مخلص رئيس العمارة
قسمت
شوشو فضلت لوحدها بتوضب في البيت وبالفعل كانت مجهزة كل حاجة من بالليل الاطباق و الفناجين و أدوات السفرة و محضرة كل شئ ، و بعد نص ساعة جت حمدية الشغالة عشان تساعدها و تقدم للضيوف الشاي….لازم يبان ادام صاحباتها أن عندها شغالة!!!
بعد ساعة تقريبا ،..بدأ الضيوف يجوا و دق الجرس
فتحت شوشو و فوجئت ب صاحباتها قسمت و ميار داخلين البيت وهما فتصانين على روحهم من الضحك!!!
شوشو: بونجور يا بنات!!…
قسمت: بونجور شوشو…انتي لازم تشوفي صرفة مع الأستاذ مخلص رئيس مجلس إدارة العمارة ده …مش ممكن !
شوشو: وانتي ايه عرفك بيه؟ !!
قسمت : واحنا مستنيين الأسانسير لقانا واقفين وكان معاه مفتاح الأسانسير.. و سألنا احنا طالعين فين؟ ولما قلنا له عند مدام شوشو قالنا طب لو سمحت اقنعوها تدفع فلوس صيانة الأسانسير
اصلها الوحيدة في السكان اللي مبتدفعش!!
شوشو وشها جاب الوان و قالت: كذاب!! راجل كذاب… كل الحكاية أن جوزى الدكتور أنور على خلافات معاه واحنا مش عجبنا إدارته للعمارة، فبيحاول يطلع علينا اشاعات !!
ميار: طب اتفوضوا معاه يا شوشو …ده انتي يا روحي في الدور الرابع …ولو الراجل مكنش شغل الأسانسير بردون انا كنت هروح….انتي عارفة انا عندي القلب مستحملش!!
شوشو بصوت واطي: وجع قلبك!!…
طب… اتفضلوا هو احنا هنفضل واقفين ع الباب و راحت منادية حمدية…..يلا يا حمدية هاتي الشاي ع التراس….
بعد نص ساعة …
الباب خبط و راحت حمدية تفتح الباب…دخلت روان وهي ست في حوالي الخمسين من العمر طويلة وشعرها اصفر و قالت: بونجور عليكم…لا اللي شفته على باب الأسانسير ده بجد مسخرة انا كنت فاكراها الكاميرا الخفية!!
ميار: اكيد شفتي الأستاذ مخلص بتاع الأسانسير؟!!
روان: لا ..مخلص مين !! ده انا لقيت يافطة مكتوب عليها
“الأسانسير يعمل بمفتاح لكل السكان عدا الدكتور أنور وحرمه لامتناعهم عن دفع فلوس الصيانة” ولما لقيت كده ناديت البوابة و كتر خيرها البنت لما عرفت اني طلعالك شغلته….!
شوشو: نهاره اسود الراجل المخبول ده…انا هبلغ فيه البوليس !!والله العظيم لاكون حبساه!!
روان: بردون …بس لو أنتم مش بتدفعوا الصيانه يبقى هو عنده حق…ما اصل عندي نفس العينة في العمارة بتاعتي في الدقي!! !!
شوشو: عينة ايه…متلزمي حدودك!! !!
قسمت: ايه ايه يا جماعة؟ استهدوا بالله…دي بتهزر معاكي يا شوشو انتي عارفة روان !
روان: لا ما اصل فلوس الصيانه دي مهمة عشان …راحت قسمت خبطاها في دراعها و وشوشتها وقالت: خلاص .. كفاية احراج!! !!!
قدمت حمدية العصير وقالت: الفطار جاهز يا ستي… !!
توجهوا كلهم على اودة السفرة اللي كانت متحضرة بعناية و شوشو: الفطار ده بيتعمل لي مخصوص من أغلى محل في مصر الجديدة:انا ديما حاجتي من عندهم!!….
روان بتوشوش قسمت : شفتي الانزحة الفارغة!! طب ادفعوا اللي عليكم الأول!!
صاحبات شوشو
و هما قاعدين بيفطروا رن جرس الباب و فتحت حمدية لقيت راضية فقالت لها : افندم
راضية زقت حمدية و دخلت علطول على اودة السفرة والضيوف قاعدين وقالت ل شوشو: الست رجاء اللي في الدور التاني بتقلك لازم تدفعي الفلوس اللي عليكي …فلوس الهدوم اللي اشتريتها من أبصر ده “” اللبس اللي هي كانت اشترته من بلاد برة وانتي اخدتي حاجات و مدفعتيش تمنها بقالك شهرين…!!
قسمت و ميار و روان بصوا لبعض و شوشو وشها احمر …و صرخت وقالت: اطلعي برة يا حيوانة…انتي ازاي تتدخلي كده علينا …انتي فاكراها سويقة !! برة والا هطلب لك البوليس!! !!
راضية: وانا مالي…. انتوا هتحشروني بيناتكم …هي تقولي انك نصابة و مبتدفعيش اللي عليكي و انتي تطلعى غيظك فيا…ده ايه الهم ده!! ….عامة الفواتير عندك أهم….فوتكم بعافية….