قرفة القهوجي
في قهوة المعلم شوقي…الواد قرفة بيدردش مع الأستاذ شفيق و إحسان و المعلم القصري…
قرفة: انا مش عايز ازعجكم…بس الصراحة بعتبركم زي اهلي …مع اني مش قد المقام !
القصرى: ايه الكلام ده !! ده احنا اللي مربينيك من وانت ست سنين
ابوك الله يرحمه كانت سيرته طاهرة و العيبة مكنتش تطلع من بؤه…
شفيق: اتكلم يا قرفة فضفض يا بني …محتاج فلوس؟
قرفة: لا القشية معدن…بس الصراحة انا كان نفسي اتأهل و ادخل دنيا …كان في واحدة قريبتي طيبة و غلبانه زيي و روحت اتكلمت معها…فوجئت انها رفضت !
احسان: طب ….جايز مش مستلطفاك…هي حرة….الجواز قسمة و نصيب …
قرفة: لا يا بيه دي.. بتقولي انها مش معترضة على المبدأ بس متقدرش تجوزني وانا مش معايا حتى الثانوية العامة؟…
القصري: ليه يا واد تكونش ضاكتورة في الجامعة؟!!
قرفة: لا عقبال املتك معاها اعدادية..!
شفيق: طب ايه المشكلة…اومال لو كانت خريجة جامعة كانت عملت ايه…تكونش فاكرة نفسها مي زيادة ؟؟
قرفة: مين دي يا باشا…تقرب ل مي عز الدين؟!!
إحسان بيضحك: لا يا واد دي أديبة كبيرة..المهم انت ده اللي مزعلك!
قرفة: طبعا كسرت قلبي..
شفيق: جت كسر حوقك…يعني اللي خلقها مخلقش غيرها
قرفة:أمي قالت لي كده !! بس أنا بحبها !
القصري: حبك بورص بقى البت معاها اعدادية و بتتنك كأنها خريجة جامعة فارفارد ؟؟دي شكلها سايقة العوج اسمع مني انا زي ابوك اكرفها هتلاقيها بتجري وراك …بنات هايفة…ده الراجل ميعيبوش إلا جيبه!
احسان: لا يا قصري البنت حرة…و بعدين التعليم مهم و الفلوس مش كل حاجة!
قرفة: الصراحة هي دلوقتي بتذاكر عشان تاخد الثانوية العامة..و طلبت مني اكمل انا كمان…
شفيق: تصدق البت جدعة..و ماله يا قرفة لو حابب التعليم كمل…بس تكون مقتنع ..
قرفة: طبعا حابب يا باشا بس اذاكر امتي انا من ٦ الصبح باجي القهوة اروق وأحضر و بنقفل الساعه ٢ بالليل بكون خلاص بجر في رجلي…حتى امي مكدرة مني اني مش بلحق اشوفها!!
احسان: ربنا يكون في عونك …انت راجل من يومك …كفاية بعد وفاة والدك وانت اللي بتصرف على امك واختك…بس زي ما قالك عمك شفيق لو حابب كمل و اللي عايز حاجة يابني بيعملها…. لو عندك ارادة ربنا مش هيخذلك ابدا…
قرفة: و نعم بالله
القصري: ايه يا خواتي ايه الجو ده…. مذاكرة ايه و مدارس ايه…ده مرار…..الواد يسيب اكل عيشه و يروح يدخل المدرسة…ده لا مؤاخذة شكلك هيبقي مسخرة وسط العيال!! !
شفيق: يا قصري… انت فاكره هيلبس مريلة و يمسك كيس سندوتشات!! يا راجل ده هيذاكر من البيت…يعني نظام منازل …و ياما شبان زيه بيذاكروا و بيشتغلوا…هو بس ينوي و يبذل جهد و ربنا يعينه بأمر الله تعالى….
قرفة: ربنا يجازيكم كل خير شجعتوني……..
المعلم شوقي من بعيد : واد يا قرفة بقالك ربع ساعة بترغي …اخلص شوف الزباين!!
قرفة: جاي اهو يا معلم …بعد اذنكم يا بهوات
مشي قرفة و بقي إحسان و شفيق و القصري ….
قعدوا التلاتة يدردشوا عن أحوال البلد و هما بيتكلموا جه الدكتور أنور
و قال: مساء الخير
شفيق: مساء النور يا دكتور
إحسان: اهلا اهلا يا أنور…خير مش عوايدك تيجي القهوة؟!
انور و هو مكشر : اصلي محتاجك يا إحسان بيه في كلمتين… !
إحسان: عيني ..تعالي نقعد على الترابيزة اللي هناك…و راحوا ترابيزة تانية …و طلب إحسان ٢ لمون وقال: خير يا بني مالك؟
أنور: أنا مخنوق …مش لاقي حد أتكلم معاه!!…
إحسان : لا إله إلا الله وانا روحت فين ..ده انت و مراتك شوشو في غلاوة شيرين بنتي …
أنور: ما هي شوشو دي سر خنقتي!!….
إحسان: ليه كده اتخنئتوا؟
أنور: ده العادي بتاعنا …بس مش ده الموضوع اللي مضايقني..
إحسان : طب فيه ايه يا بني ؟
انور: حضرتك عارف اني فتحت عيادة في المعادي و صرفت عليها اللي ورايا و ادامي…. والحقيقة أن في مبلغ كبير كنت استلفته من دكتور زميلي….و قلت ل شوشو أن البنك اداني قرض…و دي مش حقيقة لان مكنش عندي ضمانات كفاية…و لان شوشو تعرف مرات صاحبي اللي اداني الفلوس و طبعا متخنأة معها فانا قررت مقلهاش… عشان كالعادة هتحس انها اقل من صاحبتها .. المهم كتبت للدكتور زميلي وصل امانه بس بصراحة سددت جزء صغير من المبلغ و هو بقاله فترة بيلاحقني….لحد مرة كان بيصلح عربيته عند سعيد الميكانيكي ابن بوابة العمارة …وقابلته و حاولت افهمه اني مش هقدر اسدد لاني العيادة مش شغالة كويس
…الراجل اتعصب عليا و هددني يلجأ للنيابة …
سعيد سمع الحوار بينا …لأنه بعد كده كلمني و طلب منى انه يسلفني مبلغ ارد بيه الدين، و انا موافقتش بس سعيد اصر خصوصا أنه عارف اني عامل أيام في العيادة للناس الغلابة فقالي “انت بتقف الغلابة و اللي مع الغلابة عمره ما ينضام…’
المهم اخدت الفلوس بس اصريت اني اكتب وصل امانه …
إحسان : الواد سعيد ده كل يوم بيكبر في نظري…!!
انور: وانا عمال أصغر ادام نفسي…بقى الهانم مراتي تهين امه و كمان تروح الشغل لأخته عشان تإذيها…أنا وشي منه في الأرض!!….
إحسان: مانت عارف شوشو طبعها صعب….بس انا معرفش قصة انها راحت ل راضية الشغل…لا حول الله يا رب!
انور: لا راحت بس الحمدلله معرفتش تإذيها…اصل راضية بنت جدعة و ماشية في النور مبتخافش إلا من ربنا …
إحسان: خلي بالك ان شوشو متعرفش انك سالف الفلوس من سعيد!!
انور: لا عرفت….انهردة انا حكت لها …لما عرفت من أم سعيد انها راحت ل راضية الشغل عشان تإذبها روحت قلت لها الحقيقة… !
إحسان: و هي عملت ايه لما عرفت؟ !
انور: قالت لي” ما هو ده مستواك انك تشحت من البوابين…
إحسان: لا لا …ميصحش كده…كلنا بنتعذر يابني !! وانت هتعمل ايه؟
أنور :أنا عملت اللي كان لازم اعمله من زمان يا عمي…أنا طلقتها!!.. ..