الصورة بعدسة Ahmed Flex
مشهد من تأليفي
ادام دكانة عم طه عدي عليه راضي جاره في الحارة و دار بينهم هذا الحوار
راضي: صباح الفل يا طه….يعني مبدر انهردة !
طه: مبدر ايه يا سطى مانا كل يوم بفتح الدكان الساعه ٦ ….صباحك فل استني ادي الواد دقدق الجرايد يوزعها و اصب لك الشاي ….
راضي : شاي بحليب سكر زيادة….
بعد ربع ساعة طه عمل الشاي و كمل كلامه مع راضي !
وهو بيشرب راضي قال: بقولك ايه مش انت في عمار بينك وبين استاذ حمدي المحامي….متميل عليه وقوله يشغل بنتي تبارك معاه في المكتب…..
طه: تبارك لسة ف الكلية يا عم …لسة بتدرس!
راضي: مانا فاهم قصدي يمرنها….محامية تحت التمرين!!
طه: عونيا اقوله….و اخبار جابر ابنك ايه… ماشي حاله في محل الموبايلات …
راضي متأفف: لا مشوه…الواد ده هيجيب لي ضعط….مفيش شغلانه بيعمر فيها….و على ايدك حاولت اشغله معايا في الورشة مرضيش….قال ايه مبحبش النجارة….ليه بسلامته فاكر نفسه ابن ساويرس….ما هو ده كار ابوه و جده…عيال توجع القلب بلا هم….ده حتي مفلحش في العلام ….و معاه يدوبك الاعدادية….انما اخته الله اكبر عليها….بريمو دخلت كلية الحقوق و بتنجح كل سنة …. هي امه منها لله اللي بوزته بدلعها فيه…
طه: روق اومال….ربك كريم …ما كل الشباب كده ….بيحودوا شمال بعدين ربك بيصلح الحال !
راضي : يسمع من بقك ربنا….اخبار عادل ابنك ايه !
طه : الحمدلله رضا اهو اتعين ف بنك مصر صحيح المرتب على الاد بس نعمه…و بيفكر يحضر الماجستير ربنا يعينه بس كان نفسي نجوزه الاول….امه فلقاني عايزة تخطب له وهو مركز في الشغل والعلام….
راضي : سيبوه يشتغل و ينجح بلا جواز بلا هم….مستعجلين على ايه…ده لسة شاب والحياة ادامه ربنا يوفقه …كل شئ بميعاد…
طه : صدقت والله ….كل شئ بميعاد ….هقوم انا بقي عشان عندي تصوير ملزمة لعيال في ثانوية عامه …ربنا يعينهم خلاص الامتحانات على الأبواب…متنساش بعد ما تقفل الورشة معادنا الساعه ٩ عند محل عمك عصفور عملنا اكلة كبده اسكندراني انما مزاج…و بعدها هنطلع ع القهوة نضرب حجرين عشان اغلبك في دور طاولة من بتوع زمان!!
راضي : النبي الكلام معاك بيشرح قلبي…انا فعلا محتاج اشم نفسي و اغير جو…. ده حتى القهوة بقالي كتير معتبتهاش…كله من نبر حورية مراتي قعدت تقر على خروجات مع صحابي لحد ما بقيت علطول متلقح ف البيت!!
طه بيخبط على كتفه: يا راجل يا مفتري….ده اذا كان مراتك كانت بتزور جماعتي و شافتني و هي اللي قالت لي اخرجك و افرفشك !
راضي : النبي ايه!! فيها الخير يلا….هنقول ايه …اروح انا الحق افتح الورشة…صباحك عسل ونادي !
طه : في سلامة الله