احنا في بيت الجدة فتافيت السكر اللي شافت الخناءة بين شوشو وزوجها الدكتور أنور عالسلم ….
داخل بيت الجدة فتافيت السكر
الجدة: خشي يا بنتي و استهدي بالله…سنديها يا شيرين.. !
شيرين: ايوة يا حاجة …انا قعدتها اهو على الكرسي..
موبايل شيرين رن…و هي ردت : الو ايوة يا عادل…انت رجعت بدري م الشغل ولا ايه؟؟ بتقول ايه اكل ؟؟ لا لسة محضرتش العشا….طب بس بس مش ممكن صوتك عالي و جنبي ناس… طب يلا انا طالعة اهو..!!
شيرين: معلش يا شوشو هطلع احضر العشا و ارجع لك… …
شوشو: لا خليكي مع جوزك انا بقيت كويسة …
الحاجة: اطلعي لجوزك يا بنتي الوقت أتأخر و انتي حامل لازمك راحة!!
شيرين: مانتي كمان تعبانه يا حاجة مش هتعرفي تراعيها ؟
الحاجة: اطمني بنت اختي طنطك نعمات كانت اصلا جايه تبات عندي …فهي هتساعدني واهو نونس بعض!! ولا مش عايزة تقعدي مع ست عجوزة يا شوشو ؟
شوشو: يا خبر يا حاجة ده انتي ست الكل …
الحاجة: لو بتعزيني روحي هاتي هدومك وتعالي عندي باتي يومين تلاته لحد ما اعصابك تستريح… !
شوشو: لا طبعا انا عمري ما تقلت على حد… …
الحاجة: اخص عليكي… انا زي امك بعدين انا لوحدي و البيت كبير يلا انا اروح اخبط على شريف يحضر شنطتك…!
شوشو: لا متتعبيش نفسك انا هكلمه على الموبايل..
شوشو فعلا كلمت شريف و طلبت منه يجيب شنطتها
شيرين طلعت تشوف جوزها عادل و بعد دقايق الباب خبط فتحت الحاجة و قالت: اهلا يا نعمات..!
نعمات: اهلا يا خالتي متأخذنيش اني اتأخرت عليكي اصلي كنت بعمل لك برام القرع العسلي بالمكسرات……
الحاجة : لسة فاكرة….وليه تعبتي نفسك بس ؟
نعمات: ميجيش من بعض خيرك ! ايه ده عندك ضيوف ؟
الحاجة: لا ضيوف ايه …دي شوشو جاية تبات عندي يومين !!
نعمات بصوت واطي للحاجة: هو طردها…يبقي خناءة السلم عملت مفعولها!!
الحاجة بصوت واطي: حرام… هي الست ناقصة!!
نعمات: ماهي طول عمرها ملوية…يلا ربنا يفرجها علينا جميعا.. …
نعمات بصوت عالي ل شوشو: اهلا شرفتينا.. !
شوشو ببرود: اهلا.. …
نعمات بصوت واطي: كبة على تقل دمك !!
نعمات للحاجة: خالتي احط هدومي في انهي اودة؟
الحاجة: الاودة اللي جنب اوضتي لزم… و يا ريت توري شوشو اودتها؟
نعمات بقرف: تعالي اوريكي اودة جنابك…شوشو دخلت اودتها !
نعمات والحاجة فتافيت السكر
نعمات: طب تعالي يا خالتي عايزاكي في كلمتين!
دخلت الحاجة و نعمات الاودة وقفلوا الباب …
نعمات: يعني متنقيش إلا اليومين اللي انا جاية اقضيهم عندك و تروحي عازمة الحيزبون دي….شوفي تنكة ازاي..دي بجحة….
الحاجة: يا بنتي…. الناس لبعضيها…. لقيتها عالسلم واخدة في وشها و الوقت متأخر.. مقدرش اسيبها حرام !
نعمات: و بسلامتها هتقعد اد ايه ؟
الحاجة : بالذمة ده سؤال…معرفش طبعا بس لحد ما الامور تتصلح …
نعمات: انا هستحملها يومين بس….يلا اروح اودتي اغير عشان نحضر العشا…..
الحاجة : تسلمي النبي انا مبسوطة انك جيتي …هتملي عليا البيت !
نعمات بتحضن الحاجة: متقوليش كده يا خالتي ده انتي في معزة امي الله يرحمها…
بعد نص ساعة
نعمات حضرت العشا و كلهم قعدوا يتعشوا….
الحاجة: يلا بسم الله …دوقي الفول بالطماطم حاكم نعمات بتعمله تحفة!
شوشو: شكرا انا باكل اهو..
الحاجة: معلش أيام و تعدي..
شوشو: يعني ايه يردني لعصمته….انا مش لعبة في ايده
نعمات: خلاص ارفعي خلع!
شوشو: لا انا مش هتنازل عن حقوقي…
نعمات: هو سؤال بلا قافية سمج…..بما اني لسة مطلقة جديد عايزة اقولك بس كلمتين ….هل حضرتك ماديا بعد الطلاق عندك مصدر دخل ؟ يعني بتشتغلي او عندك حاجة بتدر لك عائد شهري؟
شوشو وهي متنحة: لا….
نعمات: هل الوالد او الوالدة سايبن لك ورث ؟
شوشو وهي مسهمة: اه بس مش كتير …..
نعمات: طب هل عندك استعداد تعيشي مفلسة و انتي من غير حد يصرف عليكي
شوشو: كل اللي يهمني كرامتي !!….
نعمات: شوفي بقى يا ست شوشو …انا واحدة بنت بلد و مش الا فرنكا زيك….اولا انا ماليش اني اعرف اللي بينك و بين جوزك…. بس اللي اعرفه ان البني ادم لازم يحكم عقله…الراجل ده ما دام ردك يبقى محترم لأنه ممكن يكون طلق في لحظة انفعال…و احنا بشر و لما فاق راح ردك
شوشو: بس…
. : نعمات: سبيني اكمل كلامي الأول…انا عرفت من خالتي أن جوزك مطردكيش من البيت بالعكس انتي اللي كنتي عايزة تطرديه؟
شوشة: آه عشان خاين!
الباب خبط و نعمات فتحت لقيت شيرين…..
شيرين: انا جيت اهو… !
نعمات: احضرينا يا شيرين…… الست شوشو بتقول انها زعلانه من جوزها عشان خاين..!
شيرين: أنور إنسان كويس وانتي اللي ضيعتيه من ايدك ..
شوشو: ممكن تسكتي!!….
شيرين: لا مش هسكت …انتي من شهور قلتيلي انك حسة انه مجوز!
نعمات: ما عندها حق بقي تطرده؟….
شيرين: لا يا طنط نعمات….. هي مكنتش مضايقة انه متجوز عشان اللي اتجوزها مريشة و عندها علاقات ممكن تساعده في الشغل…و ده اللي يهم شوشو!
نعمات: خلاص….. يبقي زعلانه ليه بقي؟ !!
شوشو: عايزة حقي انا وابني… !
شيرين: انتي مفلسة الراجل اول بأول!
شوشو: بقلك ايه…… هتغلطي يبقي تمشي احسن! !
شيرين : بقي كده انا اللي غلطانه !
و فتحت شيرين الباب عشان تخرج ……لقيت أم سعيد واقفة بتصوت: الحقوني يا ناس غيتوني !
الحاجة و نعمات راحوا يشوفوا فيه ايه ……
ام سعيد جريت على شقتها الجديدة ….و هما وراها لحد ما دخلوا شقتها و اول ما شافوا منظر ال…
نلتقي في الحلقة القادمة إن شاء الله