المعلم القصري
المعلم شوقي صاحب القهوة
ما زلنا على قهوة المعلم شوقي ، و الجميع بيحاول يفض الخناءة بين المعلم القصري صاحب مغسلة التنظيف الآلي” زهزهة” واللي اتخانئ مع الأستاذ إحسان و اتهمه انه كسلان و قاعد طول النهار ع القهوة بعد طلوعه ع المعاش.
المعلم شوقي صاحب القهوة: أهدى يا قصري و اشرب قهوتك!! !
القصري: لا إله إلا الله …بقى انا بقول رايي بصراحة يقوم يقول عليا حشري!
شوقي: كلامك تقيل و ده الحق…انت ربنا يزيدك عندك الدراي كلين بتاعك.و انت حر نفسك!
القصري: ايه القر ده …الله اكبر في عينك!!
شوقي: ربنا يزيدك يا سيدي بس الكلمة الطيبة صدقة برده…يلا قوم على اكل عيشك
القصري: على رأيك بلا قلبة دماغ!
على ترابيزة إحسان و الأستاذ شفيق
شفيق: انا فكرت لك ف فكرة هايلة …مش أنت عندك اودة على سلم الخدامين في بيتك عاملها مخزن!
إحسان: ايون مالها؟
شفيق: فضيها من الكراكيب و روقها و حط فيها عدة النجارة كأنها ورشة صغيرة لحد ما ربنا يفرجها…!
احسان: ورشة جوة البيت!! معقولة …طب و مراتي هتستحمل الرقع و الرزع طول النهار!!!
شفيق: رقع و زرع ايه! ده على اساس ان عندك اوردرات شغل لا سمح الله …انت هتشتغل ف الأول خفافي …لما ننشر الخبر في الحتة انك مستعد تصلح اشي كرسي مكسور او ترابيزة ملخلخة اهو لحد ما صيتك يسمع! و عندك ميزة أن الأودة دي على باب سلم الخدامين….. يعني لو زباين جم هيدخلوا من باب الشقة الخلفي عشان ميعملوش ازعاج لمرأتك..!
إنما حتت فكرة!…. كانت تايهة عني فين دي…احسان:
ينصر دينك يا شفشء عشان كده ليك عندي عزومة عسل … إيه رأيك نروح ناكل كباب عند “صبحي” الكبابجي !
شفيق وشه نور و ابتسم: معنديش أي مانع بس خليها يوم الخميس الجاي عشان صايم و يا سلام لو تصوم معايا..!
إحسان: انت عارف الصيام صعب عليا…. ده بصوم رمضان بالعافية! !
شفيق: ماشي ياخويا انا عارف تحب كرشك اوى… اصل ابني هيعدي عليا عشان هيسيب عندي ولاده ….اصله بيحضر الدكتوراة و رايح يشتري كتب…سلامو عليكم..
إحسان فضل لوحده وبيقول لنفسه”كانت تايهة عني فين الفكرة دي!!بس يا ترى سعدات هتوافق!!
—————‘———–
شوشو و هالة
في النادي…..
شوشو كانت على موعد مع صحبتها هالة اللي بتفكر تشاركها في مطعم سندوتشات ….
هالة: بونجور شوشو…عامله ايه ؟
شوشو:تمام..انا تقريبا قررت هنعمل ايه !
هالة: نعمل ايه في ايه يا روحي ؟
شوشو: المشروع بتاعنا !
هالة: مشروع ايه؟ !
شوشو : معقولة نسيتي !!
هالة: تقصدي فكرة المطعم…بصراحة انتي اتأخرتي في الرد وانا جديا فكرت انفذ الفكرة و لو لوحدي….!
شيرين: ايه الندالة دي…انا صاحبة الفكرة!! !
هالة: لا يا روحي انتي قلتي محل حلواني…. و جوزى عزت اللي اقترح سندويتشات..وانا عارفة انك مش عاجبكي الفكرة ..انتي مش مضطرة تعملي حاجة انتي مش مقتنعة بيها!!!
شوشو: بطلي اسلوبك ده…انا فاهمه طريقتك…انتي متعمدة تستفزيني… عشان اتضايقتي اني قلت لك افكر…ايه المفروض أني اقدم فروض الولاء و الطاعة!
هالة: لا ا…نتي مكسوفة انك تكوني عندك مطعم سندوتشات…عشان برستيجك… بس برستيجك يا روحي ولا هيأكلك و لا يشربك… طول عمرك تحبي المظاهر الفارغة…واللي ف الاخر ضيعتك…اصريتي تجوزي دكتور عشان تكوني حرم الدكتور…واهو طلعت مادياته ضعيفة… وبعد سنين مذاكرة ووجع قلب فتح عيادة بالعافية بعد ما اتداين ل طوب الأرض
…حتى ابنك الوحيد شريف مقدرتيش تسفريه يدرس برة زي ما
كنتي بتحلمي …وفي الاخر دخل جامعة حكومية!!
شوشو والدموع في عينيها: طول عمرى عارفة أنك بتكرهيني بس متخيلتش أن أخلاقك توصلك لكده!
….انا ميشرفنيش أساسا اني اشارك واحدة زيك…يظهر أن كتر عشرتك ل بياع سندوتشات الكبدة خليتك بيئة زيه و نسيتي أصول الأدب و الاتيكيت… افرحي بمحلات جوزك ….و الفلوس و الفيلا بس عمرك ما هتكون سعيدة لأنك عارفة من جواكي انك من زمان قبلتي تجوزيه عشان فلوسه مش عشان بتحبيه…. و بقيتي تجرحي الناس بحجة انك صريحة!!! لا ده انتي بقيتي مريضة
….
و اخدت شوشو شنطتها و موبايلها و مشيت…
هالة قاعده هادية على كرسيها بتدخن سيجارة و على وشها ابتسامة و قالت ل نفسها: اه جوزي بيئة بس مش شحات …. هتلفي تلفي و ترجعيلي برده…
المعلم ياقة
احنا في محل عم “ياقة” المكوجي
إحسان: سلامو عليكم يا معلم ياقة !!
ياقة: اهلا إحسان بيه اتفضل….
إحسان: أخبار قمصاني ايه خلصت؟؟!
ياقة: استني اشوفهملك …و دخل لمعلم ياقة يدور جوة و خرج… وقال: لسة والله يا باشا اديني بس ساعة زمن …والله زحمة شغل كثير…!
إحسان: الله يعينك اروح اشرب فنجان قهوة وارجع لك… !
وهو خارج لقي المعلم القصري صاحب داري كلين “زهزهة” ادامه
القصري: ازيك يا إحسان باشا!!!
إحسان: نحمده…!
القصري: ايكش تكون لسة زعلان منى…يا راجل ده انا كنت بنغشك..!
إحسان: تناغشني!!! تقولي انت قاعد ع القهوة زي العواطلية !!!
القصري: ذلة لسان …ميبقاش قلبك اسود… !
إحسان: طب حصل خير عن إذنك بقي رايح ع القهوة…
القصري: النبي ما هتشرب القهوة إلا بلا قافية في الدراي كلين عندي! عشان اتأكد انك مش شايل مني…!
إحسان: يا سيدي خلاص..
… خلينا ع القهوة القعدة شرحة واهو نتسلى!
القصري: ماشي الكلام ! اروح اشقر ع الواد “سافو” و اجيلك…
إحسان بيضحك: ايه سافو اسمه سافو… !
القصري: لا اصلا اسمه سمير بس انا قلت ادلعه دلع يليق بالمكان …و هو فيه أحلى من ريحة السافو..!
إحسان: طب هسبق أنا….
ووصل إحسان القهوة ولقى هناك سعيد الميكانيكي ابن أم سعيد وكان سعيد قاعد ضارب بوز شبرين…!
إحسان: أهلا يا باشمهندس
سعيد: اهلا إحسان بيه منور !
إحسان: ده نورك يا سيدي…بس مالك مش عوايدك تيجي القهوة ف وقت زي ده !
سعيد: اصلي مخنوق شوية!!!
إحسان: خير يا سعيد يابني… انا زى والدك ..فيه ايه ..فضفض!!
سعيد: ربنا يجبر بخاطرك يا باشا …انت عارف غلاوتك عندي بس انهردة حصلت حاجة ضايقتني…و حزت فيا اوى …
إحسان: في الورشة؟!
سعيد: لا في العمارة عند امي ….و سكت سعيد شوية و قال:
يرضيك يا باشا الست شوشو مرات الدكتور أنور انهردة تزعق ف امي عشان اخرت عليها شوية طلبات!! و لما امي تطلب منها تتكلم بالهداوة تقوم الست شوشو تقولها: انتي نسيتي نفسك!! ده امي في سن والدتها….ولا عشان امي غلبانه تقوم كرامتها تداس….!
إحسان: لا لا ميصحش طبعا….الست والدتك احنا معاشرينها من سنين و عمرنا ما شفنا منها حاجة وحشة…بس انت عارف شوشو عصبية هي صحيح صاحبة بنتي شيرين بس حقك عليا انا هتكلم معها…….
سعيد: عصبية على نفسها يا باشا مش ع الناس….انا امي عندي بالدنيا …انا روحت اطل عليها الصبح لقيتها مضايقة و دمعتها على خدها …و حكت لي اللي حصل…بس و ربنا انا مش هعدي الموقف ده!!! ….
إحسان: ما تصل ع النبي يا سعيد …متكبرش الحكاية….انا قلت لك هتكلم معها!!
سعيد: انت على راسي من فوق يا باشا بس مش انت اللي هتتكلم… اللي اتهانت دي امي انا… و انا بلا قافية اللي هجيب حقها…و قام سعيد متعصب و مشي!
إحسان بيضرب كف على كف و قال : يا حول الله يا رب بس بصراحة البنت شوشو دي طول عمرها عصبية و بتاعة مشاكل….يا واد يا قرفة..
قرفة :نعمين يا إحسان باشا
اجيب لك العناب ؟
إحسان: هات اتنين… اصل المعلم القصري جاي دلوقتي…!
قرفة: يا فرج الله أنتم اتصلحتوا!!!
إحسان: اه يا لمض….يلا روح…
المعلم القصري دخل القهوة و قعد على ترابيزة إحسان
إحسان؛ اتفضل يا قصري
القصري: تسلم يا غالي…ألا الأستاذ شفيق مش جاي!
إحسان : لا يا سيدي عنده أحفاده بيراعيهم… أنت عارف ابنه بيحضر الدكتوراه و مشغول لشوشته…!
القصري: ربنا يوفقه..المهم أخبار ورشة النجارة ايه …حلمك يا كبير! يلا بقى عايزينك تفتح الورشة و تمنجهنا إشي فوتيه و إشي برجير و اشي فورير!
إحسان: فورير ايه يا راجل! ده بتاع الستات ال الا فرنكا…!
القصري: وانا عارف بقي بسمعها كده ! المهم لو محتاج أيتها مساعدة اخوك موجود…و انا اعرف ناس كتير في الكار ده …اصلك لا مؤاخذة لسة عضمك طري… هتحتاج زقة ف الاول…!
إحسان : شكرا يا معلم انا عارف هعمل ايه …المهم ادعي لنا بس !
القصري: أهم حاجة الدعاية…حاكم اليومين دول الناس مبقتش تقرا جرايد خلاص…كل الاعلانات ع الفيس توك و شويتر!!!
إحسان بيضحك بصوت عالي: يا راجل .. اسمه فيس بوك و تويتر مش شويتر!
القصري: اصل العيال ولاد ابني هما اللي فهموني الله يسترهم…. عملوا صفحة باسم دراي كلين “زهزهة” و كمان بيعملوا صور و عروض…اه اومال ايه….الدنيا اتطورت ..الشغل كله في الشوكا فدية… !
إحسان: شوكة ايه يا راجل …اه انت تقصد السوشيال ميديا ؟
القصري: ايون هو البتاع ده …أحفادي فهموني الإصة كلها …واهي مشيت فلة الحمد لله !!!
إحسان: مانا شيفك لسة مغير العربية ربنا يزيدك…!
القصري ف سره : بعدين ف القر الدكر ده!! !!
و بيوجه كلامه ل إحسان: الموضوع مش سهل يا خويا …انا مغيرتش العربية عياءة…. دي كانت هتتقلب بيا فاتشئمت منها!!…
إحسان : يا راجل انت بتخزي العين… ربنا يزيدك!!!
و هما قاعدين سمعوا صوت خناءة على اول الشارع و ناس بتتفرج….و حصل هرج و مرج ف المكان …و قرفة القهوجي جري يشوف ايه اللي حصل!! و رجع بعد دقايق قرفة بينهج و قال: الحقونا ياخوانا الانسة مي بتتخانئ مع زبون كان راكب معها ….و فتحت له دماغه والراجل راسه بتشغى دم !
إحسان والقصري جريوا على عربية مي… ولما قربوا من العربية اتفجئوا أن……..
نلتقي في الحلقة القادمة إن شاء الله تعالى