من كواليس تصوير مسلسل عصفور افندي”برج الاكابر”
حوار بين نبيلة السيد و حسن عابدين
حسن : صباح الخير يا ست نبيلة !!
نبيلة: يا صباح الورد تعالي اشرب معايا الشاي لسة مساعد المخرج بيقول في كاميرا مش جاهزة….
حسن: كوباية الشاي جاية في وقتها…. اصل الدنيا كانت زحمة وصدعت من السواقة…..
دخل محسن محيي الدين ….
محسن: ايه رايكم في المفاجأة دي قلت لازم اجي ابارك لكم على المسلسل الجديد…ابويا و حبيبي الاستاذ حسن ….مقدرش اعدي جنب اللوكيشن و ما افوتش اخد البركة….
حسن: فيك الخير يا واد يا محسن….انت عارف غلاوتك عندي…..لسة يا واد بتسرح بالموتوسيكل!!
محسن: يا استاذ حسن. . مانا قلت لك تيجي معايا على الموتوسيكل وانت اللي قلت لا …..مش احسن من دوشة العربيات!!
حسن بيضحك: لا يا سي محسن ….انا راجل كبير مينفعنيش شعبطة الموتوسيكلات…. أنتم ما شاء الله شباب زي الورد….
محسن: الله …..انت هكبر نفسك ….طب والله ده انت دمك شربات و بتعمل جو سعادة في اللوكيشن…. ولا ابن العشرين !!
حسن: كتر خيرك ابن العشرين مرة واحدة…..
نبيلة اتدخلت في الكلام: جتك ايه يا محسن الراجل الكبارة يركب وراك في الفسبا…… ده كان بعد الشر يكسر…..ده العضم الكبير وقعته وحشة اوي …..يكفينا الشر…..
حسن: عضم كبير!!! ده الملافظ سعد يا نبيلة…..
نبيلة بتضحك: الحق عليا خايفة عليك…..
محسن: طب ايه رايكم بقي…. اني عازمكم على حفلة الخميس الجاي….و من غير حجج ولا أعذار….دي حفلة عاملها جو عشان الفيلم الجديد …اصله واعدني بدور فيه….
حسن: ربنا يوفقك يا بني بس انت عارف اني مش بتاع حفلات….خد نبيلة….
نبيلة: اه حاكم انا اللي بتاعة حفلات…بس استنى اشتري السواريه الميني جيب….انا من البيت للاستوديو و من الاستوديو للبيت…..بس يا واد يا محسن ماتنساش تحكي لك كواليس الحفل….. النم يعني…..و بتضحك
محسن: طب…. لولا ان عندي مسرح مع الاستاذ فؤاد انا كنت وصلتكم لحد البيت عشان تيجوا الحفلة….
حسن: سلامي ل فؤاد رغم انه زعلان مني يا سيدي عشان محضرتش المسرحية بتاعتكم اسمها ايه “قفل على البنات”
محسن بيضحك: لا سك على بناتك…..
نبيلة : انا بقي رحتها ….فؤاد ده قنبلة على المسرح الا بقي المفاجأة هي سناء يونس عاملة دور جميل …اتوقع لها مستقبل هايل كوميديانة محصلتش….. والبت حتت السكر شيريهان…..
محسن: طب وانا ايه هوا….مفيش كلمتين تشجيع ليا يا بلبلة!!
نبيلة: يا واد ده انت ابني…..و عارف غلاوتك عندي…
محسن بيضحك: عارف يا ست الكل ….استئذن بقي احسن يدوبك اروح انام عشان المسرح بالليل….ده فؤاد المهندس! يعني مواعيد زي الساعة ولا يعلقني !!
حسن: مع السلامة….. و سوق بالراحة يابني ربنا يكفيك شر الطريق…..
نبيلة : و متنساش يا واد تبقي تحكي لي كواليس الحفلة….
ملحوظة: الحوار من خيال المؤلف و لا يمت للواقع بصلة