في اودة أم سعيد “”
كانت أم رتيبة قريبتها زارتها و قالت لها وهي بتعيط
أم رتيبة: اصلك متعرفيش اللي حصل لي !
ام سعيد : خير بعد الشر عليكي ؟؟
أم رتيبة: الواد صالح ابني كرشني من بيته….شفتي اخرة تربيتي فيه!! !
ام سعيد : لا ممكن صالح يعمل كده؟ !
ام رتيبة: اهو عمل….كله من العقربة مراته يسرية
أم سعيد : انتي لسة حطاها ف دماغك…مع انها بنت حلال!
ام رتيبة: انتي بتفرسيني يا ولية دي بنت…و لا بلاش قصره …قال من يومين الهانم خرجت وقالت رايحة لأهلها وانا كلمت امها اطمن انها عندهم امها قالت لي انها خرجت من بدري فقلت لابني…يقولي: هي حرة!! قلت له: وانت لزمتك ايه ف البيت قام اتخانئ معايا!
ام سعيد: انا قلت لك كذا مرة متحشريش نفسك بينهم !
ام رتيبة: و يصح يقولي دي حياتي وانا حر .. قلت له يعني بتطردني !!
واخدت بعضي ومشيت !!
ام سعيد: الواد مغلطش انتي اللي حطة نقرك من نقرها… عامة انا هجيب لك جلابية من عندي و بكرة نتكلم…كل شئ يتصلح!
أم رتيبة: ولو جه صالحني برده مش هعبره…..رجالة آخر زمن …رجالة ورق !!
راضية دخلت بالشاي: اتفضل يا خالتي….انا بقي هروح الشغل معاد الشيفت بتاعي جه…
أم رتيبة: بالسلامة يا غالية ….دخلت راضية اودتها و اخدت شنطتها و الموبايل و راحت تشوف اكل عيشها …..
على الساعه 9 بالليل سعيد عدى على أمه في البيت …
سعيد : بالحق يامة… أنا خلصت خلاص موضوع السوبر ماركت…
وبأمر الله تعالي اسبوعين نوضبه ونديه وش نقاشه بعدين اشوف حد يقف فيه
ام سعيد : الف مبروك علينا بس لازم نجيب حد تكون واثق فيه احسن نتسرق!
سعيد: ماتخافيش أنا وصيت الواد علي الصبي بتاعي يشوف حد من أخواته انتي عارفه عنده أخواته متخرجين وبلا شغل …
ام سعيد: هو الحق.. على وأخواته متربيين احسن تربيه على خيرة الله،، كنت عايزة اقولك ان الحاج ابو السعود اللي ف الدور الرابع عايز يأجر شقته ايجار جديد لان ولاده اتجوزوا وهو هيرجع البلد …
سعيد سكت وبعدين قالها : عايز يأجر الشقة…يا رب يامه لو اللي ف بالي يتحقق !!
ام سعيد مش فاهمه ؟؟
سعيد: لو يوافق الحاج اننا نأجرها منه يبقي حاجة عسل اصل انتي مش راضيه نعزل ف شقتي في التجمع خلاص… يبقي نسكن ف العماره …
ام سعيد وشها نور وقالت: اما حتت فكره بس تفتكر ممكن إيجارها يكون معقول ؟
سعيد : أنا عارف توب الايجار في الحتة هنا بكم وممكن اكرمه كمان زياده شويه …
ام سعيد بتزغرد
سعيد فيه ايه يامه !!ده لسه كلام ابن عم حديت…
ام سعيد :مش قادره اصدق اننا نشترى محل و كمان نسكن في العماره!!
سعيد : الله اكبر بس تكمل على خير…
أنا هعدي على الحاج ابو السعود وربنا يتمم اللي فيه الخير…
صلي انتي بس وادعي…
ام سعيد :يا رب يا حبيبي ربنا عالم ان شقيت وتعبت قد ايه في تربيتكم بعد موت أبوكم الله يرحمه…
سعيد: إ”نما يوفي الصابرون أجرهم بغير حساب”
ام سعيد :ونعم بالله رب العالمين …