في بيت شوشو
شوشو اخدت دش و طلبت من ابنها شريف يروح اودته، عشان تعرف تتكلم مع أنور براحتها….
جهزت شوشو القهوة و قعدت تشربها في صمت..و الساعة ٩ رن جرس الباب
و فتحت شوشو و دخل طليقها أنور !
شوشو: بتخبط ليه مش معاك مفتاح؟
أنور: معايا بس أصول الأدب اني اخبط لانك بقيتي غريبة عني …
شوشو : بقي كده….لا اصلك بتفهم في الأصول ازي جنابك !
أنور: انا مش جاي اسمع تريأة… ابنك قالي انك عايزة تتكلمي معايا …خير؟
شوشو: طب اشرب القهوة انا مجهزها
أنور: لا بطلت اشربها
شوشو: من امتى ده؟؟؟
أنور: من ساعة ما أعصابي استريحت..!!
شوشو بعصبية: من غير رغي…انا هدخل في الموضوع علطول…مبدئيا انا هقعد انا و شريف في الشقة…و هتدفع لنا 20 آلف جنيه كل شهر غير مصاريف الجامعه بتاعته طبعا !
…. أنور:تقعدي فين .؟؟ و انا اروح فين؟؟؟دى شقتي شاريها بعرقي و فلوسي ؟؟؟
شوشو: ده حقي و بلاش نلجأ للمحاكم…. و اوعى تفكر اني ارجع لك …انسى وخلى الست الدكتورة دى تنفعك ؟
أنور: أولا مسمهاش الست الدكتورة و اتكلمي عنها بأدب…ثانيا انا اصلا طلقتها من قبل ما اطلقك…
شوشو على وشها ابتسامة عريضة حاولت تخبيها: امتى ده؟
إنور: ايه ملحقتيش تفتشي في رسايل الواتس اب …معلش تلاقيكي انشغلتي؟
شوشو: يعني كنت عارف ؟
إنور: طبعا…و كنت عارف انك عارفة اني متجوز و ساكته….لاني فاهمك كويس انتي عارفة انها كانت من عيلة كبيرة وأبوها في مركز سياسي مرموق و عشان حسيتي انها ممكن تساعدني بعلاقاتها سكتي…
شوشو: آه كنت عارفة و كان عندي امل انك تعرف تستفيد منها ولكن كالعادة مش بتفهم حاجة في البيزنس!!
أنور : الزمي حدودك….انا مش هسمح لك تغلطي فيا تاني ….و يكون في علمك انا مش هسيب بيتي و قاعد فيه ….و عشان انا ابن اصول و بخاف على مصلحة ابني انا رديتك لعصمتي تاني !! لحد ما الولد بس يخلص الجامعة !!
شوشو: ايه …. هو أنا لعبة في ايدك وقت ما تعوزني تردني… ولما الست الهانم طلبت الطلاق قلبت في دفاترك القديمة ؟
أنور: انا اللي طلقتها…. و مش هقولك الأسباب دي امور تخصني انا و الصراحة برده انا رديتك لان المحامي بتاعي قالي ان الشقة هتروح… فقلت ده شقى عمري، و انا مش هطلع من بيتي….لو عايزة بقي تنفصلي انتي حرة روحي ارفعي قضية…بس لعلمك انا أ خدت عهد على نفسي أنك محرمة عليا…
انا مبقتش استحمل اهانتك المستمرة عشان خاطر حبك المرضي للفلوس…
شوشو: و مين قالك اني هوافق اقعد معاك في بيت واحد انا من بكرة همشي؟
أنور: براحتك…..و فتح باب الشقة ونده: يا ام سعيد……
الحاجة فتافيت السكر
الجدة فتافيت السكر في الشقة اللي ادامهم فتحت الباب وقالت: مساء الخير يا دكتور…ام سعيد وولادها خلاص عقبال املتك بينقلوا انهردة لشقتهم الجديدة! خير يابني اساعدك في حاجة؟!!
انور: لا يا حاجة تسلمي…..
شوشو من جوة البيت بتزعق: انا مش هقعد معاك في بيت واحد على جثتي……
شريف خرج من اودته: متهدي يا ماما ؟
الحاجة: خير يا بنتي مالك….استهدي بالله.. !!
انور: انا يا شريف هنزل اجيب شنطة هدومي من العربية…و جهز لي اودتك عشان هنام فيها …عن إذنك يا حاجة!
شوشو وهي بتعيط: انا مستحيل اقعد معاه في بيت واحد…اوعي من وشي يا شريف انا رايحة احضر شنطتى!
شريف: يوووو بقي يا ماما هتروحي فين يا ماما ؟
شوشو: هروح في ستين داهية..!!
الحاجة: لا إله إلا الله سيدنا محمد رسول الله…يا بنتي تعالي معايا على شقتي….
على صوت الزعيق نزلت شيرين على السلم
شيرين: في ايه يا شوشو؟؟
شوشو:البيه ردني وقال ايه جاي بشنطة هدومه يقعد في بيته !!…
شيرين: طب اهدي…
الحاجة: خديها يا بنتي على بيتي جوة….مش عايزين الجيران تتلم علينا !!
شيرين اخدت شوشو و دخلت علي شقة الحاجة
و فضل شريف لوحده امام الباب و هو بيقول : انا كان مالي يا ربي بوجع القلب ده
شفيق
القصرى
في قهوة المعلم شوقي
المعلم شوقي: الحقوا يا خوانا خناءة…المعلم ياقة رفع المكواه على دماغ القصري…و ماسكين في خناء بعض…
واد يا قرفة روح شوف فيه ايه …
قرفة: و طلبات الزباين يا معلم ؟
شوقي: يولعوا…روح ياد قبل ما يقطعوا بعض…
جري قرفة يشوف فيه ايه ….
بعد نص ساعة جه الأستاذ شفيق و إحسان و معاهم القصري على رأسه كدمات
شوقي: خير يا قصري فيه ايه؟ !!
شفيق: اجري يا قرفة على صيدلية دكتور برزي هات لنا قطن و مكروكروم
شوقي: لا خليك هنا يا قرفة عشان الزباين اروح انا اجيب الضاكتور بذات نفسه !
إحسان: ايه ده يا قصري…
تروح للمعلم ياقة الدكان بتاعه و تتهجم عليه!!
القصري: بس متقولش اتهجمت عليه …انا رحت اتكلم معاه بالهداوة… هو اللي اتعصب و ابتدا يغلط !!
شفيق: طب استهدى بالله نشوف جروحك اللي في وشك الأول بعدين نبعت نجيب ياقة و نسمع منه!
القصري: تسمع منه؟؟؟ يعني انا كذاب؟؟
شفيق: الأصول يا قصري نسمع منكم انتو الاتنين !
جه المعلم شوقي ومعاه الصيدلي د. برزي اللي جه معاه الإسعافات الأولية و عالج الكدمات اللي في وش القصري و سأله إذا كان يروح المستشفى يطمن برده
القصري: بلا مستشفيات بلا ديولو…دول بيعملوا من الحبة قبة ….
مشي د. برزي… و بعت شفيق يطلب حضور المعلم ياقة المكوجي…..بعد نص ساعه جه ياقة ….
شفيق : شوف يا ياقة عشان نعرف نحكم بينكم…محتاجين نعرف التفاصيل!!
ياقة: انا كنت في دكاني كافي غيري شري جه القصرى وهو متزعبب…. بقوله: اهلا يا معلم.. !
رد : لا اهلا ولا سهلا انت مراعتش عشرة الجيرة…!!
لما سألته فيه ايه قالي ان فيه زبون راح الدراي جليم بتاعه…القصري قاطعه: اسمه داري كليم يا جاهل!!
ياقة: بقلك ايه لم لسانك احسن ابطحك تاني.. !!
القصري: طب استجري كده…وانا اعلقك على باب الحته…!
شفيق: جرى ايه يا معلمين…متستهدوا بالله !!
ياقة: المهم بسلامته بيتهمني اني بضرب اسافين بينه و بين زبائنه!
القصري: آه…انا بتهمك… الصبح جالي زبون بيشتكي أن قميصه مش مكوي كويس و قالي انه كان عندك من يومين وقلت له أن الكي الآلي ده ضحك ع الدقون؟؟
ياقة: و افرض اني قلت انا حر يا اخي!!
القصري: يا راجل يا سو….يعني انا بنصب على زبايني؟؟
ياقة: شفتم يا رجاله….سامعين… يعني انا منطقتش اسمه كل اللي قلته للزبون أن مفيش احلى من المكوجي البلدي!
القصري: يا راجل يا حقود….
ياقة: متكمل…سمعهم انت قلت لي ايه….واد يا قرفة انت كنت واقف ساعتها انت احكي اللي سمعته!
قرفة: وانا مالي يا معلم….انت هتحشروني بينكم ليه !!
المعلم شوقي: انطق ياض دي شهاده حق هتتحاسب عليها!
قرفة: الصراحة انا رحت لدكان المعلم ياقة و لقيت القصري متعصب و بيقوله: يا راجل يا حقود يا غلاوي ….عشان ربنا كرمني وبقي عندي داري كليم تقوم تسرق الزباين…بقي انت هتقارن دكانك المعفن ده بالدراي كليم بتاعي….انت عارف انا صارف عليه قد ايه…يا راجل يا حقود….
شفيق: لا لا….ميصحش كده يا قصري! …
إحسان: معقولة الكلام ده يطلع منك ؟؟؟
ياقة : شفتم بقي انا رفعت عليه المكواه ليه…المعلم بيعايرني بفقري….المعلم بيعايرني اني على باب الله….القصري ربنا اداله فبيفتري و بيتريأ على خلق الله….انا ميعبنيش اني راجل على قدى….انا راضي …بس مقبلش ان حد يقول على دكاني معفن و كمان يقولي أنى اقل صبي من صبيانه بيقبض اد يوميتي كلها…اخص….اخص على الفلوس اللي تخلي بني ادم يتمرع و يتنطط على مخاليق ربنا و يعايرهم برزقهم !!
إحسان: يسلم لسانك يا معلم ياقة…انت راكبك الغلط من فوقك لتحتك يا قصري!!
القصري: بقي أكلكم بالشويتين بتوعه!
شفيق: الكلام اللي قاله قرفة ده حصل يا قصري؟
القصري: آه حصل…
شفيق: يبقى أنت اللي غلطان ….
القصري: وانت كمان عليا طب و ربنا مانا اقعد لكم فيها…انا غلطان اني رضيت اجي معاكم هنا….
و اخد بعضه القصري ومشي…
المعلم ياقة: بعد اذنكم انا هروح البيت !!
إحسان: والله مانت مروح إلا لما تشرب معانا الشاي…يا راجل احنا بنشوفك كل فين و فين !!
ياقة: معلش يا إحسان بيه حاسس اني تعبان شوية بعد اذنكم…
شفيق: سيبه براحته يا إحسان….يلا ونشرب الشاي معاه بكرة الصباح رباح!