حوار من تأليفي بين نجوى سالم و عبد المنعم إبراهيم ⚘
نجوى: بقي ده فصل تعمله فيا يا سي منعم!!!
منعم: النبي تسبيني اتلم على نفسي احسن مفاصلي سابت!!
نجوى: لا والنبي ايه….طب وانا ….انا اللي سواق التاكسي كان هيجيبني من افايا…لولا الناس اللي في الشارع حشوه!!
منعم: ما هو كله من ربيبية الصون و العفاف الست ميمي شكيب …حد قالها تمسك فيه خناء الراجل ؟؟ كل ده عشان اختلفوا على أجرة التاكسي و قالها انا مسامحك في باقي الفلوس عشان انتي زي امي !!
نجوى: عندها حق ماهو راجل بارد صحيح امه ايه…وهو زي الشحط و شنبه مالي وشه !!
منعم: انتي كمان هتعومي على عومها… انا غلطان اني ركبت معاكم التاكسي… اللي يمشي ورا الستات يضيع
نجوى: لا وانت بسلامتك جدع اوي مانت جريت
منعم: لا عندك….انا الأول حوشت ما بينهم لحد ما الست ميمي اديته بالشنطة على دماغه و الراجل دمه ساح والناس اتلمت… و انا عندي تصوير و الكاست كله مستنيني…انتي كنتي عايزاني استنى لما اروح القسم و اتعطل و بسلامته المنتج يعلقني!!
نجوى: نهايته …اهو انا ربنا قدرني و راضيت السواق……طلع ابن حلال و تنازل …..إلا قولي انت بتصور ايه !
منعم: فلم كوميدي و معايا شوية أساتذة يفرحوا كمال الشناوي و الست سامية جمال و كاريمان و عمك القصري!!
نجوي : سامية جمال….يبقي اكيد رشدي بيجي الاستوديو معاها حاكم هو مبيفرقهاش!!
منعم: بيجي يا ستي و فالقنا بغيرته عليها …
نحوي: براحته ده رشدي يعمل اللي هو عوزه….. حلاووووووووته
منعم: بقي كده طب سيبني بقي الحق اجهز احسن الريجيسير مستحلف لي من النوبة اللي فاتت عمك القصري يا ستي في البريك اكلنا سندوتشات كبدة وانا وهو بعدها بتنا في الحمام!!
نجوي بتضحك: اللي معاه القصري في فيلم يبقي مبخت سلم لي عليه….. يلا ….سعيدة
منعم: سعيدة مبارك !
الحوار
للمزيد من حواديت الزمن الجميل تابعوني
https://www.facebook.com/حواديت-مروة-الحمدي-111311973951077/