في بيت الحاجة فتافيت السكر
دخلت شوشو البيت لقيت الحاجة فتافيت السكر و نعمات في الصالة
شوشو:مساء الخير
نعمات مبوزة:هو شكله مش خير ابدا !!
الحاجة:بس يا نعمات !!
نعمات ل شوشو: الا حضرتك لو متضررة من قعدتك معانا قعده معانا ليه…مش قلتي لشيرين اني أنا ارشانه والحاجة رغاية…. سيادتك كنتي سايبة الموبايل مفتوح فسمعنا كل حاجة..
شوشو مرتبكة: ايه ده أنا مش فاهمه حاجه …بس ممكن كنت بتكلم على صاحباتي في النادي اللي أنا متخنئة معاهم …انتي فهمتي غلط !
نعمات: لا يا بنت الأصول أنا سمعت صح و دلوقتي تحضرى شنطتك عشان ملكيش قعاد معانا …اللي يتكلم في ضهرنا مش عايزينه…ده اخرة المعروف …عشان انا بنت بلد هخليكي تستني لبكرة الصبح عشان الدنيا ليل وربنا ستار حليم..
الحاجة: اهدي بس يا نعمات جايز الشابة مكنتش بتتكلم علينا
نعمات:متأخذنيش يا خالتي أنا مش هكذب وداني انا سمعاها بتقول اسامينا …
شوشو: لا انا مش هستحمل أكثر من كده… انا ماشية حالا كرامتي متستحملش…
نعمات: مع ألف سلامة يا بنت الأصول!!