على قهوة المعلم شوقي ….القهوة زحمة و صوت رزعة قشاط الطاولة و دوشة الزباين معبأ المكان
دخل المعلم القصري و قعد على الترابيزة وقال :واد يا قرفة هات لي واحد شاي بالنعناع !
قرفة: اهلا يا معلم ده لسة الأستاذ إحسان كان بيسأل عليك!
القصري: اومال هو فين لسة كنت هكلمه على المحمول؟
قرفة: لما لقاك اتأخرت راح يجيب طلبات للجماعة من السوبر ماركت و بيقولك مش هيتأخر
القصري: طب روح هات الشاي انت عقبال ما اطمن على ابني !!
قرفة: إلا هو عامل ايه دلوقتي ؟؟
القصري: الحمدلله احسن بس ايكش يبطل المخدرات
قرفة: ربنا يعافيه …. وعندك واحد شاي سكر زيادة للمعلم القصري !!
راضية
في بيت أم سعيد
ام سعيد : يا راضية…انتي يا بت بقالي ساعة بنادي!!
راضية : خير يامه…كنت قعدة في الاودة…
ام سعيد: انتي لسة زعلانه عشان خناقتك مع اخوكي؟
راضية: انا بصراحة اتخنقت لدرجة اني بفكر اوافق على العريس اللي متقدم لي ؟
ام سعيد : تقصدي حمدي زميلك في الشغل؟
راضية:اه ده المحاسب بتاع المحل ؟ هو طيب بس عايزني اقعد مع امه ؟
ام سعيد : وانا قلت لك الكلام ده مينفعش…مش هترتاحي لازم يكون لك بيت لوحدك..
راضية : انا بصراحة مش مقتنعه لانه كمان عصبي زي سعيد اخويا يعني ههرب من تحكم سعيد لنار سي حمدي..
ام سعيد : انتي لسة صغيرة..وياما هيجي لك عرسان…مش عشان اخوكي اتخانق معاكي تروحى توافقي على اي عريس..
راضية : عامه انا هاخد وقت افكر…
ام سعيد : طب يلا اعملي لي قهوة و بقولك ابقي رني للحاجة فتافيت السكر شوفي لو تقدر تيجي تشرب معايا القهوة … هي والست نعمات… دول الناس السكرة اللي عملين للعمارة حس!!
راضية: حاضر يا ستي هرن عليها…مانا بقيت السكرتيرة بتاعتك!
نعمات و الحاجة فتافيت السكر و مي قرروا يطلعوا اسكندرية بالقطر، يقضوا كم يوم …و بالصدفة الأستاذ شفيق كان مسافر في نفس اليوم، ركبوا كلهم القطر مع بعض
اول ما دخلوا القطر طلبوا شاي و الست نعمات طلعت سندوتشات بيتي، و الحاجة فتافيت السكر كانت مجهزة ترمس الشاي و النعناع الأخضر “الورور” على رأيها، اللي هى زرعاه في البلكونة….
مي شاركتهم الاكل وبعد ما شربت الشاي راحت في النوم …
الحاجة: يا عيني يا بنتي هلكانة.. طبعا طول النهار دايرة في الشوارع بالاوتر
نعمات: اسمه إوبر يا خالتي احفظيها بقي
الحاجة: و انا عارفة ليه المرمطة دي شابة زى الورد طول النهار تسرح بتاكسي…. انا مش راضية اتكلم عشان هي متزعلش…
نعمات: لا متتكلميش…لانها كبيرة وعارفة هي بتعمل ايه مش احسن من قعدة العواطلية اهي بتشغل وقتها و تجيب قرش.. خلي عضمها ينشف
شفيق: يسلم لسانك يا ست نعمات… ده انا من ساعة ما طلعت على المعاش وانا مش طايق نفسي… اهو ابني اتجوز و مشغول في حياته و القهوة هي تسليتي الوحيدة…و مركبنيش المرض إلا لما مت من الزهق…اللهم اني استغفرك و اتوب إليك!
نعمات: طب و متشتغلش ليه وانت لسة بصحتك ….انا شخصيا بعد ما المخفي خلصت منه و اتطلقت فكرت اني اشتغل و قررت اعمل اكسسوار و مي تحطهولي على اللي على الموبيل ده أبصر الابليكيشن اللي بينزل صور الانستفرام!!
شغيق: والله برافو عليكي ده انتي ست جدعه ….كان ممكن تستسلمي و تزهقي زيي
نعمات: طول ما فيا حيل و واقفة على رجلي مش هخلي حد يصرف عليا انا عندي اسم الله شابين في الخليج متجوزين و مخلفين
و واحد فيهم طلب منى اروح اعيش معاه
بس انا رفضت
ابدا…انا مسيبش بلدي ولا اهلي و هصرف على نفسي مقبلتش انهم حتى يبعتولي فلوس… حد الله ….
شفيق بنظرة اعجاب: انتي مش متخيلة ادي ايه انا فرحان بيكي يا ست نعمات!! ايه عزة النفس دي!!
نعمات وشها احمر و اتكسفت و عملت نفسها بتطلع السندوتشات من الشنطة و مدت ايدها و قالت: طب اتفضل احسن الكلام هياخدنا ده سندوتش كفته بالطحينة دوق و قولي رأيك!!
شفيق: ما دام انتي اللي عملته يبقي اكيد طعم
نعمات وشها احمر تاني و خصوصا ان مي كانت قعدة جنبها و حطة الجاكيت على راسها…مي رفعت الجاكيت و بصوت واطي قالت ل نعمات : اموت انا في الكلام الشاعري ده يا نعناعة…..نعمات بصوت واطي : اتلمي يا بت!!
مي بضحكة خبيثة: النبي ايه…..بقي انا اللي اتلم…..
الحاجة صبت الشاي بالنعناع و الكل بيستمتع السندوتشات و الشاي لحد ما جه الكمسري وقال : استعدوا…. داخلين على محطة الرمل …حمدالله على السلامه