حوار بين الفنان حسين الشربيني و الفنانة سناء يونس من تأليفي
حسين : مساء الفل يا سنسن….
سناء متعصبة: بقولك ايه يا سي حسين….ولا سنسن ولا دياولو انا عفاريت الدنيا بتتنطط أدامي!
حسين: ليه بعد الشر….طب استقبليني بابتسامة … بضحكة….وانا لسة راجع من الشغل… بدل وش الجبس ده !!
سناء بصوت عالي: انت قلت ايه !
قصدي وش السعد يا روحي….ايه اللي جرى !
سناء: اللي جري لا ينكتب ولا ينقرى…..
حسين بعصبية: انتي هتدخلي لي قافية….متنطقي يا ولية مالك مزعببة ليه….
سناء: ايوة ….ايوة…اهو جو الحنية اللي بدأت بيه مكملش خمس دقايق …عادتك ولا هتشتريها…..
حسين بيضرب كف على كف: اللهم طولك يا روح….يا ولية انتي لا منك ولا كفاية شرك….دخلت بجو رومانسي لقيتك قلبة سحنتك….. روحت طايح فيكي شمال قومتي لقحتي كلام……انطقي حصل ايه ….
سناء: اللي ينقرص في لسانه البواب….بقوله يجيب لي طلبات من الجمعية يرد يقولي:” لا اخر مرة اتلطعت ساعتين ..لو عايزة اجيب لك من الجزار اللي اخر الشارع ” ….لما قلت له لا ده حرامي….قالي:” خلاص يبقي بلاها…متاكلوش لحمة” !!
حسين: انتي مش اتخنئتي معاه الاسبوع اللي فات برده عشان اشترى خضار غالي…و حلفتي انه مش هيجيب لك حاجة تاني…
سناء: اه بس اتزنقت انهردة….. اعمل ايه….مفيش لحمة و معنديش وقت انزل اجيب بذاكر للواد الكبير عنده امتحان بكرة…
حسين: بصي بقي…. انا مش فاضي للأرف ده كل شوية….عننا ما أكلنا….طلعي حتى جبنة و تونة….
سناء: بقي يا راجل… بدل ما تمسكه تبهدله….تاكلنا احنا تونة….
حسين: لانه بصراحة عنده حق…الجمعية زحمة و لطعة ساعتين….و الجزار لو غالي مناكلش لحمة…. ابقي اعملي حسابك لما تروحي الجمعية تشتري كمية كبيرة….
سناء: هأووووووو…..منين يا حسرة…..اطبخي يا جارية كلف يا سيدي…..قُصره ايدك على 200 جنيه ابعت اجيب اكل….خلاص الوقت اتأخر مش هلحق أطبخ …
حسين: 200 جنيه ليه…..
سناء: هنجيب بيتزا….يدوبك ٢ يكفونا مانا وانت و ٣ عيال..
ايه مستخسر ف ولادك 200 جنيه…
حسين: و بيتزا ليه…ده ارف….انا هبعت اجيب كشري من “ولعة” ….اكله حرشة و حنينه….
سناء بعصبية: كشري….تاني…..يا راجل ارحمنا…. ما لسة واكلينه يوم الجمعة…..
حسين مسك موبايله و قال :و ماله ….تاكلوه انهردة كمان ..
مانا مش هدفع 200 جنيه عشان غدوة…..يلا اهو بتصل بالمحل….
سناء بتبرطم: قوطعت راجل جلدة….
حسين: بتهلضمي تقولي ايه…..
سناء : ولا حاجة….بدعي عليك….لا …قصدي بدعيلك يا خويا!!
حسين: ايوة كده ….اتعدلي….جتكم الهم…..انا جاي استريح و اكل لقمة الاقيكي طلعتي فيه زي القطر…
وقال بصوت واطي: ” قطر لما يلهفك ….ولية نكد”
سناء: سمعتك….بس مش هرد عليك…. ما هو مفيش فايدة كان يوم….ولا بلاش اروح اذاكر للواد….بلا هم….
حسين: بالسلامة….. و متعليش صوتك لاني هدخل اتخمد….عقبال ما الاكل يجي….توب علينا يا رب
الحوار