القاهرة، حي مصر الجديدة
تسكن في أحد العمارات العريقة في منطقة ميدان الجامع في حي مصر الجديدة عائلة المهندس رفعت عبد الدايم. وهو مهندس بيشتغل في حي مصر الجديدة وعنده 55سنة. و زوجته دكتورة امتثال،في نفس عمره و بتشتغل في هيئة التأمين الصحي. و عندهم شابة اسمها مي. و هي خريجة كلية الاقتصاد و العلوم السياسية، و لسة بدور على شغل.
امتثال
رفعت
الصبح بدرى داخل بيت المهندس رفعت عبد الدايم
رفعت: صباح الخير يا امتثال فين الفطار كده هتأخر عالشغل!
امتثال: ليه هي بنتك مي لسة محضرتوش؟؟
رفعت: باين انها لسة نايمة !
امتثال: طب هقوم اهو …قامت متكاسلة و هي بتوشوش نفسها: متحضره لنفسك ايه الغلب ده!!
في البلكونة امتثال حضرت الفطار زي اي طبقة متوسطة الحال فول و طعمية و جرجير و جبنة بيضا
مي
وهما بيفطروا دخلت بنتهم مي
مي: صباح الخير
امتثال: ايه يا بنتي مش قلتي هتصحي بدري عشان تدوري على شغل!
مي مبوزة: أنا بصراحة زهقت ٦ شهور بدور و بلف على بنوك و اقدم ورق و ولا الهوا…انا عارفة لازم واسطة كل زملائي اللي اشتغلوا في بنوك كبيرة وسايط
رفعت: ارجع لنفس الموال و احنا يا بنتي وسطتنا ربنا …..
مي: و نعم بالله….. معلش يا بابا مودي وحش…..
رفعت: مودي مين ده يا بنت؟!!
مي: مودي يعني مزاجي يعني خُلقي ضيق استحملوني!!
امتثال : مانت يا رفعت لو كنت كلمت جارنا اللي في الثالث ثروت كان شاف لها حاجة ده راجل ايده طايلة
رفعت: بقلك ايه بلاش قلة قيمة… الراجل ده مريب انا مش فاهم له شغلانة….. بيقول على نفسه انه “رجل أعمال”يعني تفهمي انه نصاب!!
امتثال: بقي يا راجل عشان ربنا فاتحها عليها يبقى حرامي بلاش حقد بقي !!
رفعت : حقد!!! اسحبيها والا…. و ربنا ما اخليكي تطلعي عندهم تاني…… طبعا ما مراته الحاجة زهرة كل شويه تغيظك بيشتروا ايه …و أكلوا ايه
سافروا فين…وانتي تيجي تطلعيه علينا!!
.. ..يبقى مين اللي حقود!!!
امتثال : انا …. أخص عليك!
مي: متصلوا على النبي هو انا ناقصة توتر……بقلكم ايه انا احسن اروح انام!
امتثال: طب كلي لك لقمة !!
مي: نفسي اتسدت!!
رفعت :عجبك كده!! ست نكد!
واخد مفاتيحه والموبايل ……و راح فتح الباب و رزعه جامد وراه ….
مفيش ٥ دقايق كانت امتثال كمان لبست و اخدت شنطتها و راحت شغلها ……بقيت مي لوحدها في البيت نايمة و بعد ساعتين…. رن جرس الباب ……و فتحت مي الباب وابتسمت وقالت…..