلش نتقابل بردة حتى لو خلصنا الكوفرته…ما بيت تيته اهو موجود …
نعمات : انا اكتر منكم كنت بستني معاد مقابلتنا بفارغ الصبر …وموافقة يا مي حددوا يوم في الاسبوع نتقابل كلنا ..
ميريت :انا موافقة…
شوشو: وانا جدا !!
مي : طب انا مش همسح جروب الواتس اب وهخليه زي ما هو !!!
كوفرتة مرمر !
شوشو: على فكرة شيرين حست اننا بنتقابل وانا طبعا استعبطت وحاولت اغير الموضوع !
ميريت : عامه هي قالت لي ان ادامها اسبوع على الولادة يعني هانت وبعد كده نقدم لها الهدية و نضمها لواتس اب كوفرتة مرمر!
في بيت الاستاذ رفعت
رفعت : مساء الخير …بلغتي نعمات اختك اني عاوز اتكلم معاها..
امثال: اه بلغتها …هو فيه ايه…صادق طليقها حاول يتصل بيك ؟
رفعت: لا لا ولو اتصل مش هرد عليه..
امتثال: اومال عايزها في ايه!
رفعت :لما هي تيجي هتعرفي!!
الباب خبط و نعمات دخلت ..
رفعت :اهلا يا نعمات….بقي من ساعه ما نقلتي لبيت الحاجة واحنا مش بنشوفك!
نعمات: متاخذنيش مشغولة في اوردرات الشغل بتاعي والله مش ملاحقة …
مي دخلت عليهم: الله اكبر يا خالته متحسديش نفسك !
رفعت: ما شاء الله …ربنا يبارك لك انتي ست اصيله وجدعه وربنا هيكتب لك الخير مع حد يقدرك..
نعمات مستغربة: اوعي تكون بتتكلم انى ارجع تاني للمخفي صادق؟
رفعت: لا لا مش صادق…بس الكلام على حد تاني ..
امتثال: حد تاني مين…انت قصدك يه !!
رفعت: انهاردة الاستاذ شفيق جارنا كلمني عشان يطلب ايدك!
نعمات : انت بتتكلم جد …انا ….استاذ شفيق …تقصد ايه ؟
رفعت: زي مانتي سمعتي ..
امتثال: انت جرى لعقلك حاجه يا رفعت..انت عايزها تجوز في السن ده …دي تبقى فضيحة !!!
نعمات ساكته و مش بتتكلم…
مي فرحانه: والله انا قلبي كان حاسس ونطت حضنت نعمات وقالت :الف مبروك يا خالتو ….
امتثال:بس يا بنت …انتي موافقة يا نعمات؟طب وولادك يقولوا ايه ! والناس !!
رفعت: بقولك ايه متدخليش انتي …سبيني مع نعمات نتكلم براحتنا..واعملي لنا قهوة
امتثال بتضرب كف على كف وراحت المطبخ
رفعت: خشي يا مي اودتك عشان اتكلم مع خالتك ..
مي: ليه يا بابا هو انا صغيرة ..
رفعت:اسمعي الكلام …
مي دخلت اودتها ..
ورفعت بص ل نعمات وقالها: ايه رأيك ؟
نعمات: انا مش هقدر انكر اني مستغربة….مخضوضة معقول بعد العمر ده اتجوز!
رفعت: هو لا عيب ولا حرام …ده شرع الله …انتي ايه رايك في شفيق؟
نعمات : انا شايفاه راجل محترم …مخلص لذكرى مراته…وربي ابنه احسن تربية بس…
رفعت: بس ايه ؟
نعمات: متاخذنيش انا مش عارفة افكر …
رفعت: عامه انا هسيبك يومين تفكري…بس لو عن نفسي انا جار شفيق من 30 سنة فعلا مراته كانت ست اصيله وهو وفي لذكراها وعمرنا ما سمعنا لهم حس وابنه دكتور متربي ومهذب …رايي شفيق راجل محترم وابن حلال بس برده انتي صاحبة القرار ..ومن فضلك متخليش حد يأثر عليكي….الجواز ولا هو عيب ولا حرام….
نعمات بتكلم نفسها: معقولة …انا اتجوز …انا و الاستاذ شفيق !!!
عدى اسبوع و شيرين ولدت وكل الجيران راحوا السبوع عشان يحتفلوا بالمولوده الجديدة مريم….البيت كله زينه وبالونات….صوت الموسقي عالي على اغنية حلقاتك برجلاتك ….الكل فرحان واولاد كثيرة بتلعب بالبالونات…
نعمات: الف مبروك يا حبيتي… يا رب تشوفيها احلى عروسة…
الحاجة: وسعولي انا اللي هدق الهون !
ام سعيد :اومال انا رحت فين يا حاجة: يلا ناولوني المنخل !!
نعمات بترغرط…..ومي بتوزع الشمع على الاطفال الموجودين و راضية بتوزع علب الملبس…..وشيرين شايلة البيبي و بتضحك والحاجة بتقول: اسمعى كلام امك ما تسمعيش كلام ابوكي !!
عادل بيضحك: بقي هو كده …
احسان: الف مبروك يا جوز بنتي …تعيش وتشوفها احلى عروسة
سعدات: يا رب يحميها و بتزغرط …
ميريت بتصور بموبايلها الحفلة وبتساعد راضية في توزيع الملبس !!!
الباب خبط …دخلت شوشو و أنور …
ميريت ارتبكت شوية بعدين حاولت تبان طبيعية….وانور قالها:مساء الخير
ردت بشكل رسمي : اهلا دكتور …
وبصت لشوشو وابتسمت وسلمت عليها
انور استغرب جدا …انهم يعرفوا بعض …..
لسة السبوع شغال وكله مبسوط وبيحتفل بالبيبي مريم….جه وقت البوفيه كله توجه للبوفيه ….
الباب خبط دخل الاستاذ شفيق
شفيق: السلام عليكم جميعا ..
نعمات ارتبكت وخصوصا لما جه يسلم عليها ..
ردت مكسوفة: اهلا سي شفيق…اتفضل حماتك بتحبك….ولا تحب اعمل لك انا طبق؟
مي بتوشوشها: ايه الرومانسية دي يا نعناعه..
نعمات:بس يا بنت !!!
شفيق: لا انا الاول عايزك يا ست نعمات في كلمتين …
نعمات وشها احمر وسكتت…
شفيق: لو ميضايقكيش طبعا..نتكلم في التراس عشان الدوشة ..
مي بصوت واطي: يلا يا خالته…يلا متكسفيش …
نعمات فعلا دخلت التراس….
السبوع لسة شغال…صوت موسيقي في المكان…وزحمة وناس كتير تقريبا كل جيران العمارة….
شوشو راحت سلمت على راضية ….راضية استغربت جدا …لان من وقت خناقتهم مفيش كلام بينهم ….
بعد كده شوشو وقفت في وسط الليفنج رووم وقالت:لو سمحت يا جماعه انا عايزة اقول حاجة…
الكل سكت و بص ناحية شوشو …
شوشو: انا عايزة اعتذر لام سعيد لاني غلطت فيها …واتمنى انها تقبل اعتذاري ….
ام سعيد استغربت جدا لدرجة انها ملقيتش كلام تقوله ….
راضية ابتسمت وقالت: حصل خير يا مدام شوشو ما دام اعتذرتي يبقي المسامح كريم..
احسان: انا كنت متاكد يا شوشو انك بنت اصول …كده عداكي العيب يا بنتي …صافية لبن يا ام سعيد ؟
ام سعيد: تسلمي يا ست شوشو …انتي زي بنتي برده والمسامح كريم
الحاجة فتافيت السكر: الحمدلله ..ربنا يهدي سركم ويبعد عنكم الشيطان ..
عادل: يلا يا جماعه..مش عايزين جو دراما يلا شغلو المزيكا….
في التراس نعمات وشفيق قاعدين وبيتكلموا ….
شفيق:اظن الاستاذ رفعت بلغك طلبي…
نعمات: ايوه
شفيق: وايه راي جنابك …
نعمات : في الاول اتخضيت من الفكرة بس؟
شفيق:بس ايه …عايز بس اقول حاجة…انا والمرحومه عشنا اربعين سنه كلهم حب و مودة…وابني الوحيد متجوز ومشغول بشغله وولاده…وانا طلعت على المعاش وبقالي شهور بدي دروس خصوصية للولاد!!
نعمات: الف مبروك…معرفش انك اشتغلت..
شفيق: اهي حاجة بقضي فيها وقتي و يجي لي منها قرشين يسندوا جنب المعاش …
نعمات : ربنا يقويك …
شفيق: انا شايف اننا ظروفنا زي بعض….وهنكون ونس لبعض خصوصا ان ولادنا بقالهم حياتهم …يبقي احنا بقى نلحق اللي باقي من عمرنا …
نعمات:انت راجل محترم و رفعت جوز اختي بيقول انك عشرة سنين ومعروف عنك السمعه الطيبة…بس انا بدى وقت افكر…
شفيق: يا ستي خدي اسبوع بحاله…
نعمات:لا اسبوع ايه!! اكثر شوية…برده انا لازمن ابعت اقول لولادي المسافرين…وشوف رايهم ايه ..
شفيق: طب لو موافقوش!!
نعمات: ولادي عايزين مصلحتي وعارفين ان ابوهم ظلمني و ما اظنش اني لو وافقت ممكن يقولوا حاجة..ده غير يا سي شفيق اني انفصلت من تسع شهور…بردك مدة قصيرة اوى فخلينا ناخد وقتنا ونفكر احنا مش صغيرين …
شفيق :لا يا ستي صغيرين و ف عز شبابنا!!
نعمات بتضحك …شفيق :طب بلي ريقي وقولي لي انك موافقة بس على المبدا…
نعمات: اه موافقة يا سي شفيق.. بس زي ما اتفقنا اخد وقتي !!
شفيق: وانا موافق….تعالي بقي اعمل لي طبق جاتوه احسن انا واقع من الجوع
نعمات :عينيا يا اخويا !!
احنا لسة في السبوع المزيكا شغالة والكل بيضحك وفرحان…
ميريت بصوت عالي: يا جماعه دلوقتي عايزين نقدم الكادو ل شيرين
يلا يا شيري افتحي العلبة ….
شيرين فتحت العلبة ولقيت كوفرتة كروشيه كبيرة بالوان زاهية ومكتوب عليها مرمر ….وكارت كبير فيه اسماء شوشو و ميريت والحاجة ونعمات ومي …شيرين عينيها دمعت وقالت:اما كوفرتة روعه… جميلة جدا …مش مصدقة عملتوها امتي….
شوشو: عشان كده يا ستي كنا بنتقابل في بيت الحاجة…عشان كنتى فاكرانه مطنشينك …
شيرين: ايوه بقى… كده فهمت سر لمتكم عند تيته فتافيت السكر….
نعمات: ودلوقتي يا شيرين بنبلغك ان ان شاءالله كل اسبوع نتقابل في بيت الحاجة عشان نفضفض ونتكلم ونضحك ونهيص ….
مي : وحالا يا ستى هضيفك على الواتس اب جروب …..
شيرين :والجروب اسمه ايه ؟
مي : مرمر …كوفرتة مرمر ….
شوشو:كوفرتة مرمر هي اللي لمتنا على بعض …وقربتنا من بعض …
ميريت: وخلتنا نشوف بعض من جوة مش من برة بس…
مي:اهلا بيكي يا شيري في جروب كوفرتة مرمر !!
شيرين بتبتسم وقالت:الله اسم جميل …انا كمان هنضم ليكم في كوفرتة مرمر !!
النهاية