في بيت الأستاذ رفعت من الشباك بينادي!!
رفعت: يا ولد يا قرفة!!!
قرفة صبي القهوجي: نعمين يا رفعت بيه!!!
رفعت: الشلة جت عندك عمك إحسان و الأستاذ شفيق؟
قرفة: لا يا باشا لسة …بس متقلقش انا حاجز لكم الطاولة و شبرتلكم حبة عناب…
رفعت: تسلم يا قرفة نص ساعة اصلي العشاء و انزل!!
دخل رفعت الصالة لقي أخت مراته الست نعمات قاعدة بتشرب فنجان القهوة و بتتفرج ع المسلسل….
نعمات : متأخذنيش يا اخويا…. اصلي متابعة المسلسل ولا حابب تغير المحطة؟!
رفعت : لا براحتك انا نازل علقهوة …المهم انتي في بيتك و لا يهمك و جوزك ده حسابه معايا !
نعمات : ربنا يبارك فيك طول عمرك اخ كبير ..
رفعت : كلمتي ولادك في الخليج! انا شايف مالوش لازمة تقلقيهم ما كلنا حواليكي…!
نعمات: لا مش هكلم حد…انا مش ضعيفة …كل واحد فيهم عنده همه و لا هيزودوا و لا ينقصوا حاجة..انا مش ههزإ نفسي دى مشكلتي وانا اللي هحلها…!
رفعت : اللهم صل عالنبي ايوة كده ربنا يكمل لك بعقلك..كله بيعدي بأمر الله تعالى…عن اذنك اروح اصلي والحق الشلة ع القهوة..
دخلت مي الصالة: ازيك يا خالته….والله انتى منورانا…يا ريت تتخنأي مع جوزك علطول عشان تقعدي عندنا!!!
نعمات الدموع في عينيها: اسكتي يا مي خالتك مقهورة…انا ضيعت عمري بخدمته هو و ولاده و لما اعجز يدور على واحدة نعنوعة! طب اناعجزت !! هو معجزش!! ما دي سنة الحياة! معنى كده اني ادور على راجل صغير في السن واقول ده حقي….اخص عليه راجل دون …انا قررت يا مي مش هكلم ولادي في الخليج ولا هشحت حنية حد ..اكمني مش بشتغل يبقى بسلامته فاكر اني محتاجة لقمة و حتة انام فيها!! ابدا ده انا نعمات القوية… انا هدور على شغل و اعيش من عرق جبيني و مصرة ع الطلاق انا عندي كرامة و عزة نفس !!
مي و هي بتحضنها: الله يا خالتو…. الله انا مش مصدقة انك قلتي الكلام ده…هو ده اللي مفروض يحصل مش قادرة اتخيل ان عندك الوعي ده وانتي مكملتيش تعليمك…!
نعمات:…التعليم مش بالمدارس و الجامعات… الحياة يا مي اجدع من أيتها جامعة ولو كانت جامعة فارفرد……..
مي: ايه فرفرد دي….تكوني تقصدي هارفارد؟!
نعمات : وانا عارفة بقي.. انا سمعتها كده ..المهم تعالي نفكر ايه الشغلانة اللي اشتغلها… و على فكرة مش هقول لامك..اصلها لها نظرة سوداوية.. و هتقفل لنا الدنيا… !
مي: عين العقل…اروح اعمل لنا كوبيتين شاي عشان نفكر مع بعض و دخلت المطبخ تعمل الشاي…
نعمات بتضحك و تقول ل نفسها: بكرة تشوف نعمات اللي انت مستقل بيها هتكون ايه يا شايب يا متصابي ….!
—————-
أم سعيد و راضية
أما راضية بنت البوابة هي بنت في العشرينات, خريجة دبلوم تجارة وبتشتغل بياعة في محل الصبا والجمال, وأخوها سعيد بيشتغل ميكانيكي و خريج دبلوم صنايع. وهما الاتنين بيحترموا أمهم انها شقيت و ربيتهم بس طلبوا منها تسيب شغلانة البوابة لان هما مش محتاجين ماديا..سعيد بيكسب كويس من الورشة، و راضية بتاخد مرتب معقول مع أنها بردة عندها شغلها الخاص فهي عملت حساب على التيك توك بتبيع فيه ايشاربات وعبايات وبتكسب منه كويس …
بس أم سعيد رفضت تسيب شغلانة البوابة كمان رفضت تعزل لما سعيد قالها انه اشترى شقة في التجمع، من شقى و تعب الورشة …وقالها ممكن يعزلوا فيها هي رفضت وقالت له: خلي الشقة تتجوز فيها بس انا مقدرش اسيب الحتة اللي عشت فيها تلاتين سنة!!
محل الصبا والجمال
جوة محل الصبا والجمال
…المدير كان طلب يقابل راضية بعد ما واحدة من الزباين حاولت تسرق بلوزة لكن راضية شافتها وشديتها من دراعهاو رقعت بالصوت والمحل اتلم…و حصل هرج و مرج ف المكان….
المدير: اهلا …عجبك المناظر اللي عملتيها!!!
راضية: مناظر ايه!!! يعني بدل ما تشكرنى..دي ست حرامية وايدها طويلة …ولا حاجة نقصت من المحل انا اللي هتجازى!!
المدير: لا كان ممكن تحتوى الموقف بهدوء بدل ما تلمي علينا الناس و نتفضح!
راضية: لا بعد كدة لو شفت حد بيسرق هبلغ حضرتك عشان تحتوى الموقف يكون المحل نصه اتسرق!!
المدير: بلاش غلبة….انا مش فاضيلك…قلتي لاخوكي ع العربية اللي قلت لك عليها
راضية: لا الصراحة نسيت!! !
المدير: قلت لك محتاج عربية لانسر بحالة كويسة واخوكي ميكانيكي جامد اكيد هيعرف يلاقي حاجة كويسة..!
راضية: ابقى ابعت لك موبيله تكلمه أنت!!
المدير: يا ساتر مبقاش حد عايز يخدم حد…طب مع السلامة اتفضلى على شغلك
خرجت راضية وهي بترزع الباب وراها و بتقول: يا لهوي على تقل دمك …النبي لا هقوله ولا هعبرك…!