الصورة بعدسة : Abdallah Khaled
مشهد من تأليفي
في بيت الاسطى عرفة !
حوار بينه و بين ابنه علي
عرفة : يا بني اصبي شوية….مامتك قالت ساعتين وجاية
هتلطع نفسك في الشباك ساعتين !
علي: هى وعدتني اني لو جبت درجات كويسة هتجيب لي سكوتر زي بتاع محمد جارنا….و انا هقعد استناها مش هزهق….خش انت ارتاح يا بابا !
عرفة : ارتاح….هو اللي عنده عيال بيرتاح….. اخوك جوة ضارب بوز شبرين ….قال عايز 200 جنيه …..هو انا بنك يا بني…لسة واخد مني الاسبوع اللي فات 100 جنيه …قوطع السيبر كافيه اللي شافط كل فلوسه…..و يا ريته ناجح في المدرسة لا….وكمان بينجح بالزق…
علي: ماما هي السبب ….مانتوا بتتخنأوا كل مرة بسببه و ماما بتروح تحامي له و تديله فلوس ….
عرفة : انا اسطي نجار على باب الله…… مش فاتح بنك….و انا قلت له لو مش فالح في العلام….يجي معايا الورشة يتعلم الصنعة على اصولها…بس امك بقي اللي قال ايه….مش عايزة ابنها يطلع صنايعي…. ليه يعني تقوليش مخلفة أحمد زويل !
علي: ما هي بصة ل اسلام ابن أختها….اد خالد بالضبط و أشطر بكثير….
عرفة: و احنا مالنا بالناس….كل واحد و مقدرته…و بعدين اسلام ده واد جدع مش بس شاطر في المدرسة…لا ده كمان بيشتغل بالليل في الصيدلية اللي على اول الشارع….واد ب 100 راجل هو اللي شال المسئولية بعد وفاة ابوه….
علي: طب متخلي خالد اخويا هو كمان يشتغل مع الدراسة!
عرفة : يتنيل…هو اصلا موافق….يعني خايب و كمان متآلط….بس و رحمة أبويا ان سقط كمان السنة دي مانا دافع ولا مليم بعد كده…و مش هتحايل عليه عشان يجي الورشة…ان شاء الله عنه ما جه…
علي : اهدى يا بابا ….متزعلش نفسك انا على السنة الجاية ممكن اشتغل واساعدك…
عرفة: هو انا مستنيك تشتغل ….انت لسة صغير…و مين هيشغلك يا مقروض في السن ده….
علي: ما سليم جارنا بتشتغل بياع في محل موبيلات….و هو في المدرسة لسة …..
عرفة: سليم ده في تانية ثانوي و اكبر منك ب ٥ سنين….و بعدين احنا ملناش دعوة بحد !! التفت انت لدروسك ….
علي : يوووووه مش انت اللي لسة بتقارن بين خالد اخويا و اسلام…..اشمعنا بقي عايز خالد يشتغل وانا لا….ولا هو خيار وفقوس !!
عرفة: بس يا مقروض الكلام ده سابق لاوانه…. اهي امك جت …انا شايف التاكسي بيركن على جنب….
علي اتنطتت ف الشباك وقال: ماما جت…..ماما جت….
عرفة : يا واد انزل تقع من الشباك….اجري افتح لها الباب ….
علي: حاضر بس متنساش انك وعدتني اني هركب السكوتر مع البت تبارك جارتنا و نروح المول …انا مش ناسي…..
عرفة: يا بني اهمد…. لما تبقي متودك ف ركوبه الاول….
تبارك بتركبه من شهرين…بعد الشر عربية تخبطك!!
علي : اعوذ بالله الملافظ سعد….
عرفة بيضحك: ماشي يا مقروض روح افتح لامك الباب و خليها تسخن لي الغدا عقبال ما اتوضا للعصر …
علي: عينيا…..دعواتك يا حج !
عرفة بيضحك و يقول : جيل ما يعلم بيه إلا ربنا …..
المشهد من تأليفي
#حواديت_مروة_الحمدي #حدوتة #الزمن_الجميل #قصة