مديحة: بونجور يا ليلى هانم !!
ليلي: صباح الورد يا مديحة…هانم ايه بس …انتي تقوليلي ليلى
علطول…انتي غريبة …. مبسوطة أننا اخيرا تقابلنا يا ديدي!! معقولة أكثر من شهرين مشفكيش…
مديحة : بس علطول على بالي….اعذريني على تقصيري…. انا وفوزي كنا مشغولين بتأسيس شركة الاسطوانات و اضطرينا
نسافر باريس ….و فوزي كان عنده تصوير كذا فيلم…مش هطول عليكي…المهم انا كان بدي ادعوكي لعشا عندنا في البيت الجمعة الجاية …. وهيكون فيه مجموعة من اهل الفن ….فرصة نجتمع……و نقضي وقت لطيف
ليلى: ممنونة اوي حبيبتي على الدعوة….هكون سعيدة جدا بس يا رب منير أخويا يكون اتحسن….. مريض وانا اللي براعيه….
مديحة: الف لا بأس… سلامته خير !!
ليلي: يا ستي طلعت في دماغه يطلع رأس البر يومين و الطقس اليومين دول برد…..فأخد إنفلونزا شديدة….
مديحة: سلامته حبيتي ….مش بدك أي مساعدة؟
ليلى: ممنونة لذوقك ..اهو أنور أجِل سفره لباريس لحد ما منير يتحسن….والله منير من صغره و هو متعب….عايش اليوم بيومه….مش بياخد باله من صحته….اهو الحكيم كتب له على فيتامينات ….يا مسهل….
مديحة: ربنا يحميه حبيبتي….يلا يدوبك استئذن…. عندي تصوير كمان ساعتين في استودية جلال !!!
ليلي: مش ممكن مش قبل ما نتغدى مع بعض….انور جاي انهردة دادا شوقية عملة كشك و رقاق ….انور طلبه من فترة…و هيكون مبسوط لو اتغديتي معانا …
مديحة : سامحيني يا ليلي بجد مش هقدر اتأخر على التصوير بس اوعدك المرة الجاية و كمان يكون فوزي معانا….
ليلي: إذا كان كده يبقي Daccord و ربنا يوفقك في الفيلم الجديد….
مديحة : Mille merci حبيبتي …سعيدة ….
ليلى: سعيدة مبارك…..
#بقلمي_مروة_الحمدي
#حواديت_مروة_الحمدي
ملحوظة: الحوار من خيال المؤلف و لا يمت للواقع بصلة،
و ربما تكون الشخصيات لم تتلق في الواقع، الهدف استحضار عبق الزمن الجميل