الساعه 11 الصبح دخلت شوشو وقالت :صباح الخير يا هالة !
…عايزة اسمع أخبار حلوة… قوليلي أن جوزك عزت وافق على المشروع!
هالة: استني خدى نفسك الأول و اشربي القهوة …و بالفعل جه الوايتر و قدم القهوة لشوشو ابتدت تشربها وقالت : يا سلام احلي قهوة بشربها هنا !! يلا يا هلول قوليلي عزت قالك ايه رأيه ؟
تنهدت هالة وضحكت وقالت : شوفي يا ستي…..هو وافق على المبدأ بس عنده تحفظ على فكرة نوعية المشروع!! !
شوشو :مش فاهمه !
هالة: مش عجباه فكرة الكب كيك و الجاتوه دي بيقول نختار حاجة الناس متختلفش عليها …
شوشو: اه ما احنا ممكن كمان نقدم كرواسون و كريب …
هالة بتوشوش نفسها: دي هبلة دي ولا ايه … و بعدين وجهت كلامها لشوشو: لا قصده سندوتشات …بيتزا …فطاير كده يعني!!! !
شوشو: ايه فطاير!!!! ناقص تقوليلي كبده و سجق زي محلات!!!لا مستحيل الناس تقول عليَّ ايه !!
هالة منفعلة: و مالها الكبدة و السجق !!! خلي بالك من كلامك …ومدت ايدها لتمسك موبايلها و حطته في الشنطة وقامت من مكانها!
شوشو: متزعليش انا مقصدش!!
هالة وهي بتبعد ايديها: حصل خير لازم امشي عندي معاد …
شوشو: متقعدي بقي بلاش هبل …
هالة رجعت لكرسيها و طلعت سيجارة
شوشة بصوت عادي: أنا بفكر معاكي بصوت عالي…بس اديني فرصة اقول لانور زوجي
هالة: هو انتي لسة مقلتيلوش؟
شوشو:قلت له حلواني مش فطاير و كبدة!
هالة: طب متنسيش برده تعرفي ناويين تشاركوا بمبلغ اد ايه؟ !
شوشو: لا مانا عندي وديعةفي البنك بمليون جنيه!!!
هالة: مليون جنيه !! لا دول تفتحي بيهم كشك حضرتك!! مش اقل من تلاته مليون…اه ده لسة ايجار المحل و المعدات !!
شوشو: هو عزت مش هيساعد؟
هالة: احنا هنطمع من اولها!!!
شوشو: من فضلك…. مسمحش تكلميني كده…. انا ممكن أساهم بالإدارة مع المبلغ …
هالة: لا شكرا لو اقل من تلاته مليون ميلزمنيش ….
شوشو: طب اديني يومين ….
هالة: براحتك….خدي وقتك ومسكت شنطتها عشان تقوم
شوشو وهي بتكلم نفسها: بقي شريفة هانم بنت الأصول على آخر الزمن تفتح محل كبده و سجق!!!
في نفس العمارة نرجع لبيت المهندس حسين عبد الدايم و مراته امتثال وبنتهم مي اللي
ملت من قعدة البيت…. وفكرت مي ان بما ان عندها عربية فممكن تشتغل اوبر لتوصيل الناس!
الام: يا خبر ابيض!!! بقي بنتي على آخر الزمن تشتغل سواق تاكسي !!
مي: مش احسن من القعدة….انا جالي تخلف من فرجة التلفزيون، زهقت من الفيسبوك والانستجرام، و انتي و بابا بتزلوني عشان تدوني فلوس!! !
الام: مش مبرر برده…بذمتك مش مكسوفة من نفسك!!!
مي: لا الشغل مش عيب هو انا رايحة اشتغل رقاصة!!!
الام: اخرسي … وبصت لجوزها وقالت : وانت يا رفعت مش هتقول حاجة!!!
الاب: اه هقول….بص لمي و ابتسم وقال: ربنا يبارك فيكي فكرة هايلة ..من بكرة نروح ورشة سعيد الميكانيكي يضبط العربية!!
الام: انت هتجنني يا راجل …ورشة مين يا راجل !!!! يعني أنت موافق ؟!!
الاب: الزمي حدودك..اللي فقري بجد هو انتي…. انتي نسيتي بعد ما اتقدمت لك بيومين…البعثة بتاعتي باظت!! الله يرحمها امي حذرتني وانا مسمعتش كلامها!!!
الام بصوت واطي :كانت جوازة ما يعلم بيها إلا ربنا!!
مي مبتهجة: فرحانة يا بابا انك فاهم دماغي…. انا حالا هلبس عشان ننزل ورشة سعيد!
الاب: لا استني اغسل ايدي و أتوضأ واصلي العصر، و أروح معاكي…
مي جريت على اودتها عشان تجهز . و الأب راح الحمام. أما الأم فبقت في الصالة وهي مذبهلة !!!!
بعد دقائق رن جرس الباب فتحت الام الباب وقالت بصوت عالي فرحان: مش قادرة اصدق… نعمات اختي يا الف مرحبا…دخلت نعمات و هي اخت غير شقيقة لامتثال، ست في الستينات ، لابسة عباية سوداء و طرحة سوداء، قعدت على الكرسي و قالت: قبل أي حاجة الحقيني بكوباية مية ….
راحت إمتثال المطبخ و جابت كوباية مية . و شربت الست نعمات المية و بصت لاختها وقالت: شفتي المصيبة اللي حصلت لي يا امتثال يختي!! !!
امتثال: بعد الشر مصيبة ايه؟ !
نعمات: الموكوس جوزي عشرة ال30 سنة ..ابو عيالي …اتجوز عليا !!
امتثال وهي بتخبط على صدرها : نهاره أسود!!!!!
بعدين…. …….