احنا في اودة أم سعيد
…عملت القهوة و مستنية صاحبتها الست اعتدال ….بعد ١٠ دقايق اعتدال وصلت
اعتدال: السلام عليكم…اديني جيت اهو …. وغوشتيني …خير
ام سعيد: طب استني لما تاخدي قهوتك!
اعتدال: و ادي قعدة…راحت قاعدة على الكنبة، و ابتدت تشرب القهوة
بدأت أم سعيد الكلام: بصي يا ستي الواد سعيد ابني بيقولي…ان المحل اللي تحت العمارة بتاع الخواجة وديع معروض للبيع …و بيقولي يامه نشتريه و نعمله سوبر ماركو
اعتدال: بس ياختي ده هيبقى بفلوس ياما!!
ام سعيد: مانتي عارفة سعيد ابني شايل قرشين حلوين مع حبة صيغة ليا و تدبر!
اعتدال: يبقى على خيرة الله….ربنا يجعله قدم السعد و الهنا
أم سعيد : يعني رأيك اتكل على الله؟ !
اعتدال: و دي محتاجة تفكير ..خير البر عاجله ..النبي لولا الملامة كنت رقعت زغروتة!
ام سعيد: الواد و اخته مش لادد عليهم شغلانة البوابة ..انتي عارفة من زمان بيقولوا ده مش مقامنا!
اعتدال: عندهم حق….ربنا يخليلك ولادك مش مخلينك محتاجة حاجة…بعدين صحتك معدتش تستحمل خدمة سكان العمارة…خصوصا سعيد مشغول في ورشته و راضية في المحل
أم سعيد: انا بردة لسه بقلبها في دماغي
اعتدال: الفرصة مبجيش إلا مرة واحدة و متأخذونيش هتلاقي ميت مشتري لو الموضوع انتشر في الحتة!
أم سعيد: ما الواد ابني قالي كده برده …عامة انا هصلي العشا و استخير و الله المستعان !!
—————‘
على قهوة المعلم شوقي اللي في آخر الشارع
قرفة القهوجي بيكلم الأستاذ احسان
قرفة: اجيب لك العناب يا باشا؟
إحسان : يا واد انا مش قلت لك مية مرة بلاش باشا دي !!!
قرفة : طب نجيب لك قهوة يا استاذ؟
إحسان: هات عناب يا لمض عقبال ما الشلة تيجي…
قرفة: شلة الأرشانات؟
احسان: إرشانات ايه يا قرد مسلسل انت! !
قرفة: بضحك معاك …بسليك
إحسان: طب امشي دلوقتي….
قرفة بصوت عالي: و عندك واحد عناب مشبر للأستاذ إحسان و صلحه
بعد دقائق جه الأستاذ شفيق
شفيق: سلامو عليكوا يا سحس!
إحسان: و عليكم يا سيدي…بص بقى انا خلاص طهقت من قعدة البيت …شوف لك صرفة
شفيق: مانا قلت لك ..موضوع الجمعية اللي كنا معتمدين انك تقبضها و تجيب لوازم الورشة….باظت الليلة بسبب بنتك شيرين اللي اخدت دورك في الجمعية!
إحسان: انت بتباكتني يعني!! البنت حامل و محتاجة فلوس تشتري عربية…كنت عايز اقولها لا و اكسر نفسها ؟؟
شفيق: اه تقول لا …مش ملزم…. اومال لا مؤاخذة جوزها لازمته ايه ف الحياة !! انت جوزتها و خلاص… ….
إحسان: زمانهم صعب يا شفيق يا خويا …يلا ربنا يسهلها من عنده …يا واد يا قرفة العناب فين؟
رد راجل على الترابيزه اللي جنبه:ما براحة على الواد قرفة انت مش شايف زحمة الطلبات!!
واللي بيتكلم ده المعلم القصري صاحب دراى كلين اسمه “زهزهة” معلم جدع وابن بلد وديما يقعد على القهوة يشاكس الاستاذ أحسان ..
إحسان: النبي يا معلم قصري نقطنا بسكاتك!! حاكم انهردة مزاجي مش ولا بد!!
القصري: ليه بعد الشر….صل ع النبي…انت اللي بلا قافية بعد ما طلعت معاش و صوتك علطول عالي و متعصب …ما دي سنة الحياة…بس لا مؤاخذة قعدتك ع القهوة طول النهار مش حل للمشكلة….متأخذنيش انت بصحتك زي الهلف مش معقول هتقضيها ع القهوة تلعب طاولة !
إحسان: وانت مالك يا راجل يا حشري …وانت ازي تتخطى حدودك معايا…الناس اتهبلت باين !!
القصري: أما أنت راجل مهفوف صحيح ….الحق عليا بنصحك !:
إحسان ساب الترابيزة و راح ناحية القصري وقاله: طب لم لسانك لأحسن أغلط بجد !!
الأستاذ شفيق اتدخل وقال: يا جماعه مش كده…صلوا ع النبي …أنتم هتتخنئوا ولا ايه …ده احنا ولاد حتة واحدة
إحسان : انت مش سامع الراجل ابو لسان طويل السمج بيقول عليا اني زي العواطلية!
القصري: يعني كلمة الحق بتزعل ؟؟
ابتدا زباين القهوة يتلموا مع علو الصوت و حصل هرج و مرج ف المكان…جه المعلم شوقي صاحب القهوة وقال :
جرى ايه ياخوانا عيب كده ..ده أنتم رجالة كبارة اومال سبتم ايه للعيال!!
مسك شفيق إحسان من ذراعه.. و اخده على جنب و ابتدا يهديه ، اما المعلم شوقي فبدأ يهدي المعلم القصري و قاله بصوت واطي: بردك يا قصري ميصحش…الراجل طلع معاش من كم شهر و مزاجه زي الزفت تقوم انت تباكته و ترزعله كلام زي الدبش!
القصري: بدردش معاه …ايه الكلام حُرُم؟!
شوقي : لا محرمش بس بالهداوة ده انت ابن سوق…
….تعال معايا اعزمك على فنجان قهوة …و خده المعلم شوقي على جنب وطلب من قرفة يعمل القهوة ….
على ترابيزة إحسان و شفيق…
شفيق: أهدى بقي
إحسان: راجل سليط اللسان!!!!
شفيق: يعني انت متعرفش القصري…لسانه طويل… بس قلبه ابيض..
إحسان : ابيض ولا كاروهات لنفسه… مش ليا باين الراجل اتهبل!! ولا اكمنه صاحب مغسلة آلية و الدنيا مبشبشة معاه هيذلنا…
شقيق: ماحنا بيني و بينك طول النهار ع القهوة …و بيضحك …
إحسان: انت كمان قاصد تفور دمي!!!
شفيق :بضحك معاك ….تعالى بقي احسن جت لي فكرة انما ايه عال.. لسة كنت هقولك عليها قبل خناءتكم الهايفة دي!!
!!
إحسان ابتدا يهدى و يمسح عرقه وقال: اتفضل كلي آذان صاغية…
شفيق: انا لقيت لك مكان تعمل فيه الورشة و مش هتدفع ولا مليم !!
إحسان : ازاي ده ؟؟
شفيق: بص يا سيدي………
نلتقي في الحلقة القادمة إن شاء الله