مفيش اجمل من أخلاق وخفة دم ابطال الزمن الجميل وحنيتهم على بعض ده حوار من خيالي على لسانهم يا رب يعجبكم
مشهد من خيالي
منعم: الو يا ست ماري …انا عبد المنعم ابراهيم..
صباح الفل !!
ماري: صباح الورد يا منعم…. بقى كده يا جبان شهر مسمعتش صوتك !!
منعم: لا انتي هتسمعي صوتي دلوقتي لأنه هيجيب اخر الدنيا !!!
ماري: ليه يا خويا بعد الشر…
منعم: صاحبتك المصون….. الست ميمي شكيب….انا بصراحة جبت اخري….كل يوم مشكله…. و هي راكبة دماغها….قلت اكلمك تهديها…… و إلا أقسم بالله ما هكمل التصوير!!
ماري : هدي اخلاقك بس اومال….كل شئ يتحل بالهداوة!!
منعم: طب انا هحكيلك و انتي تحكمي….امبارح العصر اتأخرت عن التصوير بسبب خناقتها مع سواق التاكسي…الراجل معجبتوش الاجرة فقالها: ” انا مش هدقق معاكي عشان انتي اد امي !!”
ماري: مو لما يلهفه البعيد….دي كلمة تتقال!!
منعم: لا و هي يعني صحبتك سكتت!! دي رزعته بالشنطة على دماغه… وقعدت ساعة اهدي ف الراجل….انهردة بقي قصة جديدة….ما اصل احنا فاضيين ل يوميات الست ميمي!! انهردة المساعدة بتاعتها حرقت الفستان اللي كانت هتمثل بيه وهي بتكويه……و المخرج قالها :” البسي فستان تاني…” و دي رأسها والف سيف انها تروح محل صيدناوي تشتري نفس الفستان…و كل الكاست كان جاهز و اتلطعنا ساعتين عقبال ما الفستان اشتروه….
ماري: معلش يا منعم….هي عصبية و دماغها صرمة قديمة بس والله قلبها زي البفتا البيضا …
منعم: ده انا اللي هيجي لي ضغط….يا ست ماري كده كتير اوي ..اتكلمي معاها ارجوكي….انا كمان عندي مسرح بالليل و ببقي صاحي هلكان…مش ناقص كمان حرقة دم ع الصبح !!
ماري: ما هو كلام بيني و بينك اصلها اليومين دول مزاجها مش اد كده اكمن سراج جوزها بعافية شوية …
منعم : سراج منير تعبان….انا مكنتش اعرف الف لا بأس عليه …
ماري : اه يا خويا بقاله قيمة شهر راقد ف السرير…
منعم: بقى ده كلام يا ست ماري …و ازي متقوليش…عشان اعمل الواجب…استاذ سراج أكثر من أخ و ياما وقف جنبي ف بداياتي….
ماري: انا عارفة انك ابو الواجب يا منعم…بس القصري و اسماعيل ياسين قاموا بالواجب….. وانا بكون معاه وقت ما ميمي يكون عندها تصوير!!
منعم : كمان القصري و اسماعيل مقالوليش…نهارهم مش فايت….عشان كده الست ميمي مزاجها مش رايق….انا اسف يا ست ماري والله ما كنت اعرف …هروح ازوره انهردة …و الست ميمي كل يوم مستعد اجي اخدها من البيت و اروحها….
ماري: ابن اصول و ديما جدع يا منعم….ده رأيي فيك من زمان …ربما يديم المعروف !!
منعم : اومال يا ست ماري …احنا كلنا أهل … ده احنا بنقعد مع بعض أكثر ما بنقعد مع أهلنا…
ماري : ربنا يديم المعروف يا غالي
منعم : طولت عليكي ….مع الف سلامة
ماري: تسلم يا خويا
الحوار من خيال المؤلف ولا يمت بصلةللواقع إنما هو استحضار لعبق الزمن الجميل