في بيت عادل وشيرين
عادل
شيرين
👇🏾
احنا في نفس العمارة شقة عادل وشيرين
في الليفنج رووم
عادل شاب في الثلاثينات بيشتغل مصور في مجلة وعنده شغله الخاص برده تصوير على الانستغرام، وهو متجوز شيرين من ثلاث سنين
و شيرين من نفس سنه وبتشتغل مدرسة في حضانه للأطفال وديما تشتكي بسبب شغل البيت مع عملها في الحضانة مرهق جدا وخصوصا أن عادل مش بيساعدها بسبب زحمة شغله.
عادل قاعد على الكنبة وهو بياكل فزدق و كاجو، و بيتفرج على ماتش كورة في التلفزيون …دخلت شيرين و قعدت على الكنبة جنبه
شيرين: انهردة انا هلكت في الحضانة…. العيال طلعوا عيني….و دوشة وعياط و اوليأء امور بيشتكوا… و محدش عايز يبطل طلبات …إدارة الحضانة طلباتها مبتخلصش و كمان….قاطعها عادل
وقال: هو كل يوم نفس الكلمتين….ماخلاص …اتعودي…ده حتى كتر الشكوى يجيب اكتئاب!!
شيرين وهي بتزعق:….ده انت اللي بتجيب اكتئاب….و مية مرة اقول لك لما تاكل فزدق مترميش القشر على الترابيزة فيه اختراع اسمه طبق….انا مفياش حيل الم وراك…. !!!
عادل: طب ادخلي نامي…شكلك هتطلعي زهقك عليا….
شيرين: لا مش هنام….انا مستنية ماما هتيجي كمان شوية جايبة من البلد فطير مشلتت و جبنة قديمة… وأصرت تيجي تهدينا منهم
عادل كشر و بان عليه الزعل: يعني امك جاية دلوقتي؟!
شيرين: اه خير….كنت اقولها مجيش،ما كتر خيرها….كل شوية تدينا اكل عارفة اني مش بلحق اطبخ…. !!
عادل: اه بس الفكرة انها كل ما بتيجي بتبقي جايبة لا مؤاخذة النكد …معاها …مفيش مرة تيجي فيها إلا لما ندب خناءة…
شيرين: بقولك ايه انا مصدقت و مش فاضية للخناق…. هي كده كده لازم تمشي بسرعة لان عندها فرح
عادل: أحمدك يا رب!!
الباب خبط …شيرين راحت تفتح وقالت: اهلا ماما
امها: اهلا …خدي مني الحاجة سخنة مولعة
عادل بابتسامة باردة: اهلا يا طنط!!…
ام شيرين وهي مكشرة: اهلا….
عادل : البيت بيتك…انا بس لازم ادخل انام اصل عندي شغل بعد الضهر
أم شيرين: وماله ياخويا اتفضل…
دخل عادل اودة النوم و بقت شيرين وامها لوحدهم
شيرين بصوت واطي: ها يا ماما عرفتي تجيبي لي دور في الجمعية ؟
امها: بالعافية الست احسان عطيتك الدور الخامس!!
شيرين وهي بتزعق: خامس ايه بقولك كده العربية هتروح من ايدي…ده انا ما صدقت يكون عندي عربية…طلع عيني في المواصلات!!
امها: وطي صوتك لا المخفي جوزك يسمع…مانا هديكي بدالي دورى في الجمعية ال٢ و اخش انا مكانك… !
شيرين بصوت كله فرحة: يا روحي يا ماما ربنا يخليكي ليا…
أمها: ده عشان غلاوتك بس….اوعي تقولي لابوكي احسن انا قلت له ان حصل ظروف عشان كده هقبض متأخر…انتي عارفة هو بعد ما طلع معاش نفسه يعمل مشروع ورشة النجارة اللي طالع لنا في المقدر و كان مستني فلوس الجمعية….
شيرين: عشان الحركة الجدعة بتاعتك دي يا ماما هقولك خبر حلو !!
امها: ايه…اترقيتي؟؟
شيرين: لا يا ماما ترقية ايه حاجة احلى كان نفسك فيها!!!
الام : اوعي تقولي …
شيرين قاطعتها: ايوة يا ماما….انا حامل
نلتقي في الحلقة القادمة إن شاء الله