د.أنور
شوشو
مصر الجديدة، ميدان الجامع ، الدور الثالث، ساكن فيه الدكتور أنور و
مراته شريفة واسم الدلع شوشو. و انهاردة بيحتفل د. أنور بافتتاح عيادته في حي المعادي. و قام
بدعوة أستاذه د. مراد و حرمه على العشاء بالمناسبة السعيدة دي. و في الواقع،
مدام شوشو كانت في أشد الحاجة للسهرة دى… عشان من ساعة ما رجعوا من أمريكا
لأن جوزها كان بيحضر الدكتوراه هناك، وهي
كانت حسة بالملل. فجوزها مشغول معظم الوقت بين أوراقه و أبحاثه. و كتير
طلبت منه شوشو أنه يعزم صحابه، و لكنه
بيرفض لإن معندوش وقت للإجتماعيات . وفكرت شوشو بعد العشا تفاتح جوزها في المشروع اللي بتحلم بيه.
وشوشو معندهاش
إلا ابن واحد اسمه” شريف”عنده 18 سنة وعلطول مشغول بمذاكرته و صحابه
. و بتحلم شوشو بأنها تفتح
محل حلواني شيك يقدم البسكوت و التورت. لكن هل يا ترى
هيوافق د. أنور !!
بيت د. أنور و شوشو
بعد انتهاء حفلة العشاء عملت شوشو فنجان شاي لأنور. و بدأت تتكلم
معه عن استمتاعها بالعشاء، و قد ايه انبسطت بصحبة د. مراد ومراته،بعدين
طلبت منه أن تفاتحه في موضوع مهم. فقال لها : هو فيه حاجة مهمة يا شوشو
و لا نأجلها لبكرة!
شوشو:بكرة الصبح انت بتروح الجامعة و بالليل في العيادة يعني مفيش وقت!
أنور: طب اتفضلي بس يا ريت تختصري!
شوشو: شوف بقي انا زهقت خالص… انت علطول مشغول و من ساعه ما رجعنا
من السفر،وانت بين الجامعه و الاستعداد لافتتاح العيادة، و ابننا الوحيد شريف
حتي… ولا بشوفه لأنه اما بيذاكر أو مع اصحابه !
أنور: ما قلنا نختصر!!!
شوشو:
عايزة اعمل مشروع….انا بحب اعمل
الكحك و البتيفور و الكيك….و متنساش أن واحنا في امريكا اخدت كورسات في الخبز وعمل الحلويات
قاطعها أنور: و درستي الموضوع ؟
شوشو بتضحك : يعني انت موافق؟
انور: مقلتش موافق بسأل درستيه كويس؟
شوشو: مش فاهمه!
انور: المحل اللي هتأجريه…مكانه…التكلفة….التلاجات اللي هتعرضي فيها ؟؟ الفلوس منين؟ اقصد التمويل؟؟؟
شوشو : ايه كل ده!!
انور: اومال حضرتك فاكره ايه ؟
شوشو: أنا كنت عايزة اخد موافقتك المبدئية بس.
أنور: المبدأ اوك انا موافق بس لعلمك انا مش هدفع مليم في الموضوع ده…. انا صرفت كل فلوسي في العيادة !!
شوشو: أنا معايا وديعة من ميراث بابا الله يرحمه
انور: أنا بفضل تدخلي شريك معاكي، اهو نخفف المخاطرة!
شوشو: تقصد مين ؟
انور: هو في غيرها…هالة السعدي صاحبتك مرات المليونير عزت ابو العز!!
شوشو: و تفتكر أن هالة مرات المليونير ، هتحتاج تدخل مشروع دى ما شاء الله …..فيلل و خدم و سواقين!!
انور: خالص هتقري على الست…انا عارف ان هالة انسانه عملية و رغم اني لا أطيق زوجها لكن انا بحترمها فرغم أن هي من اصل شعبي عمرها ما استعرت
من اصلها، وديما تكلم عن أن أهلها كانوا بسطاء، و حتى جوزها ابتدا حياته بمحل بسيط لحد ما بقي صاحب اكبر محلات سجق و كبدة في البلد….هو مين ينكر أن كبدة ابو العز كل الناس بتتكلم عنها !
شوشو: انت بتتريأ …انا عارفة انك مش بتحب جوزها ..بس انا شايفة ان مش عيب انه راجل عصامي بدأ من الصفر!!
انور: أنا لا أنكر أني بستتقل دمه بس عمري ما أكره حد عشان عصامي بدليل
اني بحترم مراته ..لكن هو اللي ديما يحاول يتباهى بعربياته و فيلله و محلاته
محدث نعمه…المهم متوهيناش اعزميهم عندنا على فنجان شاي و ربنا
ييسر
شوشو: فنجان شاي ايه يا دكتور!! دول ولاد بلد… معندهمش الكلام ده لازم عزومة
نكلفها فراخ و ديك رومي و لحوم…اومال ده مقامنا…. ياما الصراحة عزمونا
و احنا عمرنا ما ردناها !!
انور: خالص كلميهم بكرة و اعزميهم… يلا يدوبك نلحق ننام
شوشو
هالة
الصبح بدرى
صحيت شوشو وهي في كامل نشاطها،و دخلت الليفنج تتصل
بهالة و تعزمها على العشاء، بدأت المكالمة بالسؤال عن هالة و صحتها واخبار الولاد في المدرسة بعدين عزمتها على العشاء الا ان هالة رفضت تماما فكرة العشاء
عشان عملة ريجيم قاسي، ،”عند اكبر دكتور دايت في البلد”… و مش هينفع تاكل أي نشويات او أكل غير صحي وأصرت أن تكون
الدعوة على الشاي…..وأمام اصرارها وافقت شوشو و الساعة التاسعة كان هالة و زوجها عزت وصلوا إلى بيت أنور و شوشو ….كانت الجلسة لطيفة و لكن فاجأهم عزت بأنه جاب سندوتشات كبدة
و سجق من محله الشهير مع اصراره على اعداد عصير فخفخينا معتبر و هو
اللي هيعمله بنفسه ….و اصرت شوشو أن كلهم يروحوا المطبخ عشان يتفرجوا على عزت و هو بيعمل العصير، فهي عايزة تشوف سر الطعم الرائع.
و بعد العشا، بدأت شوشو الكلام مع هالة في التراس، و
رحبت هالة بالفكرة إلا أنها قالت انها لازم تفاتح زوجها في الموضوع، لأن هو اللي هيمول… و بعد العشاء . رجع هالة و عزت البيت.
هالة وعزت
وبعد ما شربوا الشاي …. فاتحته هالة في الموضوع و قالت: ايه رأيك في الدكتور أنور و شوشو!
عزت: شوشو لطيفة بس بسلامته دمه يلطش!!!
هالة: أنا عارفة انك مش بتستلطفه! !!
عزت: هي عشان صحبتك انا قلت اجاملهم …وقصدت اكون صاحب
واجب….واجيب سندوتشات من المحل اصلي ابن بلد و افهم ف الأصول
!
هالة: و حياتك انت اللي غاوي تعب دول ناس الا فرنكا… مش بيفرق معاهم الحاجات دي!!
عزت : أنا مقدرش ادخل على حد ايدي فاضية ايه رايحين نشرب شاي هو احنا عندنا دور برد!! المهم انا حاسس انك عايزة تقولي حاجة؟
هالة: هو انا بعرف اخبي…مانا لمحتك وانت بتبص لنا انا و شوشو واحنا بنتودود في التراس!!
عزت: و ايه بقي الموضوع؟
هالة: و لا حاجة عايزة تشاركني!
عزت: تشاركك ازاي؟؟
هالة : نعمل مشروع مع بعض..عايزة تفتح محل حلواني
عزت مستغرب : حلا ايه !!! حلواني