أنور طلق شوشو” “
الجملة دي انتشرت في العمارة و الخبر اتذاع بين الجيران …و خصوصا
فيه جيران كتير مش بيحبوا شوشو بسبب انزحتها…. ففرحوا فيها!!
داخل بيت المهندس رفعت و حرمه الدكتورة امتثال …
دخلت اخت امتثال الست نعمات …
نعمات: أنتم لسة بتتكلموا في موضوع طلاق شوشو؟
رفعت: مش انا …دي اختك اللي عمالة تهري في الموضوع لما طهقتني!!
امتثال: النبي ايه….مش انت يا راجل اللي سألتني ؟
رفعت : اه سإلتك بس مطلبتش تفاصيل …عامه ربنا يهدي النفوس… …
امتثال: مقلكش البت راضية ماشيه ضحكتها ملية وشها…اومال…. اصل شوشو ياما اتألطتت عليها… …
نعمات : يا ساتر يا رب ….مفتكرش راضية تكون شمتانة دي بنت متربية….
امتثال: لا شمتانة و مش هي بس ..كمان الأستاذ مخلص رئيس مجلس إدارة العمارة…أنتم ناسيين انها مرة هزأته وقالت له انت راجل عجوز و حشري؟؟
رفعت: الموضوع ده بقاله اكتر من سنتين …و مخلص راجل مهذب مش معقول يشمت….انا عارف اخلاقه…. !!
امتثال: جايز…عامة من أعمالكم سلطت عليكم…
نعمات: الصراحة يا ختي شكلك انتي اللي شمتانة في الست!!…
امتثال: أنا…..انا اشمت وانا مالي…!!
نعمات : لا مالك و نص و تلت تربع….انتي نسيتي لما مرة نسيتي باب الأسانسير مفتوح و انا كنت معاكي و هي اما طلعت الدور بتاعك ولقيتك انتي اللي فتحاه عشان كان فيه عمال عندك بينقلوا تلاجة جديدة…… راحت مزعقة و مشيت وهي بتبرطم…… و انا سمعتها بوداني بتقول : دي مش ممكن تكون دكتورة دي شكلها بياعة طرشي!!!!
امتثال: دي حكاية قديمة من سنين… !!
نعمات : سنين ايه ده كان قيمة كم شهر… !
امتثال: جرى ايه يا نعمات؟ بقي انا اشمت في واحدة زي دي ؟
نعمات : و انا مالي يا ستي … انا هروح اصلي العشاء و اقعد مع مي شوية…!!
دخلت نعمات اودتها…
رفعت
رفعت: على فكرة أختك عندها حق…انتي فعلا عينيكي سعيدة…… وانتي عمالي تعيدي و تزيدي في قصة الطلاق!!
امتثال بصوت عالي و مكشرة: بقولك ايه؟…
قاطعها رفعت و قال: ولا تقولي حاجة…. انا واخد بعضي و على اودتي انا كمان …مش فاضي لوجع الدماغ ….و دخل اودته…
في بيت شوشو
شوشو بتعيط و جنبها ابنها شريف …
شريف: ممكن تهدي يا ماما وتفهمينى؟
شوشو وهي بتعيط: افهمك ايه بقلك ابوك طلقني!! !!!
شريف: مانا عارف بس عملتي ايه…أنتم من يوم مانا اتولدت وانتم بتتخنؤا مفيش جديد… بس عمرها ما وصلت للطلاق!!
شوشو: هقولك…مانا لازم افضحه!!
شريف: ايه …انتي قفشتيه مع واحدة ؟
شوشو: بس يا ولد …اتربى… انت اجننت!!
شريف: اومال ايه ؟
شوشو: ابوك الدكتور المحترم ….عارف جاب فلوس توضيب العيادة منين …مطلعش سالفها من البنك!!!!
شريف: ايه طلع سرقهم ؟
شوشو: لا يا ريت
شريف: ماما انا معنديش صبر… انا عندي درس و متأخر!!!!
شوشو: درس ايه و زفت ايه…ده وقته …المهم ابوك طلع استلف الفلوس من سعيد الميكانيكي ابن أم سعيد البوابة!! تخيل الكارثة!
شريف: و فيها ايه…ايه الكارثة في كده ….بابا و لا سرق ولا اختلس ولا غصب على سعيد يديلو الفلوس…وانا متأكد أن بابا كتب شيك لسعيد… دي أخلاق بابا.. !
شوشو بتمسح دموعها: اخص عليك ولد مش متربي…بقي يطلقني عشان انا بدافع عن برستيجنا …..و مركزنا الاجتماعي…… و انت تدافع عنه…اخص عليك ولا طمرت تربيتي فيك.. !
شريف: بقي عشان انا بقول الحق تزعلي… انتي مش زعلانة على برستيج العيلة……. انتي بتخافي على برستيجك انتي و شكلك ادام اصحابك اللي هما مستواهم المادي أعلى منك و هما دول كانوا ديما سبب الخلافات بينك وبين بابا!!
شوشو: بس متكملش!!
شيرين كانت جوة في المطبخ بتعمل لمون يهدي اعصاب شوشو و دخلت و هي بتقول:
لا يا شوشو ابنك عنده حق …يسلم لسانك يا شريف…انتي عرفتي تربيه عشان كده المفروض تراجعي نفسك …كفاية بقي تكبر و غرور…..انا كمان من سنين بقلك انتي بتضغطي على أنور زوجك …طلبات مبتخلصش… و علطول بتشتكي من قلة الفلوس….و بتخرجي مع ستات من مستوى مادي اعلي منك بكتير….. و ياما رجعتي من خروجاتكم وانتي منبهرة بفلانة اللي اشترت شاليه في السخنه وعلانه اللي بعتت ابنها يدرس في أوروبا وانتي كنتي بتتأثرى بالكلام ده ومن ناحية تانية تضغطي على جوزك!!
شريف : دي اسمها عقدة النقص….يا ماما فوقي بقي مش عيب أننا نعترف بغلطنا…اهدي و فكري كويس وانا متأكد أن انتي وبابا هترجعوا لبعض بس هي مسألة وقت …
شيرين: مش بس وقت يا شريف لازم شوشو تغير من نفسها و إلا مفيش حاجة هتتغير و ابوك استحمل كتير !!
شوشو:بقولكم ايه سيبوني لوحدي انا مش عايزة اشوف حد ولا طايقة نصايح و مواعظ….و دخلت اودتها و رزعت الباب …..
شيرين: معلش يا شريف مامتك الصدمة شديدة عليها …خلينا نسيبها تستريح …
شريف: انا فاهم طبعا يا طنط بس المشكلة انها معرفتش ….اومال لو عرفت !!
شيرين باستغراب: عرفت ايه…متقلقنيش يا شريف انطق!!
شريف : اصل بابا يا طنط؟ ….
شيرين: ايه ماله؟ !!
شريف سكت لحظة و قال: بابا متجوز واحدة تانية..!!
شيرين : يا نهار ابيض! !!!!