- في بيت المهندس رفعت …
رفعت و مراته الدكتورة امتثال و اختها الست نعمات و مي قاعدين في الصالة بيتفرجوا على المسلسل التركي …الباب خبط
راحت مي تفتح الباب و قالت : اتفضل يا عمو ….يا بابا ده عمو صادق !!
نعمات لما سمعت قامت بسرعة على الباب و قالت: افندم يا سي صادق؟ نعمين…. انا مش قلت لك في التلافون اني مش عايزة اشوف وشك …
صادق زاحها من طريقه: انا مش جاي عشانك …أن جاي اتكلم مع راجل العيلة سي رفعت!!
رفعت: اهلا يا صادق….اهدي يا نعمات…يا مي خدى خالتك اودتها!
نعمات: لا انا مش صغيرة …الموضوع يخصني انا و الكلام يكون ادامي…
صادق: احسن برده خلينا نخلص…انا دلوقتي جاي اقولك اني خلاص اتجوزت و عشان عندي اصل….انتي لسة على
ذمتي و هتفضلى معززة مكرمة و شوفي شقة تكون محندآة آجرها عشانك !
نعمات: شقة….ليه انت ناوي تسكنها كمان في شقتي؟ ….
صادق بارتباك: الصراحة اصل العروسة هجيب امها و اخوها يعيشوا معانا …و يدوبك الشقة على قدنا…فقلت احسن لك اشوف لك شقة تانية!! !
امتثال: اخص عليك …راجل خسيس…بقي انا قلت لما تاخد مهلة تفكر هترجع في كلامك تيجي كمان عايز تطرد اختي من شقتها اللي عاشت فيها ٤٠ سنة!!
رفعت: ايه الكلام ده يا صادق….مراتك الجديدة تيجي تاخد الشقة هي وأهلها و أم ولادك ترميها!! !!
صادق:انا مقولتش هرميها بس قلت تشوف شقة صغيرة..
نعمات: بص يا خرفان ياللي البت الصغيرة لحست دماغك ….انا مش عايزة شقة كبيرة ولا صغيرة و لا عايزة اشوف خلقتك اصلا…انت غدار …بعت عشرة ٤٠ سنة عشان نزوة…و انا مشتريش اللي يبعني …و انا مش ضعيفة عشان تقول اخليكي على ذمتي يا عديم الذمة….انا خلاص انت متلزمنيش و الحمدلله أن ولادي كبروا و عايشين برة و خلاص كل واحد له حياته…خلصنا بقى وارمي اليمين !
رفعت: لا إله إلا الله سيدنا محمد رسول الله…..جرى ايه يا نعمات متستهدي بالله …
صادق: لا خلينا نخلص….مادام انا خرفان و دماغي اتلحست يبقى كده جبتي اخرك معايا….روحي و انتي طالق….و بالتلاتة كمان
امتثال: آه يا راجل يا ناقص!!
مي: الف مبروك يا خالتو….لو اعرف ازغرط كنت زغرت..!!
رفعت: بس يا بنت….اتفضلي على اودتك!!…
صادق رزع الباب وراح و مشي
رفعت: ليه كده بس يا نعمات… الموضوع ميتحلش كده!! …
نعمات: لا وانت الصادق ….الموضوع مكنش حله إلا كده…….
ودخلت نعمات الاوده مع مي و فضل رفعت و امتثال في الصالة
رفعت: لا حول ولا قوة الا بالله …
في بيت شوشو …
شريف خبط على اودتها
شريف: ماما انا كنت عايز اقولك على حاجة….انا عارف انه مش وقته بس الصراحة لازم تعرفي!!
شوشو: انا عارفة يا شريف… !!
شريف: عارفة ايه ؟
شوشو:ابوك متجوز عليا……
شريف: يعني كنتي عارفة…
شوشو: آه…و لعلمك بعد أيام من جوازه
شريف: و موافقة!
شوشو: انا قلبي كان حاسس…و بعدين سمعت ابوك مرة بيكلمها بالليل متأخر و افتكر اني نايمه…دي دكتورة زميلته من أيام الجامعة أرملة و معاها فلوس و عندها علاقات…زي ما تقول جواز مصلحة….و كمان انا مراقبة الواتساب بتاعه و بقدر اقرأ كل الرسايل اللي عليه……
مش قادر اصدق انك كنتى ساكتة طول الفترة دي…شريف:
شوشو: كان عندي امل اموره تتحسن و الزفتة اللي اتجوزها تسانده ماديا بعلاقاتها….بس ابوك خيبة معرفش يستفيد منها باي حاجة….ده هي اللي استغلته!!
شريف: ماما الموضوع سخف كده….وانا الصراحة مش عارف اركز في المذاكرة….متتكلموا…شوفوا ايه اللي يريحكم واعملوه!
شوشو مسحت دموعها و قالت : متقلقش….انا خلاص اخدت قراري ….قوم كلم ابوك من موبيلك و خليه يعدي علينا في البيت بعد ما يخلص العيادة !
شريف: طب عايزاني اكون موجود!
شوشو: لا….انت هتدخل اودتك …..يلا انا هقوم اعمل غدا لانى جعانه و هاخد شاور و أجهز…..و راحت شوشو المطبخ …
شريف فضل لوحده و قال بصوت واطي: ناوية على ايه يا ماما…ربنا يستر