راضية
أم سعيد
الباب خبط …راضيه فتحت لقيت الأستاذ إحسان
راضية: اهلا يا بيه …اتفضل
إحسان: شكرا يا بنتي….الف مبروك على الشقة يا رب تكون عتبة خير عليكم..انا بس اصلي بضرب الجرس على بيت شيرين محدش رد بعدين هي كانت كلمت مامتها وقالت لها انها تعبانه…و مامتها سبقتني عندها بس محدش بيرد…انا قلقان!!
ام سعيد من جوة: اهلا و سهلا يا بيه…لا متخافش هما بس في اودة الست شيرين وقفلين الباب عليهم و التكييف شغال فتلاقيهم مسمعوش الجرس…. اصلي لسة كنت عندهم من قيمة نص ساعه !
إحسان: ربنا يطمنك…طب انا هروح القهوة عشان اسيب شيرين ترتاح….و ابقي اكلم مامتها على الموبايل اطمن….بس ايكش ترد….اكمنها علطول رمياه في شنطتها….يلا سلامو عليكم
راضيه مع السلامه يا بيه ……
راضية قفلت الباب و رجعت الصالة
أم سعيد: راجل قلبه طيب بارك لنا ع الشقة مش زى المخفي السماوى الاستاذ مخلص !!الاستاذ احسان ده أمير بس مراته حيزبون…. علطول متألطة….اومال لو كانت حلوة!! ده هو احلي منها !!
راضية: جرى ايه يامه….انتي هتبصبصي للراجل !! و تقري على مراته!
أم سعيد: كتك نيلة….ابص لمين يا بت ده انا في ارذل العمر ..المهم كلمتي اخوكي في موضوع السوبر ماركت!!
راضيه: اه بس قالي بالراحة عليا لان عنده مصاريف كتير…اهو احنا يدوبك لسة موضبين الشقة!!
ام سعيد: ده شكل الموضوع هيطول؟؟ولا احسن عشان العين ده احنا سكنا في شقة اخوكي رجليه انكسرت اومال لما السوبرماركو يشتغل !!
راضية: متتبطي يامه….ده احنا لسة موضبناش الشقة كلها….و ناقصنا حاجات….
ام سعيد: ناقصنا ايه ما فرشنا؟
راضية: لا لسة الديكور و اللمسات بتاعتي عايزة اروح اشتري كم اباجورة و كم اية قرآنيه نعلقهم عشان نخزى العين ….عشان الناس سو اللي مستكترة علينا النعمة…
ام سعيد : في دي عندك حق….طب متنسيش وانتي جاية من الشغل تجيبي معاكي بخور !
راضية : حاضر عينيا ………
في بيت الحاجة فتافيت السكر
مي: ازيك يا خالتو والله بعد ما سبتي البيت…بقي دمه تقيل…
نعمات: يا بت مانتي عندنا كل يوم…أخبار شغلك ايه ؟
مي: تمام…بس مش عارفة ليه ماما ضاربة بوز شبرين…تخيلي عديت عليها في الشغل… قبل ما ادخل بعتت مسج على الموبايل تقولي اياكي تقولي ادام زمايلي انك اشتغلتي سواقة…
نعمات: ليه ايكش يكونوا هوانم…. دول كلهم يقطعوا القلب الحزين! يا حسرة هما دكاترة الحكومة مرتبهم قد ايه !!
مي: هي قصدها عشان برستيجها ادام الناس….
نعمات: امك طول عمرها كده….يهمها المظاهر الفارغة دي دخلت كليه الطب عشان الناس تقولها يا دكتورة و تتآلط عليهم …سيبك.. أخبار السخام ايه قصدي البتاع اللي اسمه سوكريم…
مي: قلت له انستجرام…… هتفضحينا !!
نعمات : عملتي الحساب !
مي: اسمه الاكونت…اه عملته و سميته:”إبرة و خيط “
ايه رأيك؟
نعمات: مكنتي تختاري اسم بالانجليزي اهو منظر !!
مي: لا الموضة كله بيسمي بالعربي…المهم انتي جبتي الحاجة؟
نعمات: كله السطة… و هنبتدي انا و تيتك فتافيت السكر نشتغل من انهردة…
مي: برافو وانا عملت لك دعاية بعت اصحابي على كل جروبات الواتس اب وكمان الفيس و انستا ….يلا بقي هنشوف يكون عندك كم فولور!!
نعمات: مين ورور ده يا بت ؟
مي: متابع يا خالته…احفظي بقي !!
نعمات: لا ده انا لهلوبة و اعجبك ..خدي موبايلي و افتحيلي الصفحة و انا هشير عليها …مش هو زي الفيس توك!
مي: فيس توك مسمعكيش مارك كان تنحى…امري لله تعالي جنبي عشان اعلمك افتحي الانستجرام ازاي …
نعملت جرت كرسي و قعدت جنبها و قالت: يلا يا ستي
I am all ears
طلع المعلم القصري و الأستاذ شفيق على بيت المعلم ياقة المكوجي بعد ما عرفوا انه عيان…
خبطوا الباب مرات المعلم ياقة الست وردة فتحت : يا اهلا وسهلا …
القصري: يا رب يا ساتر !!
شفيق: ازي المعلم دلوقتي ؟
الست وردة: الحمدلله الضاكتور قال ضغطه عالى عشان فيه حاجة زعلته!!
القصري و هو مرتبك: الف بعد الشر عليه اتفضلي طبق بسبوسة و كنافة للعيال
وردة: و ليه بس التعب ده…دقيقة أبلغه أنكم هنا
القصري لشفيق بصوت واطي: انا خايف ميرضاش يقابلني!!
شفيق: ايه الكلام ده…دي مش أخلاق ياقة طول عمره يعرف الأصول!
الست وردة جت: اتفضلوا…
القصري دخل الاودة: الف حمدالله على السلامه…
ياقة: اهلا وسهلا متأخذونيش مش قادر اقوم!!
شفيق: خليك مستريح…احنا بس جايين نطمن عليك
ياقة: الشاي يا ام حامد
القصري: لا احنا ماشيين علطول!!
ياقة: لا والله ما يحصل !!
القصري: انا جاي و عشمان في كرمك تسامحني…. انا من يوميها مبنامش حقك عليا ….و باسه في رأسه …
شفيق: عداك العيب يا قصري….ها يا ياقة صافية لبن ؟
ياقة: احنا اخوات يا معلم
شفيق: ربنا ما يحرمكم من بعض ….إلا أخبار ابنك حامد ايه يا ياقة؟
ياقة: والله ماشي الحال انت عارف انه خريج تجارة و نفسه يشتغل في بنك و من ساعه ما تخرج و هو بيقدم…بس انا قلت له يشوف حاجة تانية…لان البنوك دي وسايط و احنا على باب الله
القصري: انا عندي زبون الاجة و ابنه في بنك أبصر ايه….النبي نسيت بس لما يجي لي المحل اتكلم معاه …
ياقة : تسلم يا معلم !!
شفيق: يلا يا قصري عشان ياقة يستريح…
الست وردة دخلت بالشاي: النبي ما تمشوا الا لما تشربوا الشاي!
في بيت الحاجة فتافيت السكر 👇🏽
نعمات: بقولك يا حاجة …ايه رأيك في موضوع الشغل بتاعي اني اعمل اكسسوار و ابيعه زي ما مي ما قلت لي !
الحجة: فكرة هايلة …يا بنتي الشغل نعمه مش بس عشان الفلوس…الشغل ده حياة بيدي الدنيا طعم تاني….وانا ايدي على ايدك لو عايزاني اساعدك…
نعمات: ربنا ما يحرمني منك يا خالتي… طب انا هقوم اجيب ورقة وقلم و نكتب الطلبات عشان ننزل وكالة البلح نجيبها و مي قالت لي انها هي اللي هتتولي البيع هتعمل لنا أبصر ايه مارجينج….يعني تسويق
الحاجة : انتي عارفة انا شاطرة في الكروشيه شوفي اعمل لك ايه و رزقنا على الله…
الباب خبط و فتحت نعمات 👇🏽
نعمات: اهلا يا ام سعيد …
أم سعيد: ولا اهلا و لا سهلا بقي أن استناكي مجيش…انا مكنتش عايزة اجي عشان كنت عارفة ان المخفية شوشو هنا بس لما عرفت انها رجعت بيتها قلت اجي !!
نعمات: والله مشغولين يا ام سعيد تعالي …
الحجة: انا هعملكم الشاي …
أم سعيد: لا ناكل الأول….انا جايبالكم طبق محشي مشكل فلفل و باذنجان و ورق عنب و صينية جلاش باللحمة المفرومة و فراخ محمرة
و دخلت راضية: وانا بقي جبت المشبر …
نعمات: ده كان واجب علينا ….معقولة يا ام سعيد دى عزومة!!
ام سعيد : هو احنا غرب يا ست نعمات ولا احنا مش قد المقام !!
الحجة : اخص عليكي اوعي اسمعك تقولي كده ….ده احنا عشرة ٢٠ سنة
الباب خبط و مي دخلت
مي: ايه ده محشي….خيانه !!!
نعمات: حماتك بتحبك يلا بسم الله !!!
مي: طب انا بقي بالمناسبة دي هجيب لكم بعد الاكل حبة رز باللبن بالمكسرات من عند صابر !!
الحاجة: جتك ايه يا مي ب…قيتي تتكلمي زي ولاد البلد !!
نعمات: وماله يا حاجة اجدع ناس !!
الحاجة: النبي انا فرحانه بيكم اوي و كل ما اشوف اللمة الحلوة دي اعرف ان قراري اني ارجع مصر كان صح …ربنا ما يحرمنا من القعدة دي…..
نعمات: سيبوني اركز مع المحشي يا جماعة …يا مي فيه برطمان فلفل مخلل في التلاجة الحقيني بي!!
مي: اوعي وشك ….خالته ناوياها الليلة نواياها!!
و كله فتص من الضحك و…..
نلتقي في الحلقة القادمة إن شاء الله 🥰