شوشو قعدت على الكرسي و منطقتش لحد ما قسمت اتكلمت: هدي نفسك يا شوشو…….
شوشو: اصلك متعرفيش انا اتخنئت مع امها امبارح فالبنت جاية تكيدني…
روان: هو انتي متخانئة مع رئيس مجلس إدارة العمارة و البوابين كمان…ايه يا بنتي ده!! !!
شوشو: عشان ناس مش متربية!!!!
روان: أنتي بقيتي عصبية مو…ت لازم تبدأى تعملي يوجا …يلا استأذن انا …عندي يوجا كلاس كمان ساعة …اه بالحق لو تحبي شوشو ممكن تبقي تحضريه معايا اهو يهديكي شوية …احسن احنا في سننا ده العصبية وحشة علينا !!
شوشو في سرها: هو انا قدك يا حيزبون؟ !!
قسمت و ميار اخدوا شنطهم
و قسمت قالت: وانا و ميرو لازم نمشي واخدين معاد عند الكوافير !! يلا شوشو اعمليلك عصير ليمون و روقي… يلا
a tout a l’heure
و مشيوا كلهم ….
و فضلت شوشو لوحدها …قعدت على الكرسي و غطت وشها بايديها و قالت: اتفضحت خلاص….النادي كله الصبح هيعرف اللي حصل…….
في محل “الصبا و الجمال ” المدير نده على راضية اللي جت مكتبه و لقيت شوشو قاعدة على الكرسي ادامه وبتقول
… ايون هي دي!
المدير: تعالي يا راضية…الهانم بتقول انك عملة صفحة عالفيس بوك بتعرضي فيها لبس و اكسسوارات بتوع المحل…!
راضية: ايوة صحيح ايه المشكلة…ما معظم زمايلنا في المحل عندهم شغل خاص…؟
المدير: صحيح ..بس مش بيعرضوا بضاعة المحل و كمان بنص الثمن؟!!
راضية: البضاعة اللي عرضتها صحيح من انتاج المحل بس دي البضاعة الفرز التاني اللي إدارة المحل كانت عاملة للموظفين بتوع المحل اوفر و بعتوهالنا بنص الثمن يعني انا مش سرقاها من المحل…بعد ما اشترتها بقت بتاعتي…!!
المدير :بس كان الأصول تبلغي ادارة المحل قبلها؟
!اتفضلي ..روحي شوفي شغلك
راضية : نورتينا يا شوشو هانم !!
المدير: ايه ده أنتم تعرفوا بعض؟؟
راضية: اومال …دي جارتنا في العمارة!! !
شوشو: مش بالضبط الحقيقة… !!
المدير : مش فاهم؟ !!
شوشو: خلاص مش لازم اوضح ! منعا للاحراج….
راضية بتضحك: احراج ايه يا حبيبتي ….انا معنديش حاجة اتكسف منها…أمي مربيانا على الوضوح وكل المحل عارف أن امي بوابة ولي الشرف انها شقيت علينا و ربيتنا بالحلال …انا بنت أصول مش زى ناس متذوقين من برة وقلوبهم سودا…عامة انا هطلب لك لمون عشان تروقي دمك اللي اتحرق!!
شوشو وشها جاب الوان….و المدير مسك نفسه من الضحك بالعافية و قالها : بردون يا هانم اقدر اساعدك في حاجة تانية؟ !!
شوشو قامت وهي مكشرة و رزعت الباب وراها….!!
المدير فتص على روحه من الضحك و قال لنفسه:
يخرب عقلك يا راضية ده اللي اسمه “قصف جبهة”